Drježdźany (dpa/SN). Sakski krajny sejm je wčera epidemiske połoženje w swobodnym staće zwěsćił a tak prawniski zakład swójskich škitnych naprawow w koronapandemiji wutworił, wědźo, zo trjeba sobudźěło Zwjazka. Ministerski prezident Michael Kretschmer (CDU) chcył w tym zwisku tež nowy zakoń wo škiće před infekcijemi wočaknyć, na kotrymž nowa koalicija w Berlinje z wotmachom dźěła. Na žadanje opoziciskeje AfD dyrbjachu zapósłancy wosobinsce wothłosować. Hač na jeje zapósłancy hłosowachu wšitcy z „haj“.
Policija bě wurjadne posedźenje krajneho sejma ze stami policistow zawěsćiła a hermetisce zaraćiła. Přičina toho běchu namołwy w socialnych syćach, tež ekstremistiskich, před parlamentom protestować. Hač do kónca posedźenja pak wosta wšitko měrne.
W kostimach rumpodicha běchu wčera w Porynsko-Pfalcy zaso motorscy po puću, zo bychu pjenjezy za dom ćežko chorych dźěći zběrali. Mužojo a žony jědźechu 125 kilometrow po južnej Pfalcy hač do Speyera a rozdźělachu wjace hač 2 000 darow w šulach a pěstowarnjach, zo bychu na darjensku akciju skedźbnili. Loni su z njej 78 000 eurow nazběrali.
Drje najstaršu listowu znamku swěta chcychu dźensa w Londonskim awkciskim domje Sotheby’s přesadźować. Za „Penny Black“ z lěta 1840 lubja sej tam hač do šěsć milionow britiskich puntow (sydom milionow eurow). Znamka je „najwuznamniši objekt filatelistiskich stawiznow“, kaž rěka. Wobsedźer znamki, britiski předewzaćel, bě ju před dźesać lětami za mjenje hač 60 000 eurow kupił.
Vatikan (B/SN). Do swětoweho dnja zbrašenych 3. decembra je so bamž Franciskus w zjawnym lisće raznje přećiwo wuzamknjenju zbrašenych wuprajił. Tež cyrkej nima prawo, jich wot sakramentow wuzamknyć. Swjate pismo to wobkruća: „Swójska kiprosć njeje žadyn zadźěwk, z ewangelijom žiwy być a jón dale posrědkować.“ Kóždy křćeny čłowjek móže bjez wumjezowanja a diskriminacije rjec: „Ja sym cyrkej!“ To praji Awi Mello z vatikanskeho zarjada za lajkow, swójbu a žiwjenje. Mjezynarodny dźeń ludźi ze zbrašenjemi su Zjednoćene narody jako wopominanski a akciski dźeń wuzwolili, zo bychu so za dostojnosć, prawa a derjeměće zbrašenych zasadźeli.
Bamž namołwja k stražliwosći
Berlin/Drježdźany (dpa/SN). Wodźacy politikarjo su sakskej ministerce za strowotnistwo Petrje Köpping (SPD) swoju solidaritu wobkrućili a smólnicowy ćah něhdźe 30 ludźi před jeje domom minjeny pjatk w Grimmje zasudźili. Akciju wótrje kritizowali su mjez druhim předsyda SPD Norbert Walter-Borjans, zwjazkowy nutřkowny minister Horst Seehofer (CSU) a sakski ministerski prezident Michael Kretschmer (CDU). Seehofer rěčeše wo „organizowanym zatrašenju“.
Hotuja so na demonstraciju
Drježdźany (dpa/SN). Sakski krajny sejm chcyše dźensa popołdnju wo móžnym podlěšenju epidemiskeho połoženja w swobodnym staće rozsudźić. Hłowna přičina je dramatiske połoženje koronapandemije dla. Minjeny pjatk bě Roberta Kochowy institut za Saksku sydomdnjowsku incidencu 1 224 na 100 000 wobydlerjow zwěsćił. Policija hotowaše so z wodomjetakami na wulku demonstraciju přećiwnikow naprawow koronawirusa dla před krajnym sejmom.
