Berlin (dpa/SN). Němski institut za čłowjeske prawa ma hladajo na wuwiće koronapandemije zakonske rjadowanje tak mjenowaneje triaže za nuznje trěbne. „Status šćěpjenja njesmě žanu rólu hrać“ w prašenju, štó dóstanje w padźe móžneho přećeženja strowotniskeho systema intensiwnolěkarske zastaranje a štó nic, potwjerdźi direktorka instituta Beate ­Rudolf wčera w Berlinje. Tež wosoba, kotraž so „njerozumnje abo njesolidarisce“ zadźerži, ma prawo na strowotu.

W swojej najnowšej lětnej rozprawje namołwja institut hladajo na móžne problemy w chorownjach: „Němska trjeba čłowjesko- a wustawoprawnisce wopodstatnjene zasady jako zakład rozsudow, komu lěkarjo najprjedy pomhaja. Tajke zakonske rjadowanje měło aspekty postajić, kotrež njesmědźa za wuzwolenje pacientow žanu rólu hrać, kaž su to hišće wočakowany čas žiwjenja, žiwjenska kwalita, wužitk za towaršnosć abo staroba. Zakonjedawar njemóže čakać, doniž Zwjazkowe wustawowe sudnistwo wo tym njerozsudźi. Tuchwilna praksa na intensiwnych stacijach starych a zbrašenych „diskriminuje“, kaž institut zwěsća.

Mnichow (dpa/SN). Awtomobilowy klub ADAC liči lětsa z něhdźe 2 500 smjertnymi woporami w nadróžnym wobchadźe. To by 8,1 procent mjenje mortwych było hač loni, kaž wobchadny klub wčera zdźěli. Při tym běchu hižo loni jasnje mjenje woporow zličili, štož ležeše na woteběracych nadróžnym wobchadźe koronapandemije dla. Lěta 2019 bě hišće 3 046 ludźi při wobchadnych njezbožach žiwjenje přisadźiło. Tež ličba zranjenych dale woteběra. ADAC wuchadźa z 309 000 w běhu nachilaceho so lěta. To bychu 6,4 procenty mjenje byli. Ličba wot policije registrowanych wobchadnych njezbožow wosta porno tomu na podobnym niwowje kaž minjene lěto.

Z papjercowym čołmom je 22lětny po Neckaru w Stuttgarće jěć chcył, a to naje­bać zymske wjedro jenož w kupanskich cholowach. Tak chcyše so na Youtube hordźić. Z papjercowych tyzow spasleny a z wotpadkowymi titami wobdaty spław je wón wčera do wody pušćił, w poslednim wokomiku pak nastroj radšo zaso wućahnył. Policisća běchu jeho doraznje powučili, „zo tajka jězba scyła žana dobra myslička njeje“.

Z wubědźowanja wo najrjeńšeho kamela w Sawdi-Arabskej su wjacorych wobdźělnikow wuzamknyli. Tući běchu zakazane srědki wužiwali, zo bychu zwěrjata „płaćiwym měritkam rjanosće“ wotpowědowali. Potrjechenych je 43 kamelow. Jim běchu wobsedźerjo botox šćěpili, zo by koža krućiša była. Wubědźowanje je lukratiwne: Dobyćerjej kiwa myto 58 ­milionow eurow.

Ewangelska krajna cyrkej Berlin-Braniborska-šleska Hornja Łužica minimalnu wulkosć wosadow postajiła a žněje rozdźělne reakcije

Njedawne wobzamknjenje krajneje synody Ewangelskeje cyrkwje Berlin-Braniborska-šleska Hornja Łužica (EKBO) wěriwych zaběra. Wona je 13. nowembra w Berlinje postajiła, zo ma kóždej wosadźe přichodnje na kóždy pad 300 ludźi přisłušeć. To je minimalna wulkosć. „Hłownje dźe wo to, zo wosady z mjenje hač 300 přisłušnikami swój status­ jako korporacija zjawneho prawa zhubja a maja so do wjetšich ­zhro­madźenstwow zjednoćić. Tak ličimy z mjenje dźěłom zarjad­niske naležnosće nastupajo a z mjenje kóštami“, EKBO zdźěli. Jedna ze schwalenych změnow je, zo móže konsistorij na na­mjet krajnocyrkwinskeje rady wu­wzaća přizwolić. Wjace hač 600 z něhdźe 1 100 wosadow, a to předewšěm w Braniborskej, je po­trjechenych. W cyrkwinskim wokrjesu šleska Hornja Łužica je jich 20 z 62 wo­sadow, we Wojerowskej kónčinje mjez druhim Čorny Chołmc, Lejno-Ptačecy (Geierswalde-Tätzschwitz) a Sprjejcy (Spreewitz).