Měšćanska rada so z namócnymi rozestajenjemi zaběrała
Budyšin (CK/SN). Hač do 4. oktobra budźe policija w Budyšinje sylnišo prezentna. Tole rjekny Zhorjelski policajski prezident Conny Stiehl na wčerawšim posedźenju Budyskeje měšćanskeje rady. Wón wobkrući to z centralnym swjedźenjom k Dnjej němskeje jednoty w Drježdźanach. Nimo toho maja naprawy pomhać, połoženje w sprjewinym měsće změrować. Po namócnych rozestajenjach na Žitnych wikach přepytuje policija kaženja krajneho měra dla do wšitkich směrow, Stiehl rjekny. „Prěni kamjeń pak běchu ćěkancy ćisnyli, wot nich je namóc wušła, wot někotrych“, wón podšmórny. Dohromady přepytuja w 90 jednanjach.