Turjej (HA/SN). „Dźensa je historiski dźeń za Serbow a Domowinu w Delnjej Łužicy. Po smjerći delnjoserbskeho župana Fryca Fobowa 1975 dyrbjachmy 40 lět čakać na zjawne počesćenje a hódnoćenje jeho njesprócniweho dźěła za serbskosć.“ Tole rjekny minjeny pjatk Harald Koncak, župan župy Delnja Łužica a předsyda Domowinskeje skupiny Turjej, jako poswjećichu na Turjejskim kěrchowje znowa wuhotowane rownišćo za Fryca Fobowa a jeho swójbnych. Rowny kamjeń je ze serbskim napisom „K česći Fryca Fobowa, našeho njesprócniweho wojowarja za delnjoserbsku rěč a kulturu“ wuhotowała a z jeho wobrazom wudospołniła Christine Zejmišowa z Drjenowa. Załožba za serbski lud, gmejna Turjej a tamniša Domowinska skupina su pomnik spěchowali.