Z wudaća: wutora, 24 meje 2016

ST Zeleno-běli Bukecy

– SJ Chrósćicy 4:1 (0:0)

Zestawa hosći: Králíček – Dehn, Teichmann, Šafář, Dórnik, Kunze (34. Zahrodnik), Runt, Domaška, Młynk (74. Latkolik), Šmit, Věchet

Z chětro skromnym kadrom podachu so koparjo Chróšćanskeje SJ minjenu sobotu na dypkowu hru do Bukec. Nimo Cyža a Žura pobrachowachu tež hišće Schulze, Bětnar, Šiman a Pöpel. Tak dyrbješe so samo zaso kotrenar SJC Latkolik hrajnu drastu woblec. Njedźiwajcy toho Chróšćenjo partiju wot spočatka postajachu a mějachu Bukečanow kruće w rukach. Stoprocentowsku móžnosć pak přiwšěm wuwostajichu. Po přihrawce Runta móhł Věchet wrota třělić, k zadźiwanju fanow a sobuhrajerjow pak to nječinješe. Hosćo mějachu přez derje wuhrate kombinacije dalše šansy. Falowaceje konsekwency w zakónčenju dla pak so ničo naspomnjenjahódne njesta. Tak dźěše z 0:0 do kabiny.

Vatikan (B/SN). Bamž Franciskus je měšnikam a dostojnikam cyrkwje porokował, zo swoju rólu lajkam napřećo nadhódnoćeja. „Klerikalizm zabywa, zo słušatej widźomnosć a sakramentalnosć cyrkwje wšemu ludej Božemu, a nic jeno někotrym wuzwolenym“, rěka w njedawno wozjewjenym lisće swjateho wótca. Duchowni su runja wšitkim tamnym přez křćeńcu najprjedy jónu lajkojo.

Pruwuja wukubłanje měšnikow

Wien (B/SN). Centralna Vatikanska kongregacija za klerus dźěła na nowych směrnicach za wukubłanje měšnikow. Přičina za to su změny dušepastyrskich metodow w cyrkwi. Wjetšu wahu změjetej nětko kulturny kontekst kaž tež prewencija znjewužiwanja, podšmórny sekretar kongregacije, arcybiskop Jorge Carlos Wong.

Duchowneju wuswobodźić

Móža šćežku nětko twarić

Kamjenej. Kolesowansku šćežku po­dłu zwjazkoweje dróhi B 96 mjez Kamjenej a Stróžu móža twarić. To zdźěli dźensa Marko Šiman, zapósłanc CDU w Sakskim krajnym sejmje. Zwjazkowe zarjadniske sudnistwo je minjeny tydźeń skóržbu wobydlerja přećiwo šćežce na jeho ležownosći wotpokazało. Šiman bě hižo lěta 2009 twar šćežki nastorčił.

Přeslědźa stawizny Šleskeje

Lipsk/Wrócław. Wědomostnicy Uniwersitow Lipsk a Wrócław su slědźenski projekt wo šleskich kulturnych stawi­znach zahajili. W nim chcedźa teksty z najwšelakorišich wobłukow politiki, nabožiny, rěče, literatury a kubłanja analyzować, kaž Lipšćanska uniwersita zdźěla. To je prěnje wědomostne přepytowanje kulturnych tradicijow kónčiny.

Přičina wohenja wujasnjena

Ratarjam družiny rostlin a jich kajkosće rozłožili

Bart (SN/BŠe). Sakscy ratarjo su hižo dlěje w ćežkim połoženju. Płaćizny mloka a druhich ratarskich wudźěłkow su tak niske kaž hišće ženje. Ćim bytostniše je, wobhonić so wo móžnych produkciskich srědkach, kiž su hospodarsce rentabelne a kotrež snano tež wunoški stopnjuja.

Z centralnym zarjadowanjom „Hlejće, tamle je čłowjek“ zahaja jutře na Lipšćanskim hłownym torhošću stoty zjězd katolikow. Tež Serbja budu tam zastupjeni, kaž je Janek Wowčer wot předsydy TCM Jurja Špitanka zhonił.

Štó Serbow w Lipsku hłownje zastupuje?

J. Špitank: Serbscy měšnicy su Towarstwu Cyrila a Metoda nadawk dali, so wo serbski podźěl starać. Tole rady přewzachmy a móžachmy dalše towarstwa zdobyć.

Što maće konkretnje planowane?

J. Špitank: Změjemy swoje stejnišćo a jewišćo na cyrkwinskej mili na Grimmaskej pod hesłom „Katolscy Serbja“. Tam poskićimy jutře po zahajenju zjězda program z chórom Meja, z młodźinskej band Con-takt, ze Serbskej rejwanskej skupinu Smjerdźaca kaž tež ze saksofonistom Danielom Matku. Moderaciju změjetaj Diana Fryčec-Grimmigowa a Roman Nuk. Smjerdźečenjo předstaja so tež na jewišću Drježdźansko-Mišnjanskeho biskopstwa na hłownym torhošću.

