Z wudaća: wutora, 03 meje 2016

Wokrjesna koparska liga, stafla III

Großröhrsdorf II – Mar. hwězda 2:0 (0:0)

Němske Pazlicy – Wóslink/Sk.0:2 (0:1)

Haselbachtal – Ottendorf/Liegau 1:0 (0:0)

Großnaundorf – Sepicy 6:0 (3:0)

Njebjelčicy – Frankenthal 3:2 (2:2)

1. Ottendorf/Liegau 20 46  : 18 47

2. Frankenthal 20 57  : 30 46

3. Großnaundorf 21 62  : 30 42

4. Arnsdorf 22 55  : 23 41

5. Großröhrsdorf II 22 42  : 28 39

6. Marijina hwězda 20 64  : 40 33

7. Haselbachtal 21 46  : 49 32

8. Njebjelčicy 20 40  : 32 31

9. Sepicy 20 54  : 50 31

10. Němske Pazlicy 20 30  : 42 24

11. Hlinowc 20 29  : 51 16

12. Wóslink/Skaskow 21 25  : 58 11

13. Großharthau 20 20  : 62 11

14. Großdrebnitz 21 22  : 79 10

Karlsruhe (B/SN). Zetkanje z wjace hač 14 000 wobdźělnikami planuja cyrkwje w Karlsruhe. Składnostnje młodźinskeho zjězda Christival 2016 wot 4. do 8. meje chce dźěłowe zjednoćenstwo křesćanskich cyrkwjow (ACK) 7. meje wuhotować wječorny piknik za Christival a za jeje wobdźělnikow a hosći na Karlsruheskej hrodowej zahrodźe. To rjekny tamniši ewangelski dekan Thomas Schalla. Młodźinske zetkanje steji pod hesłom „Jězus wujednawa“. Zjězd, za kotryž je so hižo wjace hač 13 000 młodostnych nad 14 lětami přizjewiło, ma „wobdźělnikam zmóžnić, zo rěča wo prašenjach wěry a žiwjenja ze swojeje perspektiwy a wuwiwaja nowe formy křesćanskeho młodźinskeho dźěła“. Posledni Christival wotmě so lěta 2008 w Bremenje.

Bamž pućuje do Kawkaza

Vatikan (B/SN). Wot 24. do 26. junija wopyta bamž Armensku, wot 30. septembra do 2. oktobra Azerbajdźan a Georgisku. Jězbu do Armenskeje zwjazuje, chcyjo nochcyjo ze spominanjom na přesćě­howanje Armenjanow přez Osmaniske mócnarstwo před 100 lětami.

Přećiwo neutraliće cyrkwjow

Dóstanu halu spěchowanu

Worklecy. Wopismo wo přizwolenju spěchowanskich srědkow za ponowjenje Worklečanskeje sportownje přepoda dźens za tydźeń statny sekretar w sakskim nutřkownym ministerstwje dr. Michael­ Wilhelm wjesnjanosće Francej Bruskej (CDU). Na swjatočnosći w 17 hodź. planowanski běrow předwidźane dźěła rozłoži a časowy wotběh předstaji.

Wuspěšna inscenacija

Budyšin. 706 dźěći z pěstowarnjow a zakładnych šulow Delnjeje Łužicy je sej z lóštom a wjeselom dwurěčnu inscenaciju Němsko-Serbskeho ludoweho dźiwadła „Zgubjone a namakane – Ein Herz und andere Dinge“ wobhladało. Mjez hosćimi běchu tež 404 dźěći w Danskej. NSLDź zliči tuž w tutej hrajnej dobje 1 110 přihladowarjow na 17 předstajenjach.

Šek za šulski twar

Wojerecy. Sakska ministerka za kultus Brunhild Kurth (CDU) je Wojerowske­mu spěchowanskemu centrumej za ćělnje zbrašenych wčera šek w hódnoće 180 000 eurow přepodała. Cyłotne kóšty 450 000 eurow za třěchu Sakska tuž po 40 procentach spěchuje. Ze swojim wopytom chcyše ministerka wosebje dźěło centruma hódnoćić.

Prěnja zjawna hra wubranki

Nutřkowny wutwar noweje pěstowarnje w Chrósćicach postupuje. Naš fotograf je dźensa Douglasa Pfenniga z Budyskeje dłóžičkarskeje firmy Kern při dźěle zetkał. Gmejna planuje, nowe dźěćace přebywanišćo spočatk přichodneho šulskeho lěta přepodać. Wone wostanje kaž dotalne w nošerstwje Serbskeho šulskeho towarstwa. Foto: SN/Maćij Bulank

W februaru bě koncern Bombardier připowědźił, w Budyšinje a Zhorjelcu 930 dźěłowych městnow šmórnyć. Zapósłanc Sakskeho krajneho sejma Marko Šiman (CDU) so sylnje za jich zachowanje zasadźa. Bianca Šeferowa je so z nim rozmołwjała.

Što woznamjenja wottwar dźěłowych městnow za Budyšin?

M. Šiman: Za mnje je wažne, zo so w regionje telko industrijnych městnow kaž jenož móžno zachowa. Dokelž wot jednoho dźěłoweho městna dalše městna dodawaćelow wotwisuja. Njemóžemy tuž předwidźanu dimensiju wottwara akceptować. Njeakceptuju tež, zo so knježerstwo na socialne plany spušća.

Što sej Wy žadaće?

M. Šiman: Trjebamy strategiju we wobłukach­, w kotrychž hodźi so statna popěra. Předewšěm měł stat podpěrać slědźenje a wuwiwanje, štož by wažny signal kanadiskemu koncernej był.

W kotrej formje so za Budyske stejnišćo zasadźeće?

