Dypkownje startowaše sobotu, 6. januara, we wjacezaměrowej hali w Kulowje tak mjenowany koparski turněr Kulowcup. Zarjadowarjej a organizatoraj běštej cyłk Kulowminatijow a United Clubs for Kulow. Wobdźěliło bě so dźesać mustwow młodźinskich klubow z a wokoło Kulowa: Kulowminatije, Zelena garda, WD-40, Kickery, Koćina-Kulow, Němcy, Kulow Section, Flames of Pils, Dołha garda a Bojazliwcy.
Mustwo FC Energije Choćebuz je po zymskej přestawce minjenu srjedu trening zahajiło. Na zakładźe mnohich schorjenjow w mustwje w tydźenjach do hód dyrbještej so poslednjej hrě w lěće 2023 wotprajić. Nětko sćěhuje na spočatku dypkoweho hrajneho koła za FCE chětro wjele winowatostnych partijow. Wot 21. januara (domjaca hra přećiwo Herće II) hač do kónca februara ma FCE inkluziwnje nachwatanskeje partije w krajnym pokalu (14. februara pola VfB Kśišow) dźewjeć hrow absolwować, štož woznamjenja za tuchwilu wuski kader wulke wužadanje. Tola trenar Claus Dieter Wollitz nochce skiwlić, hdyž praji: „Wězo je personelna situacija tež dla čerwjeneju kartow za Timmyja Thiele a Joshua Putze kaž tež dołhodobneho zranjenja kapitana Axela Borgmanna komplikowana. Ale mamy kader, kotryž to bjezdwěla znjese, hdyž hrajerjo raz na swojich starodawnych pozicijach njehraja.“
Wupadow hrow dla je so FC Energija w tabulce na městno štyri sunyła. Łužičenjo su nětko we winowatosći, nachwatanske hry dobyć, zo bychu so zaso přibližili.
Aktiwne přihoty za lětuše europske koparske mišterstwo awtochtonych narodnych mjeńšin w sewjernej a južnej Schleswigskej běža. Kaž naposledk před kóždym turněrom přewjedźechu mužojo Serbskeho mustwa wot 5. do 7. januara w Choćebuzu treningowe lěhwo k mjezsobnemu zeznaću.
Nimale wšitcy ze 27 přeprošenych hrajerjow přijědźechu pjatk na pózdnim popołdnju. Hnydom po přichadźe započinaše so w hali trening. W srjedźišću stejachu hry a zeznaće teama. Po hodźinje přewza mustwowy fyzioterapeut Měrćin Špitank a rozłoži, kak wažne je, ćěło na tajki turněr přihotować. Wón skedźbni na hoberske poćežowanje mnohich hrow w najkrótšim času. Sobotu dźěše po snědani na kumštny trawnik. Nimo hrajnych formow běchu wosebje štyrjo přitomni wrotarjo žadani.
Awtor dźensa
Tadej Cyž
Nowe lěto je so započinało a swět sporta so hižo razantnje wjerći. Nimo toho zo so přichodny kónc tydźenja w zwjazkowej lize zaso za bulom honi, je wjeršk w januarje zawěsće europske mišterstwo w mjetańcy. Tu maja němscy mužojo domjacu lěpšinu a startuja přećiwo Šwicarskej do turněra. Kuriozum při tym je, zo přewjedźe so hra w Düsseldorfskim koparskim stadionje. Dalše hrajne města budu Mannheim, Mnichow, Berlin a Köln. Jara młode mustwo narodneho trenarja Gislasona njeliči tónraz k wulkim faworitam. Ale snano je runje to přijomnišo za němski cyłk. Tak njeje ćišć přewulki.
Dalše wulke sportowe zarjadowanje budźe swětowe mišterstwo wot 7. do 18. februara w biatlonje. Tute wotměje so pola našich susodow w Čěskej. Cyłkownje 12 rozsudow padnu w Nowym Měsće na Morawje. Tež němske biatlonowe mustwo ma šansy na medalje.
