Z wudaća: štwórtk, 27 awgusta 2015

Dobrowólna wohnjowa wobora Pěskecy wuhotuje jutře w 20 hodź. dalši hašenski běh we wobłuku wohnjowobornych wubědźowanjow zarjadniskeho zwjazka při Klóšterskej wodźe. Přewjedli su lětsa dotal pjeć wurisanjow, tři do štyri maja hišće slědować.

Nimo dorosćenych wobdźěleja so wot lětušeho tež dorostowi wohnjowi wobornicy na hašenskich běhach. Dobrowólnej wohnjowej woborje Ralbicy-Róžant a Pančicy-Wotrow wukubłuja holcy a hólcow w šulskej starobje. Prěnja w tymle wurisanju je tuchwilu dorostowa skupina z Pančic-Wotrowa.

Tule aktualna tabulka:

1. Konjecy-Šunow  87 dypkow

2. Worklecy   82 dypkow

3. Róžant-Sernjany  76 dypkow

4. Ralbicy-Róžant  72 dypkow

5. Pěskecy   67 dypkow

6. Wotrow   66 dypkow

7. Smjerdźaca  42 dypkow

8. Hórki   32 dypkow

Z podpismom přeradźił je so 29lětny muž, kiž bě bjez jězdźenki z ćahom po puću. Kaž zwjazkowa policija zdźěli, bě železnicar muža w ćahu z Magdeburga do Frankfurta nad Wódru bjez jězdźenki lepił a sej na to personalije čornojězdźerja žadał. Tón pak wupjelni formular spočatnje z wopačnymi datami. Jako na kóncu ze swojim prawym mjenom podpisa, so wěc wukopa. Nětko wočakuje jeho tež hišće skóržba wobšudnistwa dla.

Nic Pisa, ale Wellington: W awstralskej stolicy Wellingtonje chcedźa nowy běrowowy dom twarić, kotryž so po zdaću do tam zwučeneho sylneho sewjerneho wětra chila. Pobóčne sćěny 32 metrow wysokeho twarjenja budu 12,5 stopnjow nachilene, kaž rěkaše. Špundowanja su přiwšěm rune, hinak hač w Pisaskej wěži. Dowolnosć za twar mjeztym předleži. Klětu chcedźa z nim započeć.

Madźarska dožiwja nawal ćěkancow kaž nihdy

Wien/Budapest (dpa/SN/K). Dźiwajo na spochi sylniši krizowy nawal ćěkancow pyta Europska unija za skutkownymi strategijemi. Dźensa schadźuje so w awstriskej stolicy lěta 2014 załožena zapadobalkanska konferenca a wuradźuje wo přiběracej ličbje ćěkancow z tohole regiona. Na njej wobdźělenaj staj tež němska kanclerka Angela Merkel (CDU) a wonkowny minister Frank-Walter Steinmeier (SPD). Přitomni su nimo zamołwiteje EU za wonkowne naležnosće Federici Mogherini a italskeho ministerskeho prezidenta Matteja Renzija tohorunja šefojo knježerstwow Makedonskeje, Albanskeje, Bosniskeje-Hercegowiny, Kosowa, Mon­tenegra a Serbiskeje. Hišće do zahajenja konferency je sej wonkowny politikar EU Elmar Brok (CDU) žadał, wšitke zapadobalkanske staty spěšnje a po cyłej EU deklarować jako „wěste pochadne kraje“.

Stolica błyskow

Choćebuz (dpa/SN/ch). Město Choćebuz je stolica błyskow w Němskej. Na kóždy kwadratny kilometer delnjołužiskeje metropole su loni dobre 8,4 błyski zadyrili. Najmjenje błyskow z kontaktom k zemi abo twarjenjam zličichu we wuchodofriziskim­ Aurichu a w delnjobayerskim Passauwje. Tam naměrichu 0,23 błyskow na kwadratny kilo­meter, zdźěli předewzaće Siemens wčera w Karlsruhe. Ličby pak lěto wob lěto chabłaja­. Lěta 2013 bě hornjofrankske město Coburg stolica błyskow. Přede­wšěm zastararjo z energiju a zawěsćenja so po informaciji předewzaća za daty zajimuja­. Siemens zwěsća z pomocu měrjenskich stacijow po cyłym kraju zadyrjenja dokładnje hač na 200 metrow.

