Z wudaća: póndźela, 08 februara 2016

Z kóždym lětom wjace pisanych wobrazow w žonjacym póstniskim ćahu

Kulow (aha/SN). Hesło na Kulowskej radnicy pokazuje na to, zo so tam wot 1706, potajkim hižo 310 lět, karnewal swjeći. Mjeztym pak je wot 1988 z tradiciju, zo wuhotuja žony a holcy sobotu do róžoweje póndźele tež žonjace póstnicy.

Znowa je so žonjacy póstniski ćah jako přiwabliwa tradicija wopokazał, k čemuž miłe słónčne wjedro njesnadnje přino­šowaše. Zajimawe je w Kulowje zwěsćić, zo so w tamnišej drje jednej z najwjetšich karnewalowych metropolow Sakskeje kóždolětnje wjace žónskich skupin do wuhotowanja wosebiteho póstniskeho ćaha zarjaduje. Moderatorce na jewišću Kulowskeho torhošća Sabine Richter a Bärbel Oleg stej 78 pisanych wobrazow, wuhotowanych wot znajmjeńša 800 žonow, młodych holcow a samo dźěći, žortnje komentowałoj. Dwójce su nory na połtřeća kilometra dołhej čarje tysacy ludźi zbliska a zdaloka zawjeselili. Bjezwu­wzaćnje wšitcy dźě su so tydźenje do toho zaběrali, zo bychu ze swojimi přewšo pisanymi a kreatiwnymi kostimami k lóštnej naledźe přinošowali.

Interview z Benom Budarjom

Lipsk. W januarskim wudaću informaciskeho łopjena Sakskeje literarneje rady „angezettelt“ nadeńdu čitarjo dwustronski interview z Benom Budarjom. W rozmołwje z dr. Sibillu Tröml praji serbski spisowaćel mjez druhim, zo je nuznje trjeba, wědu wo rěči, stawiznach a literaturje Serbow němskemu rěčnemu rumej bóle spřistupnjeć.

Muflony po puću do Bołharskeje

Česká Lípa. Stadło 34 muflonow z přirodoweho parka Vřísek pola Českeje Lípy je tuchwilu na nakładnych awtach po puću do Bołharskeje. Tam chcedźa je w hońtwjerskim rewěrje pola města Laki w Rodopach zaměstnić. Po zdźělenju firmy Lesy ČR jedna so wo najwjetšu předań tuteje zwěrjaceje družiny w minjenych 50 lětach. W Čěskej je třećina cyłkowneje populacije muflonow žiwa.

Pruwowarjo w Pólskej

Chór Lipa a přećeljo z lóštnym wječorom do čorneho trjechili

Haslow (CRM/SN). Zastupne lisćiki za pisany program chóra Lipa z Pančic-Kukowa a jeho přećelow běchu hižo dočasa rozpředate. Po lońšim přemóžacym wuspěchu běše tuž dobra nalada póstnisku sobotu znowa w nabitej połnej žurli Haslowskeho Bizoldec hosćenca předprograměrowana. Z owacijemi hižo při zaćahu serbskeho lajskeho cyłka pod nawodom Jadwigi Kaulfürstoweje wočakowachu potajkim tež lětsa zaso lóštny wječor serbskeho spěwa na wysokim wuměłskim niwowje. To so spjelni, přetož poskići so zaso program, kiž běše derje přihotowany a z lóštno-pryzlojtymi mysličkami překisany, wotpowědujo tak słodej nic cyle njekritiskeho publikuma.

22. oktobra 2016 wotměje so w Chróšćanskej wjacezaměrowej hali „Jednota“ fachowy kubłanski dźeń na temu 2plus. Milenka Rječcyna je so z koordinatorom za serbske naležnosće z regionalneho zarjada Sakskeje kubłanskeje agentury Budyšin (SBAB) Bosćijom Handrikom rozmołwjała.

Štó su zarjadowarjo kubłanskeho dnja?

B. Handrik: Zamołwite za njón su sakske kultusowe zarjady, předewšěm kubłanska agentura a jeje Budyska wotnožka. Wšako je w koncepciji 2plus zapisane, zo ma SBAB dalekubłanja organizować.

Na njedawnym zeńdźenju Zwjazkoweho předsydstwa Domowiny bě rěč wo tym, zo ma Rěčny centrum WITAJ zamołwitosć.

Přewšo dobry wothłós žněješe loni wosebity koncert zwjetša serbskich hudźbnych skupin pod hesłom „Wočiń woči – zhromadnje přećiwo rasizmej a fašizmej“ w Budyskim Kamjentnym domje. Nětko chcedźa dalši tajki koncert organizować, štož pak scyła lochko njeje.

