Předsydstwo Zwjazka serbskich wuměłcow pokaza w swojej rozprawje na hłownej wólbnej zhromadźiznje 18. nowembra w Haslowje na dwulětne dźěło. Wobćežne bě, zo dyrbješe ZSW kóždolětnje wotnowa městno koordinatorki zaručić. Załožba za serbski lud je za to 60 procentow kóštow kryła. Tamne 40 procentow dyrbješe předsydstwo ZSW zarunać.
Tójšto projektow přewjedli
Při wšěm pytanju za sponsorami – ZSW je w zašłymaj lětomaj 47 043,08 eurow nazběrał – móžachu 40 wjetšich a mjeńšich projektow přewjesć. Wusahowacej běštej loni a lětsa 37. a 38. mjezynarodny swjedźeń poezije. Z nimaj bě so poradźiło, dóstać přistup do Drježdźanskeju literarneho domu wile Augustin a gymnazija swjateho Bena. Tam basnicy lětsa znowa wustupichu, prezentujo serbsku kulturu a literaturu.
Z diskusije na hłownej a wólbnej zhromadźiznje Zwjazka serbskich wuměłcow 18. nowembra w Haslowje:
Po rozprawje předsydstwa a rozprawach předsydow kołow spisowaćelow, tworjacych wuměłcow a hudźbnikow wuwi so na hłownej wólbnej zhromadźiznje Zwjazka serbskich wuměłcow diskusija. Jako prěni bě so Jan Bělk, kiž chcyše za noweho předsydu ZSW kandidować, słowa jimał. Wón mjez druhim namjetowaše, zo měł so ZSW dale womłodźić, zo njebychu „za 15 lět zhromadźiznu zwjazka w Chróšćanskej starowni“ wotměć trjebali. Zdobom so hudźbnik a zastupjer ZSW w Zwjazkowym předsydstwje Domowiny prašeše, hač je ZSW scyła hišće trěbny? Jeho měnjenje k tomu rěkaše, zo je zwjazk předewšěm trěbny za komunikaciju mjez wuměłcami a za mjezsobnu zamołwitu dowěru. Trěbne su dale młódša generacija a ideja zhromadnosće kaž tež diskusija wo tym, za čo zhromadnosć trjebamy.
Lemišow/Kamjenc (SN/CoR). Předsydstwo Budyskeje župy„Jan Arnošt Smoler“ zetka so wčera w Lemišowje. Wotpohlad, so zhromadnje na přednošk Franca Čornaka w Stróžanskim Domje tysac hatow podać, so bohužel njezwoprawdźi, dokelž tón chorosće dla wupadny.
Prěnja tema wčerawšeho wuradźowanja bě župna adwentnička jako kónclětne zarjadowanje, wotměwaca so 8. decembra w 16 hodź. w Budyskim Serbskim domje. Tam chce županka Jana Pětrowa čłonam rozprawu dźěławosće lěta podać. Dale je so župne předsydstwo wčera z diskusiju wo nowelěrowanju sakskeho šulskeho zakonja zaběrało. Wone wobzamkny, w tym nastupanju stejišćo Domowiny podpěrać. Přihotuja nětko list předsydźe třěšneho zwjazka. Kaž regionalna rěčnica Sonja Hrjehorjowa našemu wječornikej zdźěli, chcedźa jón čłonam župy na adwentničce předstajić. Jako dalšu temu su dźěłowy plan za lěto 2017 wobjednali a wo tym wuradźowali, kotre zarjadowanja chcedźa klětu organizować.
Łaz (AK/SN). Poprjancowy domčk wopytowarjow zawjesela. Před nim čaka Hanka na Janka. Sćěny su ze styroporowych platow a z deskow. „Jank a Hanka słušataj prosće k tomu“, měnja Veronika Sauer, Angelika Hammerschmidt a Gabriela Knothowa z Łazowskeho spěchowanskeho towarstwa Zetkanišćo Dom Zejlerja a Smolerja. Wot časa swojeho dźěćatstwa zwjazuja wone tule bajku z poprjancami. Chěžku běchu wone z wjele lubosću natwarili a wupyšili. Wona je dźěl hodowneje wustajeńcy „Połčničanske poprjancy“ w Domje Zejlerja a Smolerja. Zmóžnili běchu ju dźakowano požčonkam Połčničanskeje kulturneje a turistiskeje towaršnosće. Zawčerawšim su přehladku wotewrěli.
Wustajeńca ma k pječenju a woptanju pohnuwać. Mjez druhim wuhlada wopytowar originalne recepty, historiske receptowe knihi, najwšelakoriši grat, kotryž za zhotowjenje poprjancow trjebaš, a wězo wonjate poprjancy.
