Rjad „Krajiny serbskeho filma“ w Berlinje jara derje wopytany był

Berlin (SN/MiP). Žurla małeho kina w Berlinskim historiskim muzeju běše wutoru wječor hač na poslednje městno wobsadźena. Na programje steještej filmaj Serbskeje filmoweje skupiny: film „Rublak – legenda wo wuměrjenym kraju“ wot režisera Konrada Herrmanna z lěta 1983 a film „W Błótach“ wot režisera Petera Rochi z lěta 1989. Pod titulom „Serbja a brunicowa industrija“ běše to sedme a zdobom poslednje zarjadowanje rjadu „Krajiny serbskeho filma“, kotrajž běštaj filmowča Grit Lemkowa a medijowy wědomostnik Andy Räder za „Kino w brónjowni“ kuratěrowałoj. W nadawku Filmoweje załožby DEFA kaž tež Serbskeho instituta staj wobaj k temje „serbski film“ slědźiłoj a knihu pod samsnym titulom zestajiłoj, kotraž je lětsa w aprylu, hromadźe z dwójnej dvd-ju, wušła. Wusahowace filmy, zwjetša z filmoweho namrěwstwa DEFA, kotryž běštaj za knihu analyzowałoj, staj tematisce do Berlinskeho filmoweho rjadu „spletłoj“.