Drježdźany (dpa/SN). Sakski zwjazk ratarjow starosći so połoženja plahowarjow swini w swobodnym staće dla. Jich straty su wjetše hač w cyłoněmskim přerězku, rjekny prezident zwjazka Torsten Krawczyk na wčerawšej nowinarskej konferency w Drježdźanach. Pola přerězneho němskeho swinjeća wučinja strata za ratarja 20 do 30 eurow, w Sakskej je to 50 do 80 eurow. „To móžeće sej derje předstajić, zo ratarjo praja: Přestanjemy“, Krawczyk wčera zwurazni. Generelnje wšak dale a mjenje swinjaceho mjasa produkuja. „Naprašowanje pak je so po wšej Europje dospołnje sypnyło.“ K tomu přińdu problemy korony a w Sakskej afriskeje swinjaceje mrětwy dla. Swinje z našeho regiona dyrbja k rězu do Schleswigsko-Holsteinskeje wozyć, dokelž maja jenož tam certifikowanu rězarnju za skoćata z kónčin swinjaceje mrětwy. Transportne kóšty su tuž wosebje wysoke a jězba za swinje stres. Torsten Krawczyk žada sej sakski program, kotryž plahowarjow swini podpěruje. Swinjaca mrětwa so w Sakskej dale rozšěrja. Mjeztym je wšón Zhorjelski wokrjes jako wohrožena kónčina zastopnjowany.