Z wudaća: póndźela, 23 nowembera 2015

Brüssel/Paris (dpa/SN/K). Dalšich terorowych atentatow dotal było njeje, móžno dźakowano chutnym napominanjam, zo wone hroža. W belgiskej stolicy je dale terorowy alarm, kotryž běchu kónc tydźenja postajili. Tež metro hišće njejězdźi. Šule a uniwersity wostachu zawrjene. Policisća a wojacy přepytachu wjacore měšćanske dźěle Brüssela kaž tež wjacore gmejny regiona. Racije přewjedźe­- chu tohorunja we waloniskim industrijnym měsće Charleroi. Brónje a rozbuchliny njejsu žane nadešli. 16 podhladnych wosobow bu w nocy zajatych, z mjezynarodnym přikazom zajeća pytany Salah Abdeslam pak mjez nimi njeje. Za bratrom jednoho z Pariskich sebjemordarskich atentatnikow slědźa hižo cyły tydźeń. Prawdźepodobnje bě wón na njeskutku w francoskej stolicy ze 130 mor­twymi wobdźěleny a je so po tym w Brüs­selu chował, bydlo naposledk w muslimskim měšćanskim dźělu Molenbeek. Po rozprawje dźenika La Libre Belgique nańdźechu wěstotne mocy w regionje wuchodobelgiskeho Lütticha w BMWju na awtodróze do Němskeje muža, pola kotrehož móhło so wo Salaha Abdeslama jednać.

Halle (dpa/SN). Simone Peter a Cem Özdemir wostanjetaj dalšej dwě lěće předsydaj Zelenych. Na zwjazkowym zjězdźe strony w Halle delegaća wobeju w zastojnstwje wobkrućichu. Peter dósta 68 procentow wšěch wotedatych hłosow. To je mjenje hač lěta 2013, hdyž bě strona po poražce při wólbach zwjazkoweho sejma nawodnistwo strony scyła znowa woliła. Tehdy bě Peter jako zastupnica lěweho křidła strony hišće 75,9 proc. nažnjała. Özdemir jako zastupnik tak mjenowaneho „realo-křidła“ dósta w Halle 76,9 proc. hłosow. Lěta 2013 běchu so jenož 71,4 procenty za njeho wuprajili. Özdemir je mjeztym štyri wólbne doby předsyda Zelenych. Jeho běchu hižo lěta 2008 wuzwolili, tehdy z Claudiju Roth.

Wojerecy (SN). Čłonojo Budyskeho wo­krjesneho­ zwjazka CDU su sobotu na swojim zjězdźe we Wojerecach krajneho radu Michaela Hariga z 92,6 procentami hłosow znowa za wokrjesneho předsydu strony wuzwolili. Zapósłanču CDU w zwjazkowym sejmje Marju Michałkowu a Łazowskeho wjesnjanostu Uda Wićaza wuzwolichu za jeho zastupnikow. Wonaj dóstaštaj 84,4 a 86,9 procentow hłosow wšěch 129 přitomnych, kaž z nowinskeje zdźělenki wokrjesneho zwjazka wuchadźa. Sakski krajny předsyda CDU Stanisław Tilich přitomnych namołwješe, hladajo na krizu ćěkancow dla so wužadanjow a problemow aktiwnje přimać.

Praha (ČŽ/K). Čěski ministerski prezident Bohuslav Sobotka přebywa wot wčerawšeho na tydźenskim oficialnym wopyće Chiny, přeprošeny wot jeje premiera Li Keqianga. Sobotku přewodźeja ministrojo za wonkowne naležnosće, hospodarstwo a wulka delegacija nawodnych managerow industrije, předewšěm mašinotwara, rozprawjeja tamniše medije. Hłowna naležnosć wizity je, wobdźělić so na zetkanju Chiny ze zastupjerjemi 16 statow srjedźneje, wuchodneje a juhowuchodneje Europy. Póńdźe pak tež wo čěsko-chinske zhromadne dźěło. „W zašłych lěta bu wone zanjechane“, Sobotka do wotlěta rjekny. „Tuž ma so tójšto nachwatać“, wo čož so jeho knježerstwo zaměrnje prócuje. Lětuši, rozšěrjeny eksport wo 15 procentow do Chiny wo tym swědči. W Pekingu budźe čěski premier z najwyšimi chinskimi statnikami jednać, tak tež ze statnym prezidentom Xi Jinpingom. China ma so za to zdobyć, w Čěskej inwestować. Dale rozrosć ma turizm – lětsa wopyta 300 000 Chinjanow Čěsku. Dźensa je so Sobotka na seminarje předewzaćelow w Shanghaiju wobdźělił a tam twornju Škoda Auto wopytał.

Budyšin (SN/MiR). Lětuši studijny dźeń pod hesłom „Studenća pomhaja šulerjam“ na Budyskim Serbskim gymnaziju bě wusměrjeny na šulerjow 11. lětnika. Młodostni wužiwachu minjeny pjatk dopołdnja poskitki, kotrež běchu kubłanska referentka Domowiny Rejzka Wałdźic, Serbske młodźinske towarstwo Pawk, Zwjazk serbskich studowacych a gymnazij zhromadnje přihotowali. Poskitki słužachu tomu, gymnaziastow wo tym­ informować, kotre puće wjedu po maturje k wukubłanju, studijej abo dźěłu w kraju a wukraju.