Wolejbul je tež w Serbach dale a woblubowaniša sportowa družina. Nimo wólnočasneho wolejbula mamy někotre aktiwne serbske wolejbulowe mustwa, kotrež w dypkowych hrach pilnje wo dypki při wysokim saku a wo dobre zaměstnjenje w tabulce wojuja. Zo by so to poradźiło, specializuja a wukmanjeja so jednotliwi hrajerjo na wěste pozicije. Dźensa předstajamy tule poziciju libera.
Woni noša hinaši barbny trikot a zaběraja woprawdźe specielnu poziciju. Hrajerki a hrajerjo na poziciji libera su ryzy specialisća, štož nastupa přiwzaće bula a škita. Woni su eksperća za přiwzaće a pólny škit a hraja jenož na zadnich pozicijach 1, 6 a 5. Hrajne zjednoćenstwo Pančicy-Worklecy hraje we wobwodnej lize z dwěmaj liberomaj. Stej to Nicole Steglichowa a Tereza Wićazowa. W muskim mustwje Worklečanskeje Viktorije je to rodźeny Pěskečan Daniel Wałda.
ESV Kaufbeuren – Łužiske liški Běła Woda 5:2 (2:1, 1:1, 2:0)
Nachwatansku hru minjeny štwórtk wječor Łužiske lodohokejowe liški w Kaufbeurenje cyle zasłužbnje přěhrachu. Z móhłrjec „starym systemom – jeno słabšo“ wone přez cyłe 60 mjeńšin wustupowachu. Bilanca třělwow na wrota poprawom hižo wšitko wo hrě přeradźa: 50:19 za domjacych. Dźakowano wrotarjej Mac Carruthej podležachu Liški jenož 2:5.
Hra bě runje hakle zahwizdana, to hosćićel tež hižo nawjedowaše. Po njedorozumjenju w škiće Běłowodźanow docpě hrajer z Finskeje Sami Blomquist prěnje wrota za Kaufbeuren. Hladajo na kopicu dalšich móžnosćow w slědowacych mjeńšinach bychu domjacy nawjedowanje tež spěšnišo wutwarić móhli. W 9. min. steješe Blomquist znowa na prawym městnje a k 2:0 přetwori. Nětko skónčnje hosćo wotućichu a sej někotre šansy wuhrachu. Sekundy do prěnjeje sireny poradźichu so jim samo wrota přez Ludwiga Nirschla. To bě w tym wokomiku překwapjace.
Jenož jedyn dźeń po poražce w Kaufbeurenje podachu so Łužiske liški do Bad Tölza na dalšu hru. Na zbožo stej Kaufbeuren a Bad Tölz južnje Mnichowa jenož połdra hodźiny wot so zdalenej. Tak móžachu sej hrajerjo z Běłeje Wody jednu dołhu wonkownu jězbu zalutować. Na hrajnym stilu so w přirunowanju z poražku dźeń do toho přewjele změniło njeje. Eklatantne zmylki w škiće wjedźechu k tomu, zo ležachu Liški w běhu partije z 0:1, 1:3 a 2:4 w zastatku. Tola energiske wustupowanje w ofensiwje a wulka wola, tutón duel woprawdźe hišće dobyć chcyć, běštej garant za wuspěch wuchodnych Saksow. Nimo toho trenar Chris Straube ofensiwne kaž tež defensiwne rynki chětro přestaji a tak bě w kóždej fazy hry kwalitnje jara wurunane mustwo na lodźe.
Kulow – helaw, WCV – helaw, Nowa Wjeska – helaw!
Předstajće sebi, je róžowa póndźela, a w Kulowje njeje ani jeničkeho swjedźenskeho woza ani jeničkeje póstniskeje skupiny ani jeničkeho přihladowarja – ně, to poprawom njeńdźe, ale dźensa tomu tak bě. Hózk 2021 woła spočatk septembra ,,ekstremnych sportowcow“ na wubědźowanje. Hač drje by so tón abo tamny w póstniskim ćahu tež lětsa do kotoła sydnył a so po měsće wjezć dał? K tomu słuša při tuchwilnych temperaturach wulka zmužitosć, runje tak, hdyž so na čaru w Hózku podaš a sebi předewzaš sobu mjez prěnimi być – respekt!
