Skupina Holaski je w Serbach krute zapřijeće – wona steji za hudź­bnu wšelakorosć, wuběrnje produkowane spěwy a wosebje staj­nje dobru naladu na žurlach, hdźež wona zapiska. Holaski, to su Donatec bratřa z Chrósćic a Kito Mark jako bubnowar. Tež tuta wobsad­ka pak njewobsteji ze wšeho spočatka w tutej konstelaciji. Čłon skupiny, Józef Donat, powěda: „Na spočatku, to rěka w lěće 2019 wob­steješe naša wobsadka ze štyrjoch Donatec bratrow z Chrósćic. Na prěnich wustupach přewodźeše nas hišće přećel Roman Wjesela, ko­tryž tohorunja w Chrósćicach bydli. Pozdźišo potom so Kito Mark z Noweho Łusča přizamkny. Tuta wobsadka je hač do dźensnišeho tak wobstała.” A tuta wobsadka postara so wo tón abo tamny hit. Serbska młodźina drje sebi wosebje štučku „Wódny muž” jara česći. Tole zwěsći kapała tež potom, hdyž wobhlada sebi ličby streamow a klikow na spěw. Ale tež dwurěčna produkcija „Meine 13”, kotruž su hakle njedaw­no wozjewili, je pola publikuma derje připóznata, Józef Donat rozprawja.