Choćebuz (UL/SN). Foyer Choćebuskeho dźiwadła Piccolo bě połnje wobsadźeny, jako su wiolinistka Priscila Baggio Simeoni, gitarist Dan Baron, dujer Karl Berkel a spěwarka Lena Hauptmann předwčerawšim 47. Choćebusku hudźbnu nazymu zahajili. Program wopřiješe nimo twórbow z Južneje Ameriki, Francoskeje a Nowoseelandskeje tež wulět do hudźbnych stawiznow Němskeje demokratiskeje republiki, a to z titulom skupiny Karussell „Wie ein Fischlein unterm Eis“. Zazběh pak tworješe štučka z Łužicy: Dan Baron a Lena Hauptmann prezentowaštaj swoju loni z Němskim popowym a rockowym mytom wuznamjenjenu kompoziciju „Tysac cowanjow“, w stilu bossa nova spisany spěw z delnjoserbskim tekstom. Wuměłcaj běštaj pod hesłom „Serbski jazz“ projekt iniciěrowałoj, z kotrymž chcetaj w tymle žanru „ze swójskimi wjeršemi a zynkami nowe akcenty sadźeć“.
Sobotu a njedźelu, 28. a 29. požnjenca před 75 lětami, schadźowaše so wjace hač 4 000 serbskich młodostnych a dalšich Domowinjanow w Radworju na prěnim zetkanju čłonow dźěłowych brigadow a Serbow po wójnje docyła. W lěću 1946 běchu so w serbskich wsach Kamjenskeho a Budyskeho wokrjesa wjesne jednotki Serbskeje młodźiny jako wobstatk narodneje organizacije Domowiny załožili, kotrež młodźinski sekretar třěšneho zwjazka Jurij Brězan jako předsyda cyłkownje nawjedowaše.
Domowinske dźěłowe brigady z Radworja, Šunowa a Pančic-Kukowa zahajichu njedźelu, 7. pražnika 1946, „Akciju Koslow“, z kotrejž su w dobrowólnym dźěle pomhali zakłady za nowotwar w poslednich dnjach wójny zničeneje wsy wotstronić. W přichodnych tydźenjach su tež brigady Serbskeje młodźiny z Jaseńcy, Dobrošic, Konjec, Budyšina a Baćonja a sydom dalšich brigadow zničene abo wobškodźene statoki zaso natwarili abo zwuporjedźeli. Koslowčenjo njech při swojim nowym wopomnišću sylnišo na to mysla!
Znowa su so čłonojo kulturneho konwenta Hornja Łužica-Delnja Šleska minjeny pjatk w Budyskim Kamjentnym domje schadźowali. Hłowny dypk dnjoweho porjada bě wobzamknjenje klětušeho etata.
Serbske Nowiny su dale w předsydstwje Europskeho zjednoćenstwa nowin w mjeńšinowych a regionalnych rěčach (MIDAS) zastupjene.
Triest (SN/JaW). Edita Slezáková wostanje prezidentka MIDAS. Zastupnicy čłonskich mjeńšinowych dźenikow su ju pjatk popołdnju na hłownej zhromadźiznje w italskim Triesće na dalše štyri lěta w zastojnstwje wobkrućili. Slezáková připowědźi, zo „je to poslednja doba jako prezidentka za mnje“, a namołwi, „prezidentstwo dyrbi do młodych rukow“. Dale wobkrućichu čłonojo MIDAS nimo dr. Tonija Ebenera – šefredaktora němskeho dźenika w Južnym Tirolu Dolomiten –, Bojana Brezigara – zastupnika słowjenskeho dźenika w Italskej Primorski Dnevnik –, Martxela Otamendija – šefredaktora baskiskeho dźenika w Španiskej Berria –, Bence Balásza – šefredaktora madźarskeho dźenika w Rumunskej Szabadság tež šefredaktora Serbskich Nowin Janeka Wowčerja jako čłona předsydstwa.
Hišće hač do njedźele wuhódnoćeja zastupnicy a zastupniče čłonskich medijow Europskeho zjednoćenstwa nowin w mjeńšinowych a regionalnych rěčach MIDAS w italskim Triesće koronapandemiju a jeje wuskutki.
Triest (SN/JaW). Nazhonjenja, kotrež su čłonojo Europskeho zjednoćenstwa nowin w mjeńšinowych a regionalnych rěčach MIDAS w běhu mjeztym połdra lěta trajaceje koronapandemije nazběrali, stejachu dźensa dopołdnja na MIDAS-konferency w Triesčanskim „Narodnim domje“ w srjedźišću. Po lěće přestawki korony dla wuhotuje prezencne zetkanje tónraz słowjenski dźenik w Italskej Primorski Dnevnik a dźensa rano witaše šefredaktor nowiny Igor Devetak přitomnych mjez druhim tež serbsce.