Budyšin (SN/mb). „Hdźež so nachwilnje telko serbsce njerěči“, tam ma Julian Nyča wot spočatka měsaca rewitalizaciju rěče na starosći. W swójbje znateho aktiwista za žiwu dwurěčnosć we Łužicy je serbšćina, kaž sam praji, „generaciju přeskočiła“, potajkim najprjedy wusadźiła a z nim so zaso wróćiła. Čłon sakskeje serbskeje rady a něhdyši sobustaw załožboweje rady ma nětko wosebitu zamołwitosć: jako „wědomostny sobudźěłaćer za rěčne resursy“ projekta ZARI, „syć za regionalnu identitu a serbsku rěč“. Zaměr je, tak nošer Domowina wo tutym projekće, kotryž so ze srědkow stata za změnu strukturow financuje: „100 000 aktiwnych serbsce rěčacych w lěće 2100 a 50 000 Łužičanow z pasiwnymi znajomosćemi serbšćiny w lěće 2050.“