Załožba za serbski lud 25lětne wobstaće swjećiła
Choćebuz (SN/JaW). Samozrozumliwe wužiwanje hornjo- kaž delnjoserbšćiny w digitalnych medijach je jedyn z najwažnišich nadawkow našeho časa a přichoda. Tole zwěsći zapósłanc Sakskeho krajneho sejma a předsyda parlamentariskeje přirady Załožby za serbski lud Marko Šiman (CDU) w swojich postrownych słowach na swjatočnosći k 25lětnemu wobstaću załožby sobotu w Choćebuskim měšćanskim domje. „Čłonojo parlamentariskeje přirady budu tež přichodnje dźěło serbskich institucijow, towarstwow a załožby přewodźeć a podpěrać“, Šiman delnjoserbsce připowědźi. Wón bě so wědomje za „tu rěč rozsudźił, kotraž je najbóle wohrožena za přichodnu generaciju hižo dosć mocow njeměć“, za čož žněješe aplaws. Zdobom wón přitomnym přiwoła: „Dyrbimy wjac energije nałožić, zo bychmy njesměrnje ćežki a kruty wukon załožby ze wšědnym žiwjenjom w pěstowarnjach a na šulach zwjazali. Budźemy znowa rozmyslować dyrbjeć, hewak so tole njeporadźi.“