Berlin (dpa/SN). Zwjazkowy kancler Olaf Scholz (SPD) je wójnske złóstnistwa ruskich wojakow přećiwo ciwilistam w měsće Buča zasudźił a nowe sankcije přećiwo Ruskej připowědźił. „Rozsudźimy w kruhu zwjazkarjow přichodne dny wo dalšich naprawach“, Scholz wčera wječor rjekny, bjez toho zo by nadrobnosće mjenował. Ruski prezident Wladimir Putin a toho podpěraćeljo pak změja skutkownosće naprawow začuwać. „A přewostajamy Ukrainje dale brónje, zo móhła so přećiwo ruskej inwaziji wobarać. Scholz wopisowaše sceny z městačka Buča, kotrež bě hač před někotrymi dnjemi hišće wot ruskich jednotkow wobsadźene, ze słowami: „Dróhi połne ćěłow, chwatnje pohrjebani morjeni.“ Wón potwjerdźi: „Morjenje ciwilistow je wójnske złóstnistwo. Tute złóstnistwa ruskich jednotkow dyrbimy ze wšej konsekwencu wotkryć.“ Mjeztym je ukrainske generalne statne rěčnistwo přepytowanja připowědźiło.
Kijew (B/SN). Po podaćach zarjadnistwa za etniske naležnosće a swobody swědomja w Kijewje je ruske wójsko dotal za čas wójny 59 domow nabožneho charaktera w Kijewje, Donjecku, Žytomyru, Zaporižžju, Luhansku, Sumy, Charkiwje und Černihiwje wobškodźiło abo dospołnje skóncowało. „W času, hdyž propagandisća Krjemla swoje zaměry cynisce jako ,škit ortodoksneje wěry‘ zamazaja, ruiněruja agresiwne nadpady ruskeho wójska ortodoksne cyrkwje a nabožne zetkanišća“, pisa mjenowane zarjadnistwo na swojej internetnej stronje.
Jako symbol zwjazanosće
Za skutkowanje Serbskeho sejma je čas nimo, w kotrymž móžachu so wobmjezowanjow korony dla jenož digitalnje schadźować. Prěnje prezencne posedźenje su sejmarki a sejmarjo sobotu w Trjebinje wotměli. Tam wopominachu z mjeńšinu mjelčenja woporow wójny Putinoweje Ruskeje w Ukrainje.
Budapest (dpa/SN). Prawicarsko-narodna strona Fidesz ministerskeho prezidenta Viktora Orbana je wólby parlamenta w Madźarskej dobyła. Po wuličenju nimale wšitkich wólbnych lokalow je Orban 54 procentow hłosow zdobył a móže tak dale z absolutnej wjetšinu knježić. Zwjazk opozicije „Madźarska w swobodźe“ je 35 procentow zdobył. Do parlamenta zaćahnyła je tež prawicarsko-radikalna strona „Naša domizna“. Němska mjeńšina ma za mjeńšiny postajeny mandat.
Vučić znowa w Serbiskej dobył
Běłohród (dpa/SN). W Serbiskej je amtěrowacy statny šef Aleksandar Vučić wólby prezidenta kaž wočakowane dobył. Po dotalnym stawje je wón při wčerawšich wólbach 59,8 procentow hłosow dóstał. Najsylniši přećiwny kandidat Zdravko Ponoš zdoby sej 17 procentow. Vučić móže tak druhu dobu zastojnstwa nastupić. Doskónčny wólbny wuslědk chcychu w běhu dźensnišeho wječora zdźělić.
Posudźuja naprawy klimy dla
Drježdźany (dpa/SN). Sakska chce ćeknjenym młodym Ukrainjanam dobre šulske kubłanje poskićić a spušća so při tym na pomoc maćernorěčnych wučerjow. Dotal su 599 dźěći a młodostnych do šulow zapokazali a 1 623 na njedawno aktiwizowanym internetnym portalu přizjewili. To je kultusowy minister Christian Piwarz (CDU) štwórtk w Drježdźanach zdźělił. Połoženje je wokomiknje pod kontrolu, „dyrbjeli-li ličby dale přiběrać, dyrbimy wěcy přestajić a snano tež bóle improwizować“, wón rjekny.
