Hotuja so na jednanje wo přichodnym finančnym zrěčenju załožby

Budyšin (SN/mb). Dotal njeje załožbowy zarjad próstwy wo spěchowanju serbskich projektow pobrachowacych pjenjez dla wotpokazać trjebał. To praješe załožbowy direktor Jan Budar w rozmołwje ze Zwjazkowym předsydstwom Domowiny srjedu we Wojerecach. Załožba a Domowina stej sej přezjednej, zo ma so w přichodźe nimo wuhotowanja institucijow tež bohate serbske kulturne žiwjenje skupin a towarstwow zaručeć. Tohodla so zamołwići w Serbach hižo nětko na to hotuja, pjate finančne zrěčenje za załožbu přihotować. Wone budźe wot 2026 zaso pjeć lět płaćić. Budar sej přeje, kaž je našemu wječornikej prajił, zo Zwjazk, Braniborska a Sakska zrěčenje sčasom – potajkim do lěta 2026 – podpisaja.