Wjace bróni předawali
Berlin (dpa/SN). FDP je z SPD a Zelenymi wujednanemu koaliciskemu zrěčenju z wjetšinu přihłosowała. Na wčerawšim digitalnym zjězdźe hłosowaše 535 delegatow z „haj“ a 37 z „ně“. Wosmjo so hłosa wzdachu. Po ličenju FDP wotpowěduje to 92,24 procentam přihłosowanja. Sobotu bě zjězd SPD zrěčenje z wjace hač 98 procentami přiwzał. Wuslědk wothłosowanja čłonow Zelenych wočakowachu dźensa popołdnju.
Wjednistwo FDP bě naležnje za 177 stron wopřijace zrěčenje a za planowanu amplowu koaliciju wabiło. „Sym přeswědčeny: Tutón kraj změje z koaliciskeho zrěčenja swoje lěpšiny, nowy rozmach je móžny“, rjekny předsyda Christian Lindner, nowy financny minister.
Moskwa/Washington (dpa/SN). Wosrjedź nowych napjatosćow w konflikće Ukrainy dla chcetaj ruski prezident Wladimir Putin a prezident USA Joe Biden jutře mjez sobu rěčeć. Internetny wjeršk su mjeztym w Krjemlu runje tak wobkrućili kaž w Běłym domje. Europska unija je Ukrainje wčera swoju podpěru přilubiła. Ruski wonkowny minister Sergej Lawrow porno tomu Němsku a Francosku namołwja w konflikće wjace wliwa wukonjeć. Putin a Biden staj připowědźiłoj, zo chcetaj konflikt na Ukrainje rozjimać.
Amerika a Ruska sej mjez sobu přihot wojerskeho zasahnjenja wumjetujetej. Stajnje zaso jewja so rozprawy wo pozdatnych planach Ruskeje, Ukrainu nadpadnyć. „Ofensiwa“ móhła so spočatk přichodneho lěta zahajić, kaž nowiny USA rozprawjeja.
Ruske wonkowne ministerstwo USA wumjetuje, zo chcedźa z „wurjadnej akciju“ połoženje na Ukrainje dale přiwótřić a zamołwitosć za to Ruskej přisunyć. Berlin a Paris njejstej dotal swojej zamołwitosći posrědkowanja wotpowědowałoj.
Žitawa/Zhorjelc (dpa/SN). Wobydlerjo Žitawy su znjeměrnjeni: Stajnje zaso jewi so mjeno města w třikrajowym róžku k Pólskej a Čěskej w policajskich rozprawach nastupajo padustwa a zadobywanja do bydlenjow. W socialnych syćach naležnje wo tym diskutuja, nic bjez přičiny. Po kriminalnej statistice je jeničce ličba kradnjenych jězdźidłow wot lěta 2019 do 2020 wo 76 procentow rozrostła.
Tež Žitawski wyši měšćanosta Thomas Zenker (njestronjan) ličby znaje. Hižo nalěto žadaše sej wón po wozjewjenju policajskeje statistiki wot sakskeho nutřkowneho ministerstwa wotpowědne naprawy. Wón so za to zasadźa, jednanje k instalaciji stražnych kamerow na najwažnišich čarach w Žitawskej kónčinje pospěšić. Srědki za to měli w etaće kraja zaplanowane być. „Smy w pomjeznym regionje. Tu je kriminalita wjetša hač wosrjedź kraja. Wjesnjanosća w hórskich kónčinach su runje tak alarmowani kaž předewzaćeljo“, wón wuzběhnje.
Swojimaj wočomaj wěrić nochcyše wobsedźer pensije w juhozapadopfalcskim Hinterweidenthalu: W jednym z jeho łožow ležeše jemu cuzy muž – a to hišće dospołnje nahi. 65lětny „njeprošeny hósć“ bě so wčera do pensije zadobył, so wuslěkał a so do łoža lehnył. Policija přepytuje nětko ranjenja domjaceho měra dla. Kóšty za přidatne rjedźenje wšak je muž hnydom zapłaćił, kaž rěkaše.
Z bombu hrozył je 16lětny powołanskej šuli w sewjerorynsko-westfalskim Hammje, zo móhła so 21lětna šulerka kubłanišća nachwatanskej klawsurje wuwinyć. Młoda žona bě w interneće wo tajki telefonat prosyła. 16lětny drje chcyše jej swoju zmužitosć dopokazać a je w šuli zazwonił. Pozdźišo so młodostny sam pola policije přizjewi a njeskutk přizna. Policija přepytuje nětko přećiwo woběmaj kaženja zjawneho měra a hroženja dla.