Čłonojo su wuwiću medijo-pedagogiskeho projekta SŠT přihłosowali

Smjerdźaca (SN/MiR). Medijo-pedagogiski projekt Serbskeho šulskeho towarstwa (SŠT) LUCIJA ma swójsku towaršnostnu formu dóstać. Wuměnjenja za to su čłonojo na lětušej hłownej zhromadźiznje SŠT minjeny pjatk w Smjerdźacej tworili. Na zeńdźenje běše 20 hłosakmanych do tamnišeho serbskeho kubłanskeho srjedźišća LIPA přichwatało, kotrehož nošer je tohorunja šulske towarstwo.

Projektowy koordinator a medijowy pedagoga Michał Cyž je přitomnym aktualny staw LUCIJE předstajił. W prěnim rjedźe je wón šěroki wobjim posłužbow rozłožował, kotrež sobudźěłaćerjo projekta tuchwilu přewjeduja a kotrež su na internetnej stronje přistupne a knihujomne. Perspektiwisce chcedźa je dale wutwarić.