Klětuši załožbowy etat wobzamknjeny

Drježdźany/Budyšin (SN/JaW). Direktor Załožby za serbski lud Marko Suchy je dale bjez naslědnika. Tež druhe koło pytanja za nowym načolnikom załožby je zwrěšćiło, kaž so wčera na nazymskim posedźenju rady Załožby za serbski lud w sakskim statnym ministerstwje justicy w Drježdźanach njewočakowano wujewi. Tróšku zludany dyrbješe předsyda załožboweje rady Jan Budar powěsć wo njewobsadźenju městna čakacym žurnalistam posrědkować.

Pjeć zajimcow bě so w druhim kole wo městno direktora prócowało. „Ze štyrjomi bě eksterna firma rozmołwy wjedła. Dweju je nam poručiła“, praji sobudźěłaćerka Załožby za serbski lud Michaela Mošowa. „Wobě wosobje smy na dźensniše posedźenje přeprosyli. Wobě pak stej z priwatnych přičin wotprajiłoj. Tele wuwiće je dźensniše posedźenje we wěstej měrje ke krizowemu wuradźowanju sčiniło, wšako dyrbjachmy rozmyslować, kak dale postupujemy“, rozłoži předsyda rady załožby. Dokładnišo pak so wón k cofnjenju požadanjow njewupraji.