Do dweju směrow chce předsydstwo župy Delnja Łužica komunikaciju polěpšować resp. na nowej noze stajić. Stej to Rada za naležnosće Serbow a braniborske ministerstwo za kubłanje.

Choćebuz (SN/at). Wuměna mjez předsydstwom župy Delnja Łužica a braniborskej Radu za naležnosće Serbow ma so polěpšować. To su sej wobdźělnicy posedźenja gremija minjeny štwórtk w Choćebuzu předewzali. Pozadk je njespokojnosć ze stawom informacijow wo tym, kotre stejišćo chcedźa radźićeljo k naležnosćam zabrać, kotrež na swojich posedźenjach ze zapósłancami a zastupjerjemi ministerstwow wobjednawaja. Husto je so rada sama měnjenje wutworiła bjez dalšeje konsultacije župneho předsydstwa. Po słowach župana dr. Pětša Šurmana chcetej so předsydstwo a rada na přichodne zhromadne postupowanje dojednać. Zaměr ma być, „pozicije do posedźenja rady zhromadnje rozjimać“.

Štóž njeje přiwisnik Serbskeho sejma a nětko samo tróšku škodopřejny, móhł prajić: Widźiće, najprjedy je so wulki sponsor Andreas Kluge njejapcy minył, a nětko je David Chmelík wotešoł. Wonaj mataj swoje zasłužby wo serbski lud, najebać to běše ­jeju komunikacija zdźěla ekscentriska. Štož Kluge přećiwo Domowinje polemizowaše, bě zwonka ciwilizowaneje diskusije. A tež Chmelík njekomunikowaše kaž bratr mjez bratrami a sotrami, ale kaž wumóžnik, kiž puć za wšěch znaje. Wobaj padaj skedźbnjatej na njerozrisany problem: ­Nimale tysac ludźi je Serbski sejm woliło, a w tutym cyłku angažowani Serbja su so dawno z čestnohamtskej prócu jako serbska institucija etablěrowali, kotrejž pak ­Załožba za serbski lud dotal kóždežkuli ­institucionelne spěchowanje zapowědźa. Njeńdźe wo to, konkretne žadanje Serbskeho sejma spjelnić, wo kotrymž ma zarjadniske sudnistwo wuradźować. Ale wo znamjo respekta, zo tež tu skutkuje dźěl na­šeho ludu. Marcel Brauman

Hłowna a wólbna zhromadźizna Serbskeho šulskeho towarstwa (SŠT) njeje jenož předsydstwo w zastojnstwje wobkrućiła, ale zdobom wutworjenju medijoweho projekta LUCIJA na towaršnosć z wobmjezowanym rukowanjom (tzwr) nošerstwje SŠT puć runała.

Smjerdźaca (SN/MiR). W rozprawje wo swojej dotalnej dźěławosći předstaji předsydstwo SŠT swoje aktiwity zašłych třoch lět. Mjez tutymi běše wjace hač 30 zetkanjow a klawsurnych posedźenjow. Wužadanje za towarstwo běše wobsadźenje městna jednaćela kaž tež zapřijeće LIPY a dnjoweje maćerje w Drježdźanach. LUCIJA, medijowy projekt SŠT, ­móže so po wothłosowanju čłonow ­nětko na tzwr w nošerstwje SŠT pře­tworić.

Budyšin (SN/at). Přihoty za financne zrěčenje Załožby za serbski lud 2026–2031 běchu jedne ćežišćo wuradźowanja zastupjerjow serbskich institucijow minjeny pjatk w Budyšinje. Zaměr měł być, dotalnu wysokosć spěchowanje znajmjeńša zaručić, ale po móžnosći zwyšić, zdźěli předsyda Domowiny Dawid Statnik na naprašowanje. To tohodla, dokelž chcedźa nachwilnje wutworjene personalne městna w přichodźe wobchować. Jako přikładaj mjenowaše Statnika městnje jednaćela Serbskeho šulskeho towarstwa abo kubłanskeje referentki Domowiny. Zastupjerjo institucijow su nimo toho dorěčeli, wuměnu wo wjetšich synergijach mjez swojimi domami dale wjesć.

Spočatk lěta wuprajeny nastork, šulam sposrědkować přiručku z powołanskimi móžnosćemi w serbskich institucijach mjeztym jako booklet „Ekskursija po serbskich institucijach w Budyšinje“ w nakładźe 500 eksemplarow předleži. Kubłanska referentka Katrin Suchec-Dźisławkowa je jón předstajiła: „Material do šulow dawać je nětko wažne. Wšako změja wuknjacy z nim orientaciju za powołanje w serbskim konteksće.“