Radźe za serbske naležnosće Sakskeje a Braniborskeje so schadźowałoj

Drježdźany (SN/MkWj). Zo byštej sej nazhonjenja wuměnjałoj, schadźowaštej so wčera Radźe za naležnosće Serbow Braniborskeho krajneho sejma a Swobodneho stata Sakskeje w Drježdźanach.

Jedne z ćežišćow posedźenja w sakskim sejmje bě skutkownosć noweho Serbskeho zakonja we Braniborskej kaž tež wotpowědneho Serbskeho zakonja w Sakskej. Zastupnicy Braniborskeje informowachu w tym zwisku wo aktualnych prócowanjach, krajny plan k ze­sylnjenju delnjoserbskeje rěče nastajić. Porno tomu widźi sakska serbska rada će­žišćo swojeho dźěła, konsekwentnje zwoprawdźić w Sakskej hižo wobzamknjene naprawy k zachowanju a wožiwjenju serbskeje rěče, kaž ze zhromadneje nowinskeje zdźělenki wobeju radow wuchadźa. Přezjedni sej wčera běchu, zo matej wobaj planaj za zachowanje serbskeje rěče a kultury wulki wuznam.

Konkretny pokiw z posedźenja Rady za serbske naležnosće Sakskeje wo starosćach při wabjenju za serbski wučerski dorost bě přičina, zo wopyta ministerka dr. Eva-Maria Stange Institut za sorabistiku na Lipšćanskej uniwersiće.

Lipsk (SN/MiR). Sakska statna ministerka za wědomosć, wuměłstwo a slědźenje dr. Eva-Maria Stange (SPD) bě sej zańdźeny pjatk chwile wzała za rozmołwu z jednaćelskim direktorom instituta prof. dr. Edwardom Wornarjom. Nošna tema zetkanja bě dalše wabjenje za wučerstwo. „Wučba serbšćiny ma so zawěsćić“, informuje ministerstwo na naprašowanje SN. Połdra hodźiny wěnowaše so dr. Stange naležnosćam instituta, jeho sobudźěłaćerjow a tam studowacych kaž tež tuchwilnemu stawej skutkowanja a perspektiwam zarjadnišća. Mjez wobdźělnikami běchu tež studenća wučerstwa a sorabistiki, kotřiž rysowachu ministerce swoje wočakowanja na studij. „Při tym so wujasni, zo by internacionalizowanje atraktiwnosć studija polěpšiło“, zdźěli prof. Wornar.

Na třěše noweje hródźe Hrańčanskeho dejneho kombinata, kotryž přisłuša agrarnej AG Sorabia, bě Porchowska firma Solardirect tele dny solarnu připrawu instalowała. Z njej chcedźa w Hrańcy zastaranje kombinata z milinu zawěsćić. Mjeztym je cyła třěšna płonina, pokazowaca do směra na Lejpold/Chrósćicy, z modulemi pokryta. Wokomiknje wukonjeja fachowcy poslednje trěbne dźěła na modernej připrawje, kotraž ma solarnu milinu do syće kombinata dodawać. Foto: Jan Kral

Karlsruhe (dpa/SN). Słaba opozicija w časach wulkeje koalicije nima prawo na wosebite kontrolne kompetency. Tole je Zwjazkowe wustawowe sudnistwo dźensa rozsudźiło, wotpokazawši skóržbu Lěwicy. Narok na wjace prawow opozicije njeje we wustawje zakótwjeny, sudźeše 2. senat w Karlsruhe. W zwjazkowym sejmje matej opoziciskej frakciji Zelenych a Lěwicy zhromadnje 127 z cyłkownje 630 mandatow, potajkim něhdźe 20 procentow. Tak pak stej přesłabej, zo móhłoj přećiwo wulkej koaliciji CDU, CSU a SPD we wustawje zapisane kontrolne prawa zwoprawdźić, za čož je štwórćina wšěch zapósłancow trěbna. Lěwica chcyše změnu wustawy z nišimi hranicami přesadźić. Prezident Zwjazkoweho wustawoweho sudnistwa Andreas Voßkuhle drje na to skedźbni, zo je kontrola parlamenta w zajimje wšeje towaršnosće. Přiwšěm njejsu prawa parlamentariskich mjeńšin na opoziciju wobmjezowane. Tele prawo maja wšitcy zapósłancy. Zawjesć wosebite prawa jeno za opoziciju by zasadu wo runoprawosći zapósłancow raniło.

Berlin (dpa/SN). Zwjazkowa kanclerka Angela Merkel (CDU) spušća so w roze­stajenju z AfD po swójskich wuprajenjach na „dobre argumenty“. „Njeje noweje strategije“, rjekny wona dźensa na wopyće w jednej z Berlinskich šulow. Přiwšěm je wažne, ludźom hišće nazornišo wuswětlić, kotre přeswědčenja nas nawodźeja, Merkel rozłoži. „Mamy dosć argumentow, so z AfD rozestajeć, bjez złeje wole a bjez předsudkow.“ Wolerjow AfD chcyła wona po tymle puću wróćo zdobyć.

Přihłosowanje woteběra

Berlin (dpa/SN). Wjetšina wobydlerjow Němskeje ma demokratiju dale za najlěpšu statnu formu, přihłosowanje pak je minjene lěta woteběrało. Po dźensa wozjewjenym wuslědku woprašowanja instituta Forsa ma 88 procentow woprašanych ideju demokratije porno druhim statnym formam za najlěpšu. Lěta 2008 bě hišće 95 procentow toho měnjenja. Na wuchodźe měješe tehdy 93 proc. ludźi demokratiju za dobru wěc, dźensa jenož­ hišće 81 proc.

Žurnalisća wohroženi