Z wudaća: pjatk, 29 apryla 2016

Wojerowska chorownja reaguje na wjetšu potrjebu zastaranja

Wojerecy (SN/mwe). Klinikum łužiskeje jězoriny we Wojerecach ma nowu kliniku za neurologiju. Chorownja reaguje tak na wjetšu potrjebu medicinskeho zastaranja na tym polu. Dźeń a wjace ludźi na přikład ćerpi demencu abo na parkinsonowu chorosć.

Mnohim pacientam je Wojerowska nowa neurologiska klinika wulke wolóženje, dokelž móža so wotnětka w bliskosći lěkować dać. „Z nowym šeflěkarjom dr. med. Andreasom Linsu mamy wysokokwalifikowaneho medicinarja, kiž je jara angažowany“, z jězorinoweho klinikuma rěka. Linsy poboku staj wyšej lěkarjej Olga Tagonow a Frank Rost. Wonaj staj tohorunja fachowaj lěkarjej za neurologiju a přewodźataj dotal přede­wšěm pacientow, kotřiž běchu na božu ručku schorjeli. Z nowej kliniku dósta Wojerowska chorownja dalši wosebity medicinski wobłuk na jara wysokim niwowje.

Po 23 lětach skutkowanja jako direktor Serbskeho instituta su wčera wječor prof. dr. Dietricha Šołtu na małej žurli Budyskeho Dźiwadła na hrodźe swjatočnje rozžohnowali.

Njebjelčicy (SN/MiR). Dwu- do třilětne dźěći skupiny „kubołćiki“ w Njebjelčanskej pěstowarni „Jan Skala – Barbojte kamuški“, kotraž je w nošerstwje Miłočanskeho Křesćanskeho socialneho-kubłanskeho skutka, běchu dźensa dopołdnja jara wćipne. Wšako běše hósć z Budyšina připowědźeny. Lektorka Ludoweho nakładnistwa Domowina Janina Mikławškowa pak njetrjebaše ani mjeńšiny, a wutroby małych připosłucharjow jej přilětowachu. Wona čitaše jim krótke teksty z nowostki LND „Dobru nócku, bariko“, kotraž powěda wo tym, kak hodźa so strachi přewinyć. Knihu z pjera němskeje awtorki Christy Kempter je Rejzka Deleńkec zeserbšćiła. „Je to prěni króć, zo bě so zakładnošulska wučerka na tajki přełožk zwažiła. A mam jón za jara poradźeny“, rjekny Janina Mikławškowa. „Kniha je myslena za dźěći wot dweju lět hač do předšulskeje staroby.“ Lektorka pak wě sej tež předstajić, zo šulske dźěći mjeńšim z njeje čitaja. Tež nawodnica Njebjelčanskeje pěstowarnje Andreja Hejdušcyna ma nowu knižku za hódnu. „Su to stawiznički, kotrež našim dźěćom rady předčitamy.

Wadźaceju so wopiteju Britow dla je pasažěrske­ lětadło po puću do Španiskeje w Francoskej přizemić dyrbjało. Ka­pitan Ryanair-lěta mjez Liverpoolom a Alicante bě wčera nuzowany přizemić, zo njeby k dalšej eskalaciji dóšło. Pjanej mužej běštaj so mjez sobu prowoko­wałoj. Policija jeju na mjezystopje w Limogesu zaja a najprjedy raz do aresta tykny. Hižo kónc februara dyrbješe mašina z Londona do Bratislavy w Berlinje-Schönefeldźe přizemić, dokelž běchu so Britojo njemóžnje zadźerželi.

Hoberski pokład antikskich pjenjez z časa Romjanow su w južnej Španiskej našli. Namakanka w městačku Tomares njedaloko Seville wopřijima tysacy bronzowych a slěbornych pjenjez z 3. a 4. lětstotka, kaž Sevillaski archeologiski muzej zdźěli. Pjenjezy waža 600 kilogramow a su w 19 amforach składowane byli.

