Braniborske kulturne ministerstwo projekt z Maśicu Serbskej zahajiło
Budyšin (SN/JaW). Społnomócnjeny braniborskeho knježerstwa za serbske naležnosće Tobias Dünow je minjeny pjatk nawječor prěni medijowy pakćik wo Serbach nawodnicy Złokomorowskeje měšćanskeje biblioteki Kerstin Bischoff přepodał. Tak zahaji wón zhromadny projekt ministerstwa a serbskeho wědomostneho towarstwa Maśica Serbska.
Cyłkownje 16 komunalnym knihownjam chce za Serbow přisłušne braniborske ministerstwo za wědomosć, slědźenje a kulturu (MWFK) pakćiki z wobšěrnymi informacijemi wo serbskim ludźe přewostajić, rěka w medijowej zdźělence ministerstwa. „Paket wopřijima nimo serbskeje literatury tež informacije wo serbskich stawiznach a kulturje kaž tež material k nawuknjenju rěče. Kulturne ministerstwo spěchuje předewzaće z 2 500 eurami“, rěka w zdźělence MWFK.
