Darowanska akcija „Darujće pisaki” je so wuspěšnje zakónčiła. Na spočatku noweho šulskeho lěta smy pakćik z pisakami wotpósłali. Dohromady su so pjeć kilogramow pisanskeho gratu, lineale, drapaki, barbjenčki, wołojniki, kónčkowaki a nožicy
nahromadźili. Pakćik smy nětko towarstwu „Stifte stiften” přewostajili. Towarstwo sćele jón potom dale do Afriki abo nětko tež do Ukrainy, hdźež so potrěbnym dźěćom dari.
Skupina šulerjow 7. lětnika Serbskeje wyšeje šule Worklecy „Michał Hórnik“ je z połnym elanom a wjeselom na projekće dźěłała.
Wutrobny dźak wuprajamy wšitkim darićelam, šulerjam, staršim, wučerjam, wowkam
a dźědam kaž tež dalšim, kotřiž su našu akciju sobu podpěrali.
Skupina 7. lětnika Worklečanskeje wyšeje šule | Foto: Tobias Bulank
Swjaty Měrćin, swjaty Měrćin, swjaty Měrćin jěcha na konju a kruće dźerži wotežku“ spěwachu dźěći serbskeho katolskeho domu „Alojs Andricki“ w Radworju
11. nowembra samo dwójce. Wy so snano prašeće, čehodla dwaj razaj? Haj, to chcu wam přeradźić. Hižo do mjenowaneho dnja započachu dźěći so na tutón nałožk přihotować. Paslichu cyle pilnje rjane a wšelake latarnički. Na dnju
Zawěsće sće tež wy dźensa tydźenja z lampionkami po wsach
a městach nóžkowali a swjateho Měrćina spominali. Dźeń do
toho su so dźěći ze swojimi staršimi Budyskeje pěstowarnje „Jan
Radyserb-Wjela“ zetkali a zhromadnje wuměnkarjow w starowni
Budyskeje diakonije „Paul Gerhard“ zawjeselili. Tak zaspěwachu znaty spěw wo swj. Měrćinje a dalše pěsnički. Do toho sydaštej Měrćinowy rochlik a horcy čaj. Bianka Šeferowa Foće: SN/Hanka Šěnec
Z pjera spisowaćelki Jěwy-Marje Čornakec je w LND dalša stawizna wo wrobliku Fridźe wušła, kiž wudospołnja serbski dźěćacy bestsellerowy rjad za čitarjow wot štyrjoch lět. Po tym zo su so přećeljo mjez druhim hižo na ptači kwas, jutry a kermušu hotowali, wjesela so nětko na hody.
Na zelenej łuce přihotuja so přećeljo z radosću na rjany hodowny
swjedźeń. Přez zymu je žabka Šlapka zaso k wroblikej, myšce a jěžikej ćahnyła, zo njeby tak sama była. A dalši hósć je so přizjewił – wopička Ritka z dalokeje Afriki. Zhromadnje chcedźa swjećić – z pyšenym hodownym štomikom, wobradźenjom, darikami, chłóšćenkami a horcej šokolodu. Jeničce rumpodich da na so čakać. Nowe hodowne dyrdomdejstwo ze zabawnymi barbnymi rysowankami ilustratora Güntera Wongela je młodym čitarjam wurjadny dar pod hodowny štom.
Měrka Mětowa
Čehodla swjećimy swjateho Měrćina?
11. nowembra swjećimy swj. Měrćina. Wón běše najprjedy romski wojak, kotryž běše za swoju
smilnosć jara znaty. Kaž z legendy wuchadźa, je wón na zymnym zymskim dnju swój płašć z prošerjom dźělił a jeho tak před zmjerznjenjom zachował. Z toho časa ćahaja předewšěm dźěći na dnju a wokoło 11. nowembra z latarničkami po dróhach a dopominaja tak na swjateho Měrćina.
Tež w Chróšćanskej zakładnej šuli su dźensa tydźenja
swj. Měrćina swjećili. Tam
pokazachu šulerjo program
a tohorunja su pječenu husycu dóstali. To běše woprawdźe
wulkotna wěc! Ale što ma
husyca poprawom ze swj.
