W Złym Komorowje je wona znata pod mjenom Hanka Mark – „w Serbach sym wězo Hanka Rjelcyna“, směje so z Pančic-Kukowa pochadźaca. Wot lěta 2009 skutkuje wona na Złokomorowskim Nowym jewišću, hdźež bě direktnje po studiju na Lipšćanskej wysokej šuli za hudźbu a dźiwadło „Felix Mendelssohn-Bartholdy“ angažement dóstała. „Tule so mi lubi“, młoda žona powěda, „kolegojo so ze zapalom a lubosću prócuja – nic jenož na jewišću, ale tež druhdźe, kaž na přikład w kantinje. Nowy intendant je někotre změny a nowe wěcy zawjedł. Mjezsobne dźěło je tuž jara přijomne, a to mje jara zwjesela.“ Ansambl 16 dźiwadźelnikow ma šěsć nowych hrajerjow, „wšitcy młódši hač ja“, zwěsća 31lětna. Jako praju, zo je wona tuž poprawom hižo stary zajac, Hanka Rjelcyna přispomnja, zo w kruchu „Romeo a Julia“ mjeztym mać hraje, a šibale dodawa: „Zo móžu nětko tež lóze žony hrać, je lěpšina staroby – činić, štož poprawom činić njesměš, to je jara fajn.“