Njedawno je Rolf Backemeier z Kulowa kóždemu dorostowemu trenarjej Sokoła Ralbicy/Hórki nowy treningowy pulo­wer přepodał. „Jako hladar staršich a chorych čłowjekow kóždy dźeń sam wulku dźakownosć nazhonjam, hdyž jim ze swojim zawodom pomham wšědny dźeń tak derje kaž móžno samostatnje zmištrować. Z dźakownosću tuž rady­ tež čestnohamtskich trenarjow Sokoła z treningowym pulowrom wobdarju“, Rolf Backemeier swój rozsud wopodstatni. Nimo toho přepoda wón młodym koparjam delanskeho sportoweho towarstwa hišće sak z nowymi bulemi. Nazwučowarjo Sokoła so darićelej za nowu drastu wutrobnje dźakuja. Štó w Ralbicach scyła młode koparki a młodych koparjow trenuje, předstaji wam juniorski nawoda Jurij­ Bjeńš.

Maćij Möller

... je swoju druhu sezonu mjeztym nazwučowar młodźiny C, kotraž ma hrajne zjednoćenstwo z SJ Chrósćicy. Šunowčan ma za mjenowanu starobnu klasu wo­sebitu ručku. Wšako je hłownopowo­łansce wučer na wyšej šuli. Sam bě wón tohorunja kopar juniorow pola Sokoła.

René Zynda

Medaljowy špihel

Staw po 26 ze 109 rozsudow:

   z s b

1. Chinska   3 2 0

2. Šwedska   3 0 1

3. ROC   2 3 3

4. Awstriska   2 3 2

5. Nižozemska   2 2 1

6. Słowjenska   2 1 2

7. Němska   2 1 0

8. Norwegska   2 0 4

9. Francoska   1 4 0

10. Italska   1 3 1

Peking (JBo/SN). Denise Herrmann z Oberwiesenthala je olympiska dobyćerka w biatlonje na distancy 15 ki­lometrow. Z wu­běrnym wukonom a po jenož jednym chłostanskim kole zawěsći sej wona zdobom druhu złotu medalju za Němsku při lětušich Olympiskich zymskich hrach. Dalša němska wubědźowarka w biatlonje, Vanessa Voigt, bě medaljowe městno jenož snadnje zapasła, wona bu na kóncu štwórta.

Mjenje zwjeselace powěsće za Němsku běchu z miksoweho sněhakowarskeho skakanja wušli. Tam su Katharinu ­Althaus sportoweho wobleka dla, kotryž njewotpowědowaše regulam, diskwalifikowali. Z tym běchu wšě nadźije němskeho skakanskeho mustwa na medalju zhubjene. Tež tři dalše mustwa běchu wot tutoho dóńta potrjechene. Na kóncu dobychu sobufaworića ze Słowjenskeje.

Chróšćenjo 5. ptačokwasny wolejbulowy turněr w Kulowje dobyli

Prěni wólnočasny wolejbulowy turněr serije „top-šěsć“ 2022 w Kulowje dobychu sportowcy SJ Chrósćicy před wučerjemi Serbskeho gymnazija Budyšin (SGB) a prěnim zastupnistwom Žołto-módrych Kulow.

Předsyda sportoweje jednotki Žołto-módri Kulow Roland Stiebitz witaše minjenu póndźelu štyri wolejbulowe wólnočasne mustwa na 5. ptačokwasny turněr w tamnišej sportowni. Poslednje tajke wubědźowanje wotmě so před lětomaj, a to na samsnym městnje. Tak běchu wšitcy přitomni wjesołe, pod wuměnjenjemi 2G+ při wysokim saku sportować móc. Škoda, zo njemóžachu so wólnočasni wolejbulisća Viktorije Worklecy, mustwo 12/96 a ST 1922 Radwor, na turněrje wobdźělić. Tak wuhrachu jenož štyri cyłki, po modusu kóždy přećiwo kóždemu, dwě sadźbje do 15 dypkow swojeho dobyćerja.