Budyšin (SN/at). Naćisk Mnichowskeho běrowa architektow bogevischs buero je po rozsudźe fachoweje jury wubědźowanje architektow za přichodny Serbski centrum wědy na Lawskim arealu dobył. Wo tym je Załožba za serbski lud dźensa informowała.

Jury bě wo tymle přinošku přede­wšěm tohodla přeswědčena, dokelž su Mnichowscy architekća twarjenje na Lawskich hrjebjach zachowali, kotrež pod pomnikoškitom njesteji. Tak je jenož mało požadarjow postupowało. Přitwar přemosći dźěru k zapadnej mjezy ležownosće, hodźi so do městotwarskeho wobłuka a skutkuje najebać to načasne. Na wobłukojtym přechodźe wužiwaja typiski motiw Budyskeho stareho města. To je hódna adresa za Serbski forum wědy, jury měni. Naćisk funguje nětko, ale tež, hdyž budźe susodna ležownosć na Lawskich hrjebjach wobtwarjena. Jurorow je nutřkowna organizacija runje tak přeswědčiła kaž kwalita nastatych nutřkownych dworow.