Měrćinom činić? Foće: Feliks Haza
Što ma swjaty Měrćin z husycu činić? Měrćin bě so skromnosće dla
w husacym chlěwje schował, jako
chcychu jeho na biskopa wuswjećić. Husy pak wulku haru činjachu
a jeho tak přeradźichu. Z toho dnja je biskop Měrćin
z Toursa škitny patron husycow.
Recensija romana Elki Lorencoweje „Machtworte“
Zo bě jeje mandźelski-basnik mišter słowow, wěmy – zo pak zamóže tež Elke Lorencowa pisać, to hakle nětko pytnjemy. Lětsa je w nakładnistwje Mitteldeutscher Verlag jeje prěni roman „Machtworte“ wušoł. Debit to, kotryž jenož hladajo na pózdni spisowaćelski comingout njepřekwapja, ale tež nastupajo putacu lekturu, kotraž wona čitarjej dari. Awtorka powěda wo swojim dźěćatstwje w Němskej demokratiskej republice, wo wulkej politice w holčacym žiwjenju.
Hižo 1988 bě Wuježčanka prěnje skicy teksta nakładnistwu Aufbau pósłała, po politiskim přewróće pak měješe zastaranje swójby prioritu. Město na swojim teksće je Lorencowa po tym na nowinarskich zdźělenkach města Budyšina dźěłała. Skónčnje, w starobje 59 lět, wona projekt znowa wožiwi, a mandźelski Kito Lorenc je wuslědk samo hišće takrjec „wotžohnować“ móhł, kaž wona w dodawku knihi přeradźa.
Z prezentaciju hudźbneho wideja hymny „Serbsko-Waliziskeho přećelstwa – Cyfeill garwch cymareg a sorbian“ na Choćebuzkim filmowym festiwalu su sobuskutkowacy prěnju etapu projekta zakónčili. Na iniciatiwu huslaceho spěwytwórca Geigerzähler a spěwarki-gitaristki Efa Supertramp běchu lětsa w aprylu we wobłuku dźěłarnički w Choćebuzu wjacore spěwy skomponowali, aranžowali a natočili. Wuslědk je kaseta z dohromady 16 titulemi, kotruž z małej turneju po Łužicy a naposledk w Berlinje předstajichu. Koncertna jězba powjedźe jich na dosć njewšědne jewišća, kaž na přikład do lěsa blisko Slepoho abo na Kumšiski dwór čo. 8. W Nukničanskej barace knježeše hnuta ćišina kaž drje hišće ženje, jako wobkuzłany publikum harfenistce Cerys Hafana připosłuchaše. Ani z bary njebě někajkehožkuli klimpota słyšeć. W Choćebuzu přiwabi wustup – tež dźakowano takrjec domjacej hrě rappera a lokalneho matadora STOI – najwjace wopytowarjow.
W serbskej literaturje chowaja so mnohe drohoćinki, na kotrež znowa skedźbnić je trjeba, zo njebychu so pozabyli. Wotpowědne impulsy chce awtorka serbskim čitarjam a čitarkam z nowym rjadom „Znowa čitała“ dawać.
Před dwěmaj lětdźesatkomaj poča serbska literarna towaršnosć sej zadźiwana wuwědomjeć, zo su žony-awtorki po ličbje swojich muskich kolegow přesćahnyli. Prawidłownje běchu wone w antologijach serbskeje prozy we wjetšej ličbje zastupjene hač awtorojo-mužojo. A něšto lět pozdźišo zwěsćichmy na posedźenjach nawodow serbskich institucijow, zo bě jich wjace wjednicow hač wjednikow. Nó haj, tajki trend móže so spěšnje zaso měnjeć. Ale na čim je zaležało, zo je tute wuwiće tak wočiwidne było? Poprawom je to zajimawa tema za wědomostne slědźenje wo serbskej towaršnosći. Sama móžu jenož tukać.
Sym zbožowna! Z kotreje přičiny, so nětko bjezdwěla prašeće. Sym zbožowna, zo sym sonam Měrćina Weclicha wot wšeho spočatka sćěhowała. Nic cyłe jeho žiwjenje. Ně! Sym jeho awtobiografiju „Sonić – to tla z hrěchom njej‘“ čitała, a to bjez toho, zo bych ju přestawki dla wotpołožiła. Mam to za pokazku, zo bych rady dalše zajimawostki ze žiwjenja w lěće 1957 rodźeneho Pančičan-Kukowčana zhoniła.