Wón hraje a hraje a hraje ... a budźe zawěsće hišće chwilu hrać: Jaromír Jágr. Čěska lodohokejowa iko­na­ swjeći 15. februara 50. narodniny. Jako mějićel lodohokejoweho kluba w Kladnje pak njesedźi wón při hrach we VIP-wotdźělu stadiona, zo by tam šampanske laptajo swojich hrajerjow pohonjował a sej hdys a hdys čěski chlebíček słodźeć dał: Šef so při kóždej hrě wosobinsce sobu wo to prócuje, zo by jeho mustwo dobyło. Čini to na lodźe jako nadběhowar – jako nimale połstalětny. Zo njeje žiwjenje profesionelneho sportowca žane mědlizanje, wo tym nje­trjebam tu pisać. A zo ći po telko lětach – Jágr debitowaše jako 16lětny 1988 w prěnim mu­stwje za Kladno – dračina na lodźe lóša njeje, je tež jasne. Najwuspěšniši čěski nadběhowar wšěch časow dźě běše přeco za to znaty, zo njeje sej při wšěch dobyćach a triumfach nihdy přestawku popřał abo trening na lochkej ramjeni brał.

Ptačokwasny turněr

Sportowe towarstwo Žołto-módri Kulow přewjedźe 31. januara we wulkej sportowej hali „Ptačokwasny“ wolejbulowy turněr za wólnočasne mustwa. Hala budźe tón dźeń wot 19 hodź. přistupna, hry so poł hodźiny pozdźišo započnu. Hač do 24. januara smědźa so mustwa pola předsydy Rolanda Stiebitza přizjewić. W Kulowskej sportowej hali je přistup po prawidle 2Gplus dowoleny.

Štyri terminy steja

Tež lětsa chcedźa jěcharki a jěcharjo Kulow­skeho jěchanskeho towarstwa dwaj turněraj přewjesć: 24. apryla t. mj. start do zeleneje sezony a wot 24. do 26. junija wulki jěchanski a skakanski turněr. W Hór­kach přewjedźe jěchanske towarstwo při Klóšterskej wodźe Pančicy-Kukow wot 11. do 12. junija 5. jězdny turněr a wot 17. do 18. septembra 29. jěchanski turněr.

Liški dźensa doma hraja

Dowolene přihladowarske městna w liščej­ jamje w Běłej Wodźe dosahaja tež dźensa jeno za wobsedźerjow trajnych lisćikow a za sponsorow. Dnjowe kartki žane předawane njebudu.

21.01. 19:30 Łužiske liški –

  EC Kassel Huskies

23.01. 18:30 Heilbronnske sokoły –

  Łužiske liški

Pytaja koparja lěta

Kónc lěta 2021 dósta předsydstwo FC Ener­­gije Choćebuz přizwolenje, zo smě třěchu zapadneje tribuny stadiona kaž tež sportoweje hale, kotraž steji na arealu stadiona, saněrować. Minjeny tydźeń su tam nětko dźěłać započeli. Najprjedy zaró­štuja zapadnu tribunu, čehoždla móže při přichodnych hrach Energije k mjeńšim wobmjezowanjam dóńć. Planowanski běrow Daubitz a Moldenhauer, firmy IK-twar,­ třěchitwar Böhm, třěchikryjer Mäksch a jednaćel FCE André­ Schilbach zetkachu so minjeny štwórtk, zo bychu wo dalšim wotběhu wuradźowali.

Saněrowanski projekt bě jenož móžny, dokelž braniborske ministerstwo za kubłanje, młodźinu a sport jón financielnje podpěruje. Něhdyši Choćebuski wyši mě­šćanosta Frank Szymanski je so wosebje za spěchowanje zasadźał. Jemu kaž tež městu samomu a wokrjesej Sprjewja-Nysa słuša wulki dźak.

Mustwo a zamołwići regionalneho kopar­skeho ligista FC Energije Cho­ćebuz­ su so minjeny tydźeń zaso na sportnišću zetkali a trenować započeli. Do za­zběha treninga je šeftrenar Claus-Dieter Wollitz na prašenja sportoweho reportera Georga Zielonkowskeho wotmołwił.

Pandemija po cyłym swěće dale knježi. Su so pola koparskeho mustwa FC Ener­gije wšitcy strowi z dowola wróćili?

C.-D. Wollitz: Mustwo je nimale kompletne. Dwaj hrajerjej staj hišće doma w karantenje, a krótko do prěnjeho treninga bu jedna wosoba z funkciskeho teama pozitiwnje na koronu testowana. Nětko sej přejemy, zo wostanjemy wšitcy „rjenje negatiwni“, a zo móžemy so woměrje na start kónc januara přihotować.

W poslednich tydźenjach lěta 2021 bě ka­der­ chětro wobmjezowany, dokelž bě tójšto koparjow zranjenych. Su Wam nětko zaso dalši k dispoziciji?