Choćebuz (KF/SN). Serbske blido w Choćebuskim měšćanskim muzeju steješe wčera pod hesłom „Serbska drasta něhdy a dźensa“. Kuratorka Choćebuskeho Serbskeho muzeja Christina Kliemowa bě sej tónraz Deliju Münchowu a jeje mać Doris Heinzowu přeprosyła, wot kotrejež je dźowka šwalčernju w Žylowje přewzała. Delia Münchowa je w Halle design studowała a so mjeztym na wušiwanje specializowała. Nimo toho studowaše w Chinje dwě lěće kaligrafiju. Přijomna žona ma wulku wutrobu za serbske temy, kaž sama rjekny. Ze serbskej drastu je takrjec wotrostła. Pod wliwom maćerje započa wušiwać, wosebje dźěle drasty. Dźensa naćisnje wona nowe motiwy po starej tradiciji wuhotowanja a swoje dźěło lubuje. „Naša drasta tule w Delnjej Łužicy je dźěl žiweje tradicije a je tuž něšto wosebiteho. Runje tohodla, dokelž je to tradicija, je po mojim měnjenju wažne, zo přeco nowe motiwy nastawaja. Je rjenje, hdyž móžu so jako designerka w šwalčerni z kupčemi zetkać a rozmołwjeć. Wjeselu so, hdyž mi wone praja, zo so jim drasta lubi.“
Haslow/Budyšin (SN/JaW). Zwjazk serbskich wuměłcow chce tež klětu w lěću Swjedźeń serbskeje poezije přewjesć. To je předsydstwo ZSW na swojej njedawnej hłownej zhromadźiznje w Haslowskim Bizoldec hosćencu připowědźiło. Hłownu zamołwitosć za organizaciju a přewjedźenje lyriskeho swjatka přewozmje znowa čłon předsydstwa ZSW a nawoda koła serbskich spisowaćelow Benedikt Dyrlich. Budyšan dale rjekny, zo budźe so zdobom wo 40. swjedźeń serbskeje poezije w lěće 2018 starać, štož čłonojo zwjazka wuraznje witachu.
Klětuši swjedźeń poezije wěnuje ZSW serbskemu basnikej Jurjej Chěžce, kotrehož stote narodniny 2017 wopominamy. Wón je jedyn z prěnich zastupjerjow moderneho serbskeho basnistwa. Literarni fachowcy maja jeho za najbóle doprědkarskeho serbskeho poeta swojeho časa w prěnjej połojcy 20. lětstotka. Jurij Chěžka so 22. julija 1917 w Hórkach. 1944 bu jako wojak němskeje Wehrmachty blisko serbiskeho města Kragujevac zatřěleny.
Zwjazk serbskich wuměłcow, jedne z najaktiwnišich serbskich towarstwow, wojuje wo eksistencu.
Haslow (SN/JaW). Zwjazk serbskich wuměłcow dyrbješe na swojej pjatkownej hłownej zhromadźiznje w Haslowskim Bizoldec hosćencu wólby noweho předsydstwa a předsydy přestorčić. Přičina toho bě přemało kandidatow. Z přitomnych 25 čłonow bě jeničce Jan Bělk za předsydu kandidował a Bosćan Nawka za nowe předsydstwo. Zo pak móhli scyła wolić, dyrbja po wustawkach znajmjeńša třoch kandidatow měć. Tohodla wobzamkny zhromadźizna ze 24 přihłosowanjemi, zo ma dotalne předsydstwo hač do kónca apryla dale dźěłać a so za nowymi kandidatami rozhladować. W tym zwisku bě tež rěč wo rozpušćenju, čemuž pak dyrbitej dwě třećinje wšitkich 119 čłonow přihłosować.
Budyšin (SN/JaW). Domowina njeje dotal z nowym mějićelom łužiskeje brunicoweje sparty, z čěskim energijowym koncernom Energetický a průmyslový holding (EPH), hišće žadyn zwisk nawjazała. To zdźěli hłowny jednaćel třěšneho zwjazka Bjarnat Cyž na naprašowanje našeho wječornika. „Smy wo tym hižo na wuradźowanju z čěskim ministerskim prezidentom Bohuslavom Sobotku w juliju w Praze rěčeli. Tehdy pak běchmy so dojednali, najprjedy wšitke kupne formality wočaknyć. Koncern nam termin posrědkuje, hdyž je wšitko zrjadowane“, rjekny Cyž na minjenym posedźenju Zwjazkoweho předsydstwa Domowiny spočatk nowembra w Budyšinje.
Formality su mjeztym wotbyte, bywša sparta šwedskeho energijoweho koncerna Vattenfall ma hižo nowe mjeno a rěka nětko LEAG. Na rozmołwny termin z nowymi mějićelemi pak Domowinski zarjad w sprjewinym měsće přeco hišće čaka. Wjednistwo třěšneho zwjazka so nadźija, zo prawje bórze k rozmołwje z čěskim mějićelom EPH dóńdźe.