Najwjetši dźěl ukrainskich dźěći chodźi do w času ćěkanskeje krizy 2015/16 zarjadowanych přihotowanskich rjadownjow zakładnych a wyšich šulow, hdźež nawuknu němčinu jako druhu rěč a hdźež jich maćernorěčnje kubłuja – ze stron za to přistajenych wučerjow abo internetnje. W Drježdźanach a Lipsku planuja mjeztym ryzy ukrainske přihotowanske rjadownje, Piwarz rjekny. 45 dźěći a młodostnych z wuběrnym kubłanjom, kotřiž rěča jendźelsce, su do gymnazijow pósłali.
Wobrazy z ukrainskeho města Buča su surowy wjeršk eskalacije konflikta na wuchodźe Europy. Pjeć tydźenjow je w měsće blisko Kijewa ruske wójsko brutalnje zachadźało. Mjeztym je so ruske wójsko wróćo sćahnyło. Wčera wozjewjene wobrazy nas zatraša a zmotaja. Ćěła leža wosrjedź dróhow, bydlenja a domy su dospołnje zničene a swědcy wo surowych nadpadach a grawoćiwych přesahnjenjach rozprawjeja. A što čini Ruska? Tamniše knježerstwo ma wobrazy za inscenaciju Ukrainy. Zełžanosć Ruskeje nima hižo žaneje hranicy. Cynizm, kotryž so nadźijomnje pochłosta! Haj, wójna je stajnje surowa, při čimž wjele ludźi ćerpi a zemrěje. Dokumentacija wobrazow w Buči pak pokazaja ludomordarstwo a systematiski teror přećiwo ciwilnej towaršnosći. Ćim bóle měli nětko ze wšitkimi nam k dispoziciji stejacymi srědkami wo to wojować, zo so wójna w Ukrainje zakónči a zo so zamołwići pochłostaja.
Bianka Šeferowa
61lětny muž je so w sakskich šćěpjenskich centrumach na wšě 87 króć přećiwo koronawirusej šćěpić dał. Sobudźěłaćerjam Němskeho čerwjeneho křiža bě muž w jednym z Drježdźanskich šćěpjenskich centrumow napadnył. Policija je jeho mjeztym zajała. Muž bě so stajnje z nowym šćěpjenskim wupokazom přizjewił. Po šćěpjenju wón wonkownu stronu dokumenta ze swojim mjenom z nowej stronu wuměni a wupokaz předa.
15lětny młodostny je so w Posaarskej za wodźidło transportera sydnył a zhromadnje z towaršom k fastfood-hosćencej jěł. Takle zastaranaj podaštaj so na jězbu po awtodróze. Do toho pak młody muž druhemu šoferej napadny, jako jemu w jednosměrowej dróze napřećiwo přijědźe. Policija jeju zadźerža. Kak běštaj wobydlerjej domu socialneje pomocy ke klučikam transportera přišłoj, njewedźa.
Brüssel (dpa/SN). Wodźacy zastupnicy Europskeje unije su so dźensa z chinskim statnym a stronskim předsydu Xi Jinpingom na widejowym wjeršku zetkali. Prezidentka komisije EU Ursula von der Leyen, prezident Rady EU Charles Michel a wonkowny społnomócnjeny EU Josep Borrell chcychu Xija namołwjeć, ruski nadpad na Ukrainu zasudźić. China steji dotal po boku Ruskeje a dawa USA, EU a NATO winu na wudyrjenju krizy.
Brunicu tola dlěje wužiwać?
Berlin (dpa/SN) W tuchwilnej energijowej krizy je so generalny sekretar FDP Bijan Djir-Sarai za to wuprajił, dlěše wužiwanje brunicy pruwować. W koaliciskim zrěčenju drje steji, zo měło so skónčenje zmilinjenja brunicy w idealnym padźe hižo lěta 2030 radźić, rjekny Djir-Sarai Berlinskim nowinarjam. Sćěhi wójny w Ukrainje pak „idealnym rozrisanjam“ tuchwilu zadźěwaja. „Dyrbimy nuznje pruwować, hač budźemy dlěje na brunicu pokazani hač dotal planowane.“
Wjeršk infekcijow docpěty