Swoju móšeń zhubił je paduch w Bochumje. Do toho bě wón z wjaceswójbneho domu telewizor a kompjuter pokradnył, po tym zo bě bydlenske durje na druhim poschodźe namócnje wočinił. Zawostaji pak jasne slědy: móšnju z wosobinskimi dokumentami. Policija móžeše 34lětneho paducha na to zajeć a zawěsćić, zo „mamy tola hišće tajke něšto kaž sprawnosć.“
Sto lět stare čłowječe kosće su při twarskich dźěłach w sewjernych Smolinach našli. Přičina smjerće njeje hišće znata, za dalše přepytowanja na městnje namakanki su mjeztym fachowca krajneho zarjada za hladanje pomnikow a archeologiju skazali. Wobsedźer ležownosće w saksko-anhaltskim Ilsenburgu bě dźěru za swimmingpool rył. Při sylnym dešću so sćěna sypny a wotkry nopaj kaž tež wjacore kosće.
Wojerecy (SN/at). We Wojerecach je so wobłuk hospodarske spěchowanje do radnicy wróćił. Za to su w najblišej wokolinje wyšeho měšćanosty Stefana Skory (CDU) nowe dźěłowe městno wutworili, wo čimž bě Skora na aprylskim posedźenju měšćanskeje rady informował. Za tele městno bě so po słowach měšćanskeho nowinarskeho rěčnika Manfreda Wiemera 40 zajimcow požadało, z dźesaćoch we wušim wuběrje přesadźi so 29lětna Franziska Tennhardt. 17. meje je wona swój prěni kruty, to rěka njewobmjezowany job nastupiła.
„Smy nastupajo hospodarske spěchowanje we Wojerecach wšelake warianty pospytali, na přikład je do měšćanskich tzwr wurjadować“, rjekny Skora při přistajenju noweje sobudźěłaćerki minjeny štwórtk we Wojerowskej radnicy. Wuspěšne to wšo njebě. Mjez čołom radnicy a přemysłownikami njeje so trěbna komunikacija rozwiła. Takrjec jako prawa ruka wyšeho měšćanosty ma so nětko nowa hospodarska spěchowarka wo to starać.
Budyšin (K/SN). Wyši měšćanosta sprjewineho města Alexander Ahrens (njestronjan) bě tele dny nawodnych Budyskich komunalnych kaž tež stronskich politikarjow přeprosył na schadźowanje, zo by z nimi hromadźe rozjimał połoženje, ,,nastate w zwisku z ćěkancami“. We wuslědku zeńdźenja wozjewi Zwjazkarstwo za Budyšin wosebity „Budyski apel“, kotryž su wšitcy wobdźělnicy podpisali. Nimo Ahrensa běchu to předsyda frakcije SPD w měšćanskej radźe Roland Fleischer, předsydka frakcije Lěwicy w měšćanskej radźe Angela Palm, předsyda frakcije Wobydlerske zwjazkarstwo w měšćanskej radźe Steffen Tech, předsyda městneje organizacije Lěwicy Rüdiger Thürling a městopředsydka frakcije Wobydlerske zwjazkarstwo w měšćanskej radźe Karin Kluge.
Ratarjow podpěrać a jich poradźować je zaměr sakskeho krajneho zarjada za wobswět, ratarstwo a geologiju. A přiznawam, běch dźensa chětro překwapjena, w kotrym wobjimje tole činja. Na přepytowanskich polach w Dubrawce pola Barta plahuja najwšelakoriše žitne družiny. Tam přepytuja do parcelow zrjadowane rostliny pod wšelakimi wuměnjenjemi, na přikład hnojenja. Tak wuwiće wšelakich družin žita dokumentuja a wuslědki wuhódnoćeja. We wobłuku pólnych dnjow móža so ratarjo wobhonić a staw wuwića rostlin posudźować.
Wažny to nadawk, kotryž sobudźěłaćerjo wobswětoweho zarjada z wulkim angažementom wukonjeja. Při tym je jim tež aktualne ćežke połoženje burow wědome. Tuž chcedźa jich wězo wotpowědnje poradźować. Wosobinski kontakt a wuměna nazhonjenjow stej při tym bytostnej. Bianca Šeferowa
Waršawa (dpa/SN). W zwadźe wo Pólske wustawowe sudnistwo narodnokonserwatiwne Waršawske knježerstwo komisiji Europskeje unije wumjetuje, zo swoje kompetency překroča. „Brüssel chce superknježerstwo być. To njeje w porjadku“, rjekny nutřkowny minister Mariusz Blaszczak wčera powěsćowemu sćelakej TVN 24. „Knježa komisije EU su wot woprawdźitosće daloko zdaleni. Komisija je swoju wěrjomnosć zhubiła“, zwurazni Blaszczak hladajo na to, zo su dokumenty wo běžnych jednanjach mjez EU a Pólskej do zjawnosće přišli.
Komisija Europskeje unije bě Pólskej wčera ultimatum stajiła. Wona měła dwěle na najnowšej sudniskej reformje wotstronić, kotraž po měnjenju kritikarjow justicu kraja lemi. Njedyrbjała-li Waršawa reagować, chce komisija EU wotpowědne jednanje přećiwo krajej zahajić. Pólski wonkowny minister Witold Waszczykowski je tole wčera w Brüsselu kritizował. „To je procedura, kotraž europske zrěčenje daloko přesahuje. Tajkej uniji njejsmy swój čas přistupili.“
Budyšin (CS/SN). Budyska rozmołwa wčera wječor w Schillerowym gymnaziju zaběraše so z temu „Migranća jako sobušulerjo“. Nawoda regionalneho zarjada Sakskeje kubłanskeje agentury w Budyšinje (SBAB) Mathias Peter měješe jenož mało praktiskeho přinošować. To běchu słowa přitomnych pedagogow wjace wuprajace. „Najlěpša integracija je wulka přestawka“, rjekny jedna wučerka, „hłownje sobušulerjo so wo to staraja, zo so dźěći z migraciskim pozadkom w zhromadźenstwje přiwzaći čuja.“ Wona pak njezataji tež problemy, hdyž muscy šulerjo z arabskich krajow wučerki njeakceptuja.