Pětš Šurman a Milan Hrabal lawreataj Myta Domowiny 2023

Budyšin (SN/mb). Lětuše myto Domowiny su dr. Pětšej Šurmanej z Choćebuza a Milanej Hrabalej z Warnoćic spožčili. Při zahajenju swjedźenskeho zarjadowanja na žurli Serbskeho domu w Budyšinje je předsyda Domowiny Dawid Statnik na to skedźbnił, „zo je myto Domowiny najšěršo zapołožene myto Serbow, wšako česći narodne skutki Serbow na najwšelakorišich polach – nic jenož kultury, wědomosće abo wuměłstwa.“ Tuta mnohotnosć so w žiwjenju Pětša Šurmana wotbłyšćuje: Po přewróće so za wozrodźenje Maćicy Serbskeje zasadźowaše, wot 2006 nawjeduje jeje delnjoserbski wobłuk Maśicu Serbsku. Stawiznarjej a wědomostnemu sobudźěłaćerjej Serbskeho instituta hlada tež w třěšnym zwjazku wjele čestnohamtskeho dźěła do rukow, tak je wón wot 2013 z čłonom župneho předsydstwa a předsydari mjeztym dwě lěće najwjetšej župje jako župan. Intensiwnje so publikacijam tež wo stawiznach Maśicy wěnowaše a so zdobom wo wabjenje dorosta za sorabistiske dźěło prócowaše.