31. hrajny dźeń Němskeje lodohokejowe ligi DEL2
Tölzske lawy – Łužiske liški 4:5
Ravensburg – EC Kassel Huskies 3:5
ESV Kaufbeuren – LP Crimmitschau 5:4
LL Drježdźany – EC Bad Nauheim 4:3
EV Landshut – Sokoły Heilbronn 2:3
Bietigheim Steelers – Lawy Frankfurt 5:0
Bayreuth Tigers – EHC Freiburg 3:6
32. hrajny dźeń DEL2
EC Kassel Huskies – LL Drježdźany 4:2
EHC Freiburg – ESV Kaufbeuren 3:2
EC Bad Nauheim – EV Landshut 2:1
Łužiske liški – Bietigheim Steelers 3:6
LP Crimmitschau – Tölzske lawy 4:2
Lawy Frankfurt – Ravensburg 7:1
Sokoły Heilbronn – Bayreuth Tigers 4:7
1. EC Kassel Huskies 30 69 120:63
2. Bietigheim Steelers31 54 116:101
3. Tölzske lawy29 52 117:85
4. EHC Freiburg 30 49 105:92
5. LP Crimmitschau 31 49 106:106
6. Lawy Frankfurt 27 48 85:76
7. Ravensb. Towerstars31 46 96:97
8. ESV Kaufbeuren 30 43 106:108
9. EC Bad Nauheim 28 39 81:105
10. Bayreuth Tigers 31 38 99:117
11. EV Landshut 30 37 94:107
12. LL Drježdźany 31 37 78:105
13. Łužiske liški 31 36 81:107
14. Sokoły Heilbronn 28 30 93:108
Naprašnik UEFA wupjelnić
Europski koparski zwjazk UEFA je so na Němski, Sakski a z tym tež Zapado- a Hornjołužiski koparski zwjazk wobroćił a za naprašowanje wabił. Dźe wo čestnohamtske dźěło. Prašenja a wotmołwy, w tym padźe tež serbskich funkcionarow, trenarjow, koparkow a koparjow, móhli k tomu dopomhać, zo so čestnohamtske dźěło skruća. W tym zwisku raz gigantiska ličba: amaterska kopańca bě towaršnosći do pandemije 13 mrd. eurow wob lěto hódna. Wzmiće sej dźesać mjeńšin chwile a dźiće na internetowe strony Sakskeho koparskeho zwjazka.
Kubłanske poskitki
Sakski koparski zwjazk (SFV) je na swoje internetowe strony www.sfv-online.de wobšěrne kubłanske poskitki stajił, kiž maja so w přichodnych měsacach online abo, jeli to pandemija dowola, na městnje přewjesć. Sćěhowace terminy su za online-dalekubłanje „Zdobyće čestnohamtskich za koparske towarstwa“.
25.05.2021 18.00–19.30 hodź.
02.06.2021 18.00–19.30 hodź.
17.06.2021 18.00–19.30 hodź.
A tu hišće někotre wupytane dalekubłanja sportowych zwjazkow:
10.03. Dostojnstwo wuhotować – we Wojerecach abo online (Wokrjesny sportowy zwjazk Budyšin, referent Harald Skopi)
Pokljuka. Němska měšana stafla je wčera k zazběhej swětowych mišterstwow (WM) w biatlonje w Słowjenskej hórku poražku dožiwiła a nadźiju na medalju jasnje zapasnyła. Erik Lesser, Arnd Peiffer, Denise Herrmann a Franziska Preuß dyrbjachu so po 4 króć 7,5 kilometrow ze sedmym městnom spokojić. Norwegčenjo zakitowachu swój titul suwerenje před překwapjenku Awstriskej a sobufaworitom Šwedskej. Čěska štyrka Ondřej Moravec, Michal Krčmář, Markéta Davidová a Lucka Charvátová wobsadźi jědnate městno.
