Wojerecy (SN/at). „Rěčne swětłownje we Wojerecach“ su woblubowane zarjadowanja z nimale krutym kruhom wobdźělenych. Serbskej rěči tež lětsa k wjetšemu zjawnemu prestižej dopomhać, to bě sej předsydstwo Domowinskeje župy „Handrij Zejler“ w januarje předewzało. Krótko do wulkich šulskich prózdnin je wone na swojim julijskim wuradźowanju tři wuspěšne zetkanja wotličiło, kaž jeho čłon Werner Sroka našemu wječornikej rozprawja. „Smy našu ,rěčnu swětłownju‘ w aprylu, meji a juniju dale wjedli. Stajnje je dźesać do dwanaće zajimowanych přichwatało.“ Woni drje mějachu rozdźělny staw wobknježenja rěče, na to pak su so organizatorojo nastjili. „Fakt je, zo ze zarjadowanjom pokročujemy“, zdźěli Werner Sroka poziciju župneho předsydstwa. Wězo, cyle tak kaž w času do korony njeje było, hdźež su so tež raz w hosćenu zetkali. Bróžnja při Domowinskim domje pak bě na skrućenju swojich znajomosćow w serbskej rěči zajimowanym dobra městnosć. Wobsahowje su při tym mjez druhim z dźěćaceho časopisa Płomjo čitali abo so z prašenjom „N abo ń?“ zaběrali. Přichodne zetkanje planuja w septembrje.