Swójbni, přećeljo a kolegojo su so dźensa na lěsnym pohrjebnišću w Berlinje­Zehlendorfje z dźiwadźelnicu Hendrikje Fitz rozžohnowali. 54lětna bě 7. apryla na raka zemrěła. Wot lěta 1998 hraješe wona fyzioterapeutku Piju Heilmann we woblubowanej lěkarskej seriji­ sćelaka ARD „In aller Freundschaft“. Minjenu wutoru je šěsć milionow ludźi poslednje pokročowanje z njej widźało. Foto: dpa/Jörg Carstensen

Berlin (dpa/K/SN). Němska je zwólniwa, wobdźělić so na zesylnjenju wójskow NATO­ we wuchodnych zwjazkarskich krajach. „Wo tym rozsudźa na wjeršku NATO we Waršawje“, praji rěčnik zwjazkoweho ministerstwa za zakitowanje. Wotmyslene je w Litawskej zaměstnić wosebity bataljon, do kotrehož sćelu wšelake kraje jednotki, po wěstym času so wotměnjace. Zwjazkowa republika móhła na tym z kompaniju sobu skutkować, ze 150 do 250 wojakami tuž. Ba­taljon wobsteji z třoch do šěsć kompa­nijow. Swoju wuchodnu flanku je NATO ze wšelkimi naprawami­ hižo zesylniła, tak z wjace manewrami w statach, susodźacych z Ruskej. Lětsa sćele tam NATO 5 500 wojakow­ na zwučowanja, něhdźe 500 wjace hač loni.

CDU žada sej plan za Łužicu

Podstupim (dpa/SN). Opoziciska CDU w braniborskim sejmje je krajne knje­žerstwo namołwiła, strukturnu změnu we Łužicy pjenježnje podpěrać. „Štož pobrachuje, je plan za Łužicu“, wobžarowaše hospodarskopolitiski rěčnik CDU, Dierk Homeyer wčera w aktualnej hodźinje parlamenta­. „Trjebamy spěšnu a njebě­rokratisku pomoc za předewzaća, kotrež so na nowe wobłuki zwaža.“ Přiwšěm je jasne, zo je brunica hišće dołho za spušćomne a zapłaćomne zastaranje ludźi z milinu trěbna, Homeyer rozłoži. Braniborske knježerstwo pak měło wotwidźomneho kónca zmilinjenja dla strukturnu změnu zahajić. „Dźe wo industrijny zakład wšeho kraja“, wón napominaše.

Ochranowske hesła zestajane

Berlin (dpa/K/SN). Šef frakcije unije w zwjazkowym sejmje Volker Kauder (CDU) chcył, zo přewozmje w Němskej stat kontrolu nad mošejemi. „Dyrbimy wo tym rěčeć, zo słyšiš w někotrych mošejach­ prědowanja, kotrež so z našim zrozumjenjom wo staće njeznjesu“, rjekny­ Kauder nowinje Berliner Zeitung, přispomnjejo­, „čehoždla je stat wužadany a dyrbi to kontrolować.“ Němska zwjazkowa republika je sekularny­ stat, w kotrymž njesteji nabo­žina nad statom, ale nawopak. Žadanja bayerskeje CSU, imamojo dyrbjeli němsce prědować, wšak Kauder njepodpěruje. „Za Italčanow so kemše tež italsce wotměwaja. Zo so w synagogach tuž w hebrejšćinje modla, ma so akceptować“, měni šef frakcije unije.

Budyšin (SN). Zastupjerjo politiki łužiskeje komunalneje a krajneje runiny namołwjeja w zhromadnym stejišću, roze­stajenje wo łužiskej brunicy demokra­tisce a z respektom přewjesć. Wosebje na připowědźenu akciju skupiny Ende Gelände wokoło swjatkow woni chětro skeptisce zhladuja. „Namołwjamy k dialogej bjez namocy. Nadpady na ludźi, kaž w porynskim brunicowym rewěrje Hambacher­ Forst, hdźež steji namóc na dnjowym porjedźe, njesměmy akcep­tować“, rěka w zhromadnej zdźělence. Z wulkej starosću wobkedźbuja łužiscy komunalni politikarjo wuwiće, při kotrymž so tak mjenowani wobswětowi aktiwisća na prawniskej hranicy pohibuja.

Pólska cyrkej so za wustupowanje duchowneho zjawnje zamołwiła

Waršawa. Štóž wobrazy němskeje zwjazkoweje kanclerki Angele Merkel (CDU) w zjawnosći spali, njetrjeba so w Pólskej chłostanja bojeć. To je Wrócławske statne rěčnistwo zdźěliło. Wuchadźišćo bě skóržba tamnišeho wyšeho měšćanosty Rafała Dutkiewicza. Tón bě na antieu­ropskim zarjadowanju nacionalistiskeje Organizacije­ narodnoradikalneho lěhwa (ONR) před radnicu města wobkedźbował, kak demonstranća plakaty z wobrazom Angele Merkel pala.