Zahaja nowu dobu z musicalom

Minsk (dpa/SN/K). Ukrainske wójsko a proruske mocy činja nowy pospyt za trajny přiměr na wuchodnej Ukrainje. Spočatk šulskeho lěta 1. septembra ma płaćić dojednanje wo womjelknjenju bróni, kotrež bu hižo srjedź februara w běłoruskim Minsku dorěčane. Tole zdźěli zastupnik OSZE w kontaktnej skupinje Ukraina Martin Sajdik. W Donbasu běchu napjatosće naposledk strašnje přibyli­. Prezident USA Barack Obama napomni­ Rusku, naležnišo skutkować za jich pomjeńšenje. Ukrainski prezident Petro Porošenko wuradźowaše dźensa připołdnju w Brüsselu ze šefom komisije EU Jeanom-Claudeom Junckerom wo połoženju w swojim kraju.

Berlin (dpa/SN). Zwjazkowy justicny minister Heiko Maas (SPD) je internetnu syć Facebook namołwjał, rozšěrjenju hidy­ połnych poselstwow přez wužiwarjow zadźěwać. W lisće centralam Facebooka w Němskej a Europje přeproša wón zastupnikow předewzaća k wotpowědnym rozmołwam, kaž powěsćernja dpa rozprawja. Na zetkanju, kotrež je pječa 14. septembra předwidźane, chcył Maas z nawodami portala wo zarjadowanju wotpowědnych prawidłow jednać. Po namócnosćach přećiwo wukrajnikam a jich přebywarnjam dochadźa w justicnym ministerstwje dźeń a wjace skóržbow ludźi prawicarskich a rasistiskich šćuwanjow w interneće dla, Maas piše.

Athen (dpa/SN). Grjekski statny prezident Prokopos Pavlopoulos móhł hišće dźensa wječor dočasne nowowólby wukazać. Fachowcy w Athenje to wočakuja, wšako njeje nawoda noweje lěwicarskeje strony Ludowa jednota, Panagiotis Lafazanis, dotal nowe knježerstwo wutworić zamóhł. Do njeho bě tež konserwatiwny politikar Evangelos Meimarakis z tymle předewzaćom zwrěšćił.

Tianjin (dpa/SN). Dwaj tydźenjej po zahubnym rozbuchnjenju w chinskim měsće­ Tianjin su cyłkownje 23 zamołwitych zajeli. Ličba smjertnych woporow je na 139 rozrostła. W rozwalinach pytaja dale za 34 zhubjenymi. W chorownjach staraja so wo 527 zranjenych. 12. awgusta běchu w składźe za strašne maćizny chemikalije rozbuchnyli, kotrež běchu tam zdźěla ilegalnje wotkładowane.

Wałbrzych (dpa/SN). Zarjadnistwo delnjošleskeho města Wałbrzych je wob­krućiło, zo ma informacije wo namakanju ćaha z Druheje swětoweje wójny. Što w nim je, njeje dotal znate. Prawiznik dweju muži, kotrajž staj němski pancerowany ćah pječa našłoj, bě město informował. W Pólskej tukaja, zo je w ćahu wot nacijow rubjene złoto. Ludźo mjeztym na wjacorych městnach za ćahom ryja.

Tele linki pišu krótko po tym, zo sym wo smjerći swojeho dołholětneho pře­ćela Pawoła Hejduški zhonił. Z nim poboku sym chodźił po šćežkach dźěćatstwa w Hórkach, po Varnsdorfskich pućach­ čě­sko-serbskeho gymnazija, po Budyskich hasach za čas wyšeje šule, po Lip­šćanskich dróhach w lětach uniwers­itneho kubłanja ... A jako běchu zhromadne puće­ po předpisach žiwjenja do wšelakich kónčin wotbočili, pytachmoj za składnosćemi so zetkawać.

Pawoł bě so hakle wóndano do do­mjacych Hórkow dowjezć dał, zo by pó­dla był, jako tam na Smolic statoku swoju­ knihu­ dopomnjenkow předstajich. Hačrunjež wón knihu dodosća znaješe, chcyše słyšeć, kak to klinči, hdyž awtor­ publi­kacije sam z njeje čita. A dokelž je so­ horstce do Hórkow přichwata­nych za­jimcow spo­dobało, štož běchu na wo­sobinskich dožiw­jenjach z powšitkownje znatych časow­ słyšeli, sej lite­rarny wječor ze spěwami a piwkom podlě­šichmy. A kaž připó­dla so dohladachmy, zo za pianom „Netec Pawl“ sedźi, wot kotrehož nichtó z nas wědźał njebě, zo móže wón tež „klawěr piskać“.