Njezbožo z křesłom
Wojerecy. Wobchadne njezbožo trochu hinašeho razu sta so sobotu připołdnju na zwjazkowej dróze B 97 pola Wojerec. Tam bě so křesło z připowěšaka pušćiło a na puć padnyło. Dwě wosobowej awće njemóžeštej so hižo wuwinyć a zrazyštej do mebla. Na zbožo so při tym nichtó zranił njeje.
Radwor (SN/BŠe). Dźěl wulkeho cyłka być a zhromadnje něšto jónkrótneho na nohi stajić bě zaměr projekta Radworskeje zakładneje šule „Dr. Marja Grólmusec“, kotryž su zańdźeny tydźeń přewjedli. „Fantastiske, překwapjace, wuběrne“ – to běchu słowa wopytowarjow, kotřiž su sej wuslědk zhromadneho dźěła 150 dźěći a cirkusa Rolandos wobhladali. Wot akrobata a klawna hač ke kuzłarjej a rekwiziterej běchu dźěći cyły tydźeń zhromadnje pod nawodom sobudźěłaćerjow Rolandosa z braniborskeho Herzberga pisany program zestajeli. „Štož sće wy w běhu krótkeho časa tworili, my samo w běhu lět njedocpějemy“, hódnoćeše nawodnica Radworskeje šule Brigita Grundmannowa program. Tak překwapichu mali wuměłcy něhdźe 1 000 ludźi na třoch předstajenjach zašły pjatk a sobotu z dresuru psow, kozow abo hołbjow. Zestajeli běchu tohorunja choreografije z bulemi, powjazami a rynkami a pokazachu tež akrobatiku na konju. Runje tak předstajichu kuzłarjo swoje kumšty.
Vattenfall chce ludźi pušćić
Berlin. Šwedski energijowy koncern Vattenfall dale personal wottwarja. „Dyrbimy ličbu swojich sobudźěłaćerjow perspektiwisce pomjeńšić“, rjekny šef koncerna Magnus Hall Berlinskim nowinarjam. Wón wopodstatni to z wulkim hospodarskim ćišćom energijoweje změny dla. Kelko dźěłowych městnow móhło w Němskej potrjechenych być, Hall njepřeradźi.
Solidarni z pólskimi kolegami
Bad Hersfeld. Skupina něhdźe 60 sobudźěłaćerjow předewzaća Amazon z Bad Hersfelda a Lipska je so na puć k swojim kolegam do Wrócławja podało, zdźěla dźěłarnistwo ver.di. Wopokazać chcedźa jim tak swoju solidaritu w boju wo wyšu mzdu a lěpše dźěłowe wuměnjenja. W Pólskej zasłužeja sobudźěłaćerjo Amazon po informacijach dźěłarnistwa runje 3,50 eurow na hodźinu. Koncern twjerdźi, zo je to wjace.
Hospodarstwo rozrostuje
Pod hesłom „Chwile za wjace solidarity“ je Němski zwjazk dźěłarnistwow (DGB) mejske swjedźenje składnostnje dnja dźěła wčera w Budyšinje, Zhorjelcu a Běłej Wodźe wuhotował. Na Wojerowski mejski swjatk bě tradicionalnje Lěwica přeprosyła. Serbski zapósłanc Sakskeho krajneho sejma Hajko Kozel (Lěwica) je so tam k rozsudej Zhorjelskeho statneho rěčnistwa wuprajł.
Čorny Chołmc (SN). Předewzaće Sachsenmilch z Leppersdorfa chce Krabatowy młyn w Čornym Chołmcu podpěrać a přewostaja wot dźensnišeho butranku darmotnje za znatu regionalnu specialitu plincy. Krabatowy młyn ze swojim jónkrótnym kulturnym poskitkom region wobohaća, wšako tam žiwe serbske tradicije pěstuja. Přeće, so w kónčinje angažować, wobeju partnerow zjednoća. Tohorunja wobdźělatej so hižo na wšelakich projektach, kotrež region a jeho wobydlerjow dołhodobnje spěchuja. „Wot nas za was zhotowjene“ je hesło Leppersdorfskeho mlokoweho zawoda, a to nětko tež w horjeka mjenowanym zmysle zwoprawdźeja.
„Jako je so Čornochołmčanski Krabatowy młyn na nas wobroćił, běchmy hnydom zahorjeni“, wjeseli so nawodnica za zhotowjenje wudźěłkow Sachsenmilch Sofie Stechl, „mamy zhromadny zakład, kotryž so w našich produktach zjednoća.“ Předsyda towarstwa Krabatowy młyn Tobias Čižik zdźěli, zo je hordy na dotal docpěte a zo so na zhromadne dźěło wjeseli.
Zo by Serbski institut wuslědki swojeho slědźenja tež němskej zjawnosći spřistupnił, přeprosy wón minjeny pjatk na institutny dźeń w němskej rěči. Rjad Němcow z Budyšina je přeprošenje sćěhowało, wjetšina wobdźělnikow pak běchu Serbja. Mjez hosćimi bě tež direktor Sewjerofriziskeho instituta prof. dr. Thomas Steensen.
Budyšin (ML/SN). Wo sorabistiskim slědźenju w času digitalizacije porěča dr. Hauke Bartels, jednaćelski zastupnik direktora Serbskeho instituta. Citujo načolnicu wulkeho slědźenišća „Štóž njeje digitalnje prezentny, toho njewobkedźbuja“ praji Bartels: „Z toho wurosće tež za naš institut, zo ma wón w nowych medijach zastupjeny być, zo by serbske kulturne herbstwo a rezultaty swojeho wědomostneho dźěła posrědkował.“ Dr. Susanne Hozyna předstaji nowy, rozšěrjeny a wudospołnjeny institutny spis.
Berlin (dpa/SN). Při namócnosćach w zwisku z demonstracijemi lěwicarskich ekstremistow je so wčera w Berlinje-Kreuzbergu po informacijach dźěłarnistwa 59 policistow zraniło. Wo „měrniwej 1. meji njemóže tuž žana rěč być“, zdźěli městopředsyda Dźěłarnistwa policije (GdP) Detlef Herrmann nowinarjam. Zranjenja přez kamjenje a bleše drje běchu přewažnje snadne, přiwšěm njeměli so přiběrace ličby rjane barbić, wón rjekny. Loni 1. meje bě so 39 policistow zraniło.
Mjenje ćěkancow přišło
Athen (dpa/SN). Prud ćěkancow z Turkowskeje do Grjekskeje je dale słaby. Wot njedźele ranja hač do dźensnišeho ranja je runje 112 ćěkancow z Turkowskeje do Grjekskeje přišło, kaž z Athena informowachu. Hišće w februaru běchu tam wšědnje 2 000 ćěkancow zličili. Z nowym zrěčenjom mjez EU a Turkowskej z 20. měrca smě Grjekska ilegalnych ćěkancow do Turkowskeje wróćo słać. Dotal je to w 400 padach činiła.
Kontrole na mjezy podlěšene