Nowolětne běhi we Wojerecach
Wotrjad lochkoatletika sportoweho kluba Wojerecy budźe njedźelu, 7. januara, w sportowym forumje we Wojerecach nowolětne běhi přewjesć. W poskitku změja tam distancy 6 km a 2,2 km. Start wobeju běhow je w 10.30 hodź., přizjewjenja na městnje su jenož hišće hač do 10.15 hodź. móžne.
Halowy turněr TCM
Koparski turněr Towarstwa Cyrila a Metoda z.t. (TCM) budźe jutře wot 15.30 hodź. w Chróšćanskej „Jednoće“. Hraja wo pokal TCM. Přeprošene su wosadne a wjesne mustwa młodźiny kaž tež cyłki sportowych jednotkow. Přizjewjenja su pola Guida Zahrodnika w Jaseńcy pod telefonowymaj čisłomaj (03 59 33) 3 11 53 abo 0151 52 22 17 59 hišće móžne.
Přihotowanske koparske hry
06.01. 13:00 FC Energija Choćebuz –
ST Choćebuz-Strobice
13.01. 13:00 FC Eilenburg –
Budissa Budyšin
13.01. 13:00 Wojerowski FC –
Módro-běli Kulow
Kulow cup w Kulowje
Łužiske lodohokejowe liški –
ESV Kaufbeuren 2:3 p.t.p.
(0:1, 1:0, 1:1, 0:1)
Łužiske lodohokejowe liški – Starbulls Rosenheim 4:1 (1:0, 2:1, 1:0)
Liški trjechichu třeći raz w tutej sezonje na zestupnika do DEL2 Starbulls Rosenheim. Dotal móžeše kóždy team partiju za sebje rozsudźić. Tola hižo pjeć hrajnych dnjow dołho je pěsk pod smykačemi Baworčanow. Tak tež njejsu w Běłej Wodźe swoju seriju poražkow zadźeržeć móhli. Pola Łužičanow běžeše w decembrje cyłkownje jara pozitiwnje. Wot wosom partijow móžachu Liški pjeć za sebje rozsudźić a sej tak wažne dypki zawěsćić. Zajimawe pak, při štyrjoch duelach dyrbjachu módro-žołći do podlěšenja respektiwnje do třělenja penaltyjow a wudobychu sej stajnje jenož dwaj dypkaj. Dalši wažny to dopokaz za sportowsce ekstremnje wurunanu ligu.
W prěnjej třećinje mějachu hosćo optisce wjace hrajnych podźělow a mylachu natwar Liškow jara efektiwnje. W 11. min. pak zhubichu Lukáša Valášeka z wočow. Tón dźěše přez prawu stronu do přećiwniskeje třećiny, nawróćeny kapitan Clark Breitkreuz steješe złotoprawje a zaměstni puk k 1:0 nawjedowanju w saku.
Prěnja połserija sezony 2023/2024 je za wyšeho ligista Budissu Budyšin nimale zakónčena. Jednu hru dyrbja mjenujcy na zakładźe wjedrowych wuměnjenjow minjenych tydźenjow dla nachwatać. Mustwo trenarja Stefana Richtera hraje prěni kónc tydźenja februara pola stafloweho faworita w Kśišowje.
Městno w tabulce a wuwiće
Prěnje mustwo muži přezymuje na dźesatym městnje w tabulce wyšeje ligi. Loni bě to w samsnym času 18. městno, a z tym poslednje. Dźensa maja Budyšenjo štyri dypki předskoka na prěnje zestupne městno, kotrež ma tuchwilu mustwo ST 09 Arnstadt.
Domjaca a wonkowna bilanca
Cyłk z města ma cyłkownje 15 dypkow ze 14 hrow. Loni běše to 12 dypkow z 13 hrow. Štyri króć je Budissa dobyła, trójce njerozsudnje hrała a sydom poražkow přijimała. Na hru přińdźe tak na dypkowe konto Budissy přerěznje 1,07 dypkow (loni: 0,92 dypkow). Wosom ličakow wudobychu sej Budyšenjo na domjacej Młynkec łuce a sydom dypkow na cuzych hrajnišćach. Wobhladaš-li sej přerězki dypkow za domjace a wonkowne hry, poda so hódnota 1,14 dypkow na hru na Młynkec łuce a jedyn dypk na cuzych hrajnišćach.
Wrota a wrotowy poměr