Wólbny wuběrk je přihot zdokonjał – start ze swjedźenjom w Běłej Wodźe

Běła Woda (SN/mb). Naćisk za porjad přichodnych wólbow Serbskeho sejma je hotowy. To praji nam Tomaš Čornak, nawoda wólbneho wuběrka, kotryž je so wčera wječor zaso zešoł. Zapósłancy móža jón nětk we wokolnym wothłosowanju schwalić, doniž so wólby njedźelu, 12. meje, při Běłowodźanskej starej wodarni njezahaja. Wot tutoho dnja sem móža so zajimcy jako woler registrować dać a ludźo swoju kandidaturu zapodać. Dotalny časowy plan je wobkrućeny: Hač do 11. oktobra přijimuja kandidatury, wolerjo pak móža so hač do klětušeho 16. januara registrować dać.

Dalše terminy po puću wólbow: 18.10.2024 je dźeń wozjewjenja kandidaturow a započatk rozpósłanja podłožkow za listowe wólby. Hač do 23.1.2025 maja wólbne listy dochadźeć. Na dnju ptačeho kwasa, 25.1.2025, budźe zjawne wuličenje hłosow. Na zakładźe wuslědkow budźe so 2. Serbski sejm 8. februara 2025 konstituować.