Budyšin/Berlin (SN/CoR). Njedawno bě so tež w serbskich medijach powěsć rozšěriła, zo je termin pokročowanja koncerta „Wočiń woči“ jasny, a zo budźe to 21. meje. To pak mjeztym hižo scyła ani jasne njeje. „Mějachmy wotpohlad, zarjadowanje tón dźeń přewjesć. Nětko pak so wukopa, zo so termin wšelakorym serbskim skupinam prawje njehodźi. Nětciši staw tuž je: Termin mamy, skukpiny pak nic“, praji hłowny organizator a čłon předsydstwa koncert zarjadowaceho towarstwa Kamjentny dom Julian Nyča.

Wjacore sta žonow je lětsa znowa w ćahu na sobotnych žonjacych póstnicach w Kulowje sobu skutkowali. Miłe wjedro přiwabi tójšto hosći, kotřiž sej spektakl rady wobhladachu. Mnozy z nich běchu tohorunja předrasćeni. Přiběrajcy wuhladaš mjez norkami holcy a žony ze serbskich wsow nic jenož wokoło Kulowa, kaž tule ze Šunowa. Wjace wo Kulowskich žonjacych póstnicach čitajće na 4. stronje. Dalše wobrazy nadeńdźeće pod www.serbske-nowiny.de. Foto: Janek Wowčer

Schafflund/Kiel (dpa/SN). Najznaćiši zastupjer danskeje mjeńšny w Němskej Karl Otto Meyer je njeboh. Po informacijach Južnoschleswigskeho wolerskeho zwjazka (SSW) je politikar wčera wječor 87lětny w Schafflundźe pola Flensburga ze­mrěł. Meyer zastupowaše SSW wot 1971 do 1996 jako jeje jenički zapósłanc w krajnym sejmje w Kielu. Wot 1960 do 1975 bě wón předsyda dźensa zhromadnje z SPD a Zelenymi knježaceje strony danskeje a friziskeje mjeńšiny. Kaž nichtó druhi ju wón reprezentowaše a mjenowaše sebje samoho „Dana z němskim pasom“. „Z Karlom Ottom Meyerom zhubi SSW najwuznamnišu wosobinu strony w powójnskim času“, rozłožištaj šef frakcije Lars Harms (SSW) a justicna ministerka Anke Spoorendonk (SSW) dźensa. W cyłej Němskej bu Karl Otto Meyer 1987 znaty. Po z Barschelowym/Pfeifferowym skandalom poćeženych wólbach krajneho sejma njebě wón zwólniwy, noweho ministerskeho prezidenta CDU sobu wolić. Dan njemóže zwjazkowy kraj wobknježić, rěkaše tehdy kritika.

Z awtom do kuchnje jednoswójbneho domu zrazył je 18lětny w Kölnje. Zhromadnje z jenak starym towaršom bě sej młody muž minjenu nóc awto nana wzał, kotryž wšak ničo wo tym njewědźeše, kaž policija zdźěli. Alkohola a přewulkeje spěšnosće dla wón kontrolu nad jězdźidłom zhubi. Wóz zrazy do domu a sćěnu přełama. 18lětny njeměješe jězbnu dowolnosć. Wobaj so snadnje zrani­štaj. Awto je dospołnje skóncowane.

Pod narownymi kamjenjeni zasypana bu 60lětna na ležownosći kamjenjećesarja w šwabskim Oettingenje. Po informacijach policije bě žona do zawoda přišła, zo by narowny kamjeń wupytała. Jako so wo wustajany eksemplar zlehny, so tón powali. Žona na to spyta, so druheho kamjenja dźeržeć. Tola tež tón so zwjeze a žonje na nohu padny. Hakle wohnjowi wobornicy móžachu ju wuswobodźić.

Wichora dla w hali dyrbjachu dźensa tež wozy karnewaloweho towarstwa w Mainzu wostać, byrnjež konfetije a placki na nich spřihotowane byli (hlej wobraz). Zamołwići pak přilubichu, póstniski ćah nachwatać. Foto: dpa/Fredrik van Erichsen

Düsseldorf (dpa/K/SN). Rědkosć tajke něšto, ale w Mainzu a Düsseldorje staj dźensa róžowopóndźelnej wulkej póstniskej ćahaj wupadnyłoj zachadźaceho wichora­ dla. W Essenje, Mühlheimje a druh­dźe so wone tohorunja njewotměja. W Düsseldorfje su pak so dopołdnja wozy z politiskimi motiwami před radnicu zjewili. Cyły ćah ma so pozdźišo wo­spjetować. Mainzowscy „prawi idealisća“ chcedźa dźensa přiwšěm na swoje wašnje swjećić. Porno tomu so Kölnski póstniski ćah po zwučenym wašnju na puć poda, byrnjež w trochu mjeńšim a skromnišim rozměru. Tak su mjez druhim wšitke konjace zapřahi z ćaha wzali, runje tak chorhoje a hoberske figury z papjerca. Tež w Aachenje a Bonnje njejsu njedźiwajcy připowědźeneho wichora póstniskej ćahaj zastajili.