Wuslědki – měšana stafla – 10.02.2021
1. Norwegska 1:20:19,3
2. Awstriska + 27,0
3. Šwedska + 30,6
4. Ukraina + 31,1
5. Francoska + 46,2
6. Italska + 58,9
7. Němska + 1:04,9
8. Kanada + 2:06,0
9. Ruska + 2:11,4
10. Šwicarska + 2:38,5
11. Čěska + 3:00,0
12. USA + 3:24,8
13. Finska + 3:35,1
14. Běłoruska + 4:00,9
15. Bołharska + 4:07,2
16. Słowjenska + 4:37,9
17. Litawska + 5:01,0
18. Słowakska + 5:06,1
19. Estiska + 5:06,3
20. Japanska + 5:22,6
21. Belgiska + 6:31,1
22. Moldawska + 6:40,4
23. Letiska + 6:46,1
24. Pólska + 6:47,0
Rumunska přesćehnjeni
Južna Koreja přesćehnjeni
Kazachstan přesćehnjeni
Prěni raz mužojo započeli
Z dweju metrow a 37 centimetrow zdalenosće tři kłoki zasobu do w přeměru 34 centimetrowskeje dartoweje tačele ćisnyć, njeje přećežko. Při tym pak móličke pola z wěstymi hódnotami trjechić, hižo bóle. Přeco wjace Serbow pak tole dźeń a lěpje zamóže – na přikład tež Jakub Wjacławk z Wotrowa. Jurij Bjeńš je so z 20lětnym rozmołwjał.
Jakubje, wot hdy so za sportowu družinu darts horiš?
J. Wjacławk: Prěni kontakt z dartom mějach w lěće 2015. To wotměchu so kaž kóžde lěto Swětowe mišterstwa w tak mjenowanym Ally Pallyju w Londonje. Tón zwisk mjez sportom a party mje tak fascinowaše, nic pak jenož mje, ale cyłu Wotrowsku młodźinu. Wot toho časa hraješe dart w našim klubje stajnje wulku rólu.
Ty pak njejsy jenož w klubje abo doma hrał, ale samo kročel dale šoł, trjechi?
J. Wjacławk: Haj, hdyž chceš so přeco bóle polěpšować, dyrbiš so wězo towarstwu přizamknyć. Wot 2017 sym nětko čłon Kamjenčanskeho dartoweho towarstwa.
Maće w towarstwje potom tež stajnje trening?
Wolejbul je mjeztym tež w Serbach woblubowana sportowa družina. Nimo wólnočasneho wolejbula mamy tež někotre aktiwne serbske wolejbulowe mustwa, kiž při dypkowych hrach pilnje wo dypki při wysokim saku a dobre zaměstnjenje w tabuli wojuja. Zo by so to prawje poradźiło, specializuja a wukmanjeja so jednotliwe hrajerki a jednotliwi hrajerjo na wěste hrajne pozicije. Dźensa předstaji so pozicija diagonalneje nadběhowarki/diagonalneho nadběhowarja.
W prěnim wolejbulowym mustwje Hrajneho zjednoćenstwa Pančicy-Worklecy, kotrež hraje we wobwodnej lize žonow stafle 2 wuchodneje Sakskeje, su to Jana Kralec (wokomiknje w maćernym dowolu), Anita Salowskec, Julia Brězanowa a Anne Kurzetz. Z Markom Brězanom, Maksom Jurakom, Stefanom Wjenku a Paulom Hančikom ma prěnje mustwo Sportoweho towarstwa Viktorije Worklecy hnydom štyrjoch nadběhowarjow na tutej poziciji (Serbske Nowiny hižo wo tym rozprawjachu).