„Žiwa adwentna protyka“ we Wojerowskim starym měsće ludźi hižo dlěje hač 20 lět wokřewja. Priwatnu iniciatiwu Torsten Vogel organizuje. Wótcej protyki a diakonej je při tym wažny, zo so do tutych zarjadowanjow serbske tradicije zapřijeja. Zo w jeho žiłach serbska krej ćeče, na to je wón hordy. Silke Richter je so z Torstenom Vogelom rozmołwjała.

Što Wam wosobinsce serbski lud a jeho tradicije woznamjenjatej?

Bydlimy tu wosrjedź serbskeje sydlenskeje kónčiny. Sym w serbskich wsach ze serbskimi přećelemi zbožownje wotrostł. W mojich žiłach ćeče serbska krej. To je indirektna wotmołwa, kotraž pak jadro zwuraznja.

Nimo toho hódnoću zhromadne žiwjenje Serbow a Němcow přez lětstotki, najebać wšitke ćeže, kotrež běchu, jako poradźeny přikład za měrniwu zhromadnosć, w kotrejž je sej kóždy swoje wosebitosće wobchował. To njech je druhim ludam a regionam z přikładom.

Kotru rólu hrajachu serbske nałožki při „žiwej adwentnej protyce“ w zašłych lětach a kotry wuznam změja w přichodźe?