Zastupnicy FUEN w Europskim parlamenće w Strasbourgu

Strasbourg (SN/MkWj). Po wuzwolenju Antonija Tajanija za noweho prezidenta Europskeho parlamenta zawčerawšim, wutoru, su dźensa w Europskim parlamenće w elsaskim Strasbourgu naležnosće mjeńšin tematizowali. Federalistiska unija europskich narodnych mjeńšin (FUEN) bě za to naročny program spřihotowała. Serbow a słowjanske mjeńšiny zastupowaše předsyda Domowiny Dawid Statnik, woleny čłon Europskeho dialogoweho foruma. Dźěło FUEN, najwyšeho zastupnistwa awtochtonych narodnych mjeńšin, předstaji jeje prezident Loránt Vincze. Jeho běchu na lońšim kongresu FUEN we Wrócławju wuzwolili.

Europski dialogowy forum je zhromadny gremij FUEN a młodźinskeje organizacije narodnych mjeńšin MENS. Lěta 2008 załoženy forum wobsteji ze sydom zastupnikow FUEN a dweju zastupnikow MENS kaž tež wobeju prezidentow. Gremij prócuje so wo politiski dialog z Europskim parlamentom. Hłowny zaměr foruma je, zapósłancam parlamenta naležnosće europskich narodnych mjeńšin direktnje posrědkować a spřistupnić.