Budyšin (UM/SN). Wo stawje a perspektiwach sakskeje azyloweje politiki rěčeše wčera wječor we wobłuku „Budyskich rozmołwow“ Sakski nutřkowny minister Markus Ulbig (CDU) w Budyskej ludowej bance. Wopytowarjo dožiwichu derje přihotowaneho ministra, kotryž njeda so tež wot přispomnjenjow njespokojnosće mylić a kotryž bu na kóncu wot wjetšiny přitomnych z přikleskom roz­žoh­nowany. Ulbig přizna, zo njebě w Sakskej – runja Němskej – w poslednich měsacach lěta 2015 wulkeho nawala ćěkancow dla žane porjadne přiwzaće móžne. „Mjeztym pak je so situacija normalizowała a zmylki w systemje so pokazuja“, Ulbig rozłoži. Sakska je mjeztym přijimarnje za 20 000 ludźi zarjadowała. Tuchwilu je 5 000 městnow wobsadźenych. W cyłym kraju wužiwaja hišće pjeć sportownjow. „Zaměr je, přijimarnje w Drježdźanach, Lipsku a Kamjenicy koncentrować.“ Požadarjo azyla bjez akty při Zwjazkowym zarjedźe za migraciju a ćěkancy (BAMF) a bjez perspektiwy na přebywanje hižo komunam njepřepodadźa. „Zwjazkowy zarjad wostanje dale rozsudny dypk systema. Tam dyrbja nuznje kapacity zwyšić“, podšmórny Ulbig.