Impresije ze Šotiskeje: Wo zahinjenej tradiciji, pobrachowacym personalu a kasach bjez kasěrarki w supernakupowanišću(1)
Wulki pućnik na dalnodróze A83 je dwurěčny, w jendźelskej a geliskej rěči. Nimale tři kilometry jědźeš z awtom wot najwjetšeho jězora w Šotiskej Loch Lomond/Loch Laomainn do Arrochara/An t-Àrchar. Wjes leži idylisce na kóncu zaliwa Loch Long wosrjedź narodneho parka Loch Lomond a The Trossachs. Zapadnje Locha Longa wuzběhuja so Arrocharske alpy z krajiny. Beinn Ìme je z 1 011 metrami najwyši wjeršk. Ludźom w Arrocharje pak je 884 metrow wysoka hora Ben Arthur/ Beinn Artair bliša, kotrejž rěkaja „The Cobbler (Šewc)“. Hora wobsteji z třoch jednotliwych wjerškow a trónuje nad lěsami při mórskim jězoru Loch Long.
Z mjenom hory pyši so jenički pub wsy. Přetož hosćom so přez wulke wokno w „lounge“ wulkotny napohlad na wodu, lěs na pobrjoze a wězo na „The Cobbler“ skići. Zbožowni smědźa so turisća mjenować, kotřiž móža so, wotućiwši w swojim dowolowym kwartěrje, z tajkeho krasneho napohlada radować.
Puć je dołhi
