Z wudaća: pjatk, 29 apryla 2016

W konsekwency lońšeho naprašowanja čitarjow přez institut Dima započnje redakcija SN z wudaćom 2. meje Wam 2. stronu w přeměnjenym šaće poskićeć. Z prěnim krokom zwjazana je nowa rubrika „Mój wid“. Wšědnje tam z pojednanych temow w nowinje jednu skrótka komentujemy. Snano polěkuje to tež čilišej wuměnje myslow w dopisach. Wuběr naj­aktualnišich powěsćow z kraja a wukraja do kónca redakciskeho časa móžeće potom w rubrice „Aktualne“ čitać. Skerje kuriozneju powěsćow pod „To a tamne“ nje­trjebaće so wzdać, rubriku „Łužica“ pak wozjewimy dźensa posledni raz.

W druhim kroku maja hłowne přinoški 2. strony SN bóle politiku z perspektiwy dwurěčneje Łužicy wotbłyšćować kaž tež wo žiwjenju w słowjanskich krajach informować. Redakcija SN

Rěkachu jemu Nowšan, dokelž bě rodźeny (1925) w Nowej Wjesce, we wsy nad Klóšterskej wodu, z kotrejež wuńdźe w prěnimaj powójnskimaj lětdźesat­komaj 33 wustudowanych Serbowkow a Serbow. Jedyn z nich bě nowowučer Jurij Kubaš. Syn skałarja, wuwučeny młynk, zakónči studij w Lipsku jako pedagog dr. phil. a bě wot lěta 1975 wyši wučer a studijny rada. Čas žiwjenja bě wědomostny sobudźěłaćer w centralnym pedagogiskim instituće w Serbskim domje a staraše so wo serbšćinu A-šulstwa­. Spisał je wjace hač 30 wučbnicow serbšćiny, mjez druhim tež za wučerjow metodiku podawanja serbšćiny. Po towaršnostnej změnje zapoda koncept za ewaluaciju serbskeho šulstwa ze žadanjom: „Trjebamy sylny pedagogiski wotrjad.“ W lěće 2004 dokónči wědomostne přepytowanje „Wo wosebitosćach serbsko-němskeje dwurěčnosće“, w kotrymž skedźbni na powjetšace so „tempo našeje wšostronskeje integracije do němskeje towaršnosće“ a na jeje wuskutki na serbsku rěč w zjawnosći, šuli a swójbje.

Běła Woda (AK/SN). Łužiska hospodarska iniciatiwa (WiL) přichodnych młodych předewzaćelow zaměrnje dale podpěruje. Mjeztym 13. raz wupisa wona nětko Łužiske załožerske myto (LEX). „Njeńdźe nam jenož wo nošerjow myta. Kóždy wobdźělnik dóstanje za swoje požadanje fachowe pohódnoćenje a poradźowanje dweju jurorow“, podšmórny předsyda WiL Michael von Bronk minjenu wutoru na zazběhu lětušeho wubědźowanja wo myto LEX.

Předewzaćeljo, kotřiž su sej firmu před nic dlěje hač štyrjomi lětami załožili, smědźa so ze swojej koncepciju wo myto požadać. Wutworjene předewzaća runje tak kaž rozšěrjenje jednaćelskeho wobłuka abo nowe naslědnistwo k tomu słušeja. Wupisane je prěnje myto ze 4 000 eurami, druhi dóstanje 2 500 a třeći 1 500 eurow. Wosebite myto pod hesłom tworjenje hódnotow chce hospodarska iniciatiwa z 2 000 eurami počesćić.