Před 25 lětami nowy sakski Serbski zakoń w Budyšinje ratifikowany
Drježdźany/Budyšin (SN/at). Aktualny Serbski zakoń je Sakski krajny sejm před štwórć lětstotkom schwalił. 20. januara 1999 su zapósłancy frakcijow CDU, SPD a PDS zakonjej jednohłósnje přihłosowali. Dwaj měsacaj pozdźišo, 31. měrca, bu naslědnik prěnički z 23. měrca 1948 w Budyskim Serbskim muzeju ratifikowany a w němskej a serbskej wersiji wozjewjeny.
Ratifikacija zakonja zwonka krajneje stolicy Drježdźan je jónkrótnosć w stawiznach sakskeho parlamenta w zwjazkowej republice. Zakonjedawarski wukon hódnoći dr. Matthias Rößler (CDU), prezident Sakskeho krajneho sejma, jako „wupruwowanu kótwicu stability za škit serbskeho ludu a jeho kulturu“.