Što poskićiće hišće na stejnišću?

Budyšin/Drježdźany (SN/at). Rjemjeslniske zawody w Budyskim wokrjesu posudźuja swoje tuchwilne połoženje jako tak dobre, kaž bě wone hižo raz před pjeć lětami. Tole zwěsća nalětnja analyza konjunktury Drježdźanskeje rjemjeslniskeje komory. Kaž komora zdźěla, bilancuje 43 procentow woprašanych firmow tuchwilu dobre wobchodne połoženje, 51 proc. wuchadźa w přichodźe ze spomóžnych nadawkow a 37 proc. liči bórze ze stupacymi wobrotami.

We wobłuku Drježdźanskeje rjemjeslniskeje komory njeje Budyski region čerwjenu latarnju wotedać móhł, z wuslědkow naprašowanja pak su pozitiwne znamjenja wučitać. Byrnjež tam najwjetše straty nastupajo nadawki a wobrot byli, běchu pušćenja snadnuške. Woprašane firmy běchu přerěznje po 80 procentach wućežene, to je pjeć procentow wjace hač loni nalěto. Tež w Zhorjelskim wokrjesu su 80 proc. docpěli. Prezident komory dr. Jörg Dittrich rěči wo „najlěpšej nalětnjej naledźe po pjeć lětach“ w Budyskim regionje. Aktualne wuwiće pola Vattenfalla a Bombardiera jeho znjeměrnja. Tak so Dittrich praša, kak ma tam dale hić.

Rostow nad Donom bě zańdźeny tydźeń přebywanišćo dweju šulerjow Wojerowskeho Lessingoweho gymnazija. Wčera su jich sobušulerjo w awli kubłanišća zaso domoj witali.

Wojerecy (UH/SN). Wuknjacy Wojerowskeho Lessingoweho gymnazija su wčera swojeju sobušulerjow, 15lětneho Benedikta Leonhardta z rjadownje 10c a 17lětneho Felixa Roßdeutschera z 11. lětnika, zaso w domiznje witali. Benedikta a Felixa bě šula na němsko-ruske šulerske wubědźowanje do Rostowa nad Donom delegowała, kotrež wotměwa so wot lěta 2011 pod hesłom „Wědomosć w swětle jewišća“. Lětuše wubědźowanje traješe wot 15. do 22. meje. Šěsć wobdźělnikow, třo němscy a třo ruscy šulerjo, tam nastupi. Sulšečan Benedikt Leonhardt, kiž je serbskeho pochada, je wo serbskich tradicijach a wašnjach powědał a wurisanje ze swojim wobrazliwym a zabawnym wašnjom dobył. Druhi bu Felix, kiž je wo atomowej energiji referował a poměrnje suchu temu jako lubosćinsku podawiznu rysował. Rozsudźił bě publikum wo najlěpšim přednošowarju z přikleskom.

Berlin (SN). We wobłuku FUEN-kongresa we Wrócławju je so mjeńšinowa rada Němskeje ze społnomócnjenym zwjazkoweho knježerstwa za prašenja wusydlencow a narodne mjeńšiny, zapósłancom zwjazkoweho sejma Hartmutom Koschykom (CSU), zetkała. W rozmołwje přihotowachu debatu zwjazkoweho sejma wo tym, kak zwoprawdźić zakładnu papjeru „Charta-rěče w Němskej – zhromadna zamołwitosć“. Debata ma so hišće w tutej wólbnej periodźe přewjesć, kaž mjeńšinowy běrow zdźěli.

„Jara dobra kooperacija z knjezom Koschykom a jeho iniciatiwa, debatu nanajpozdźišo 2017 zwoprawdźić, nas zwjesela. Je to wažny měznik našich prócowanjow, škit mjeńšinowych rěčow a regionalneje rěče delnjoněmčiny jako wšotowaršnostny nadawk etablěrować“, rjekny předsyda mjeńšinoweje rady Jon Hardon Hansen. Tež w Zwjazkowej radźe chcedźa debatu forsěrować. Aktualnje diskutuje mjeńšinowa rada wo tym, rozšěrić paragraf 184 zakonja wo rěči před sudnistwom, kotryž Serbam hižo zaruča serbšćinu nałožować.

Kijew (dpa/SN). Při bojach mjez jednotkami ukrainskeho knježerstwa a proruskimi separatistami je sydom ukrainskich wojakow padnyło. Dźewjeć dalšich so zrani, zdźěli nawoda Narodneje wěstotneje rady Aleksander Turčinow dźensa w Kijewje. Wina na tym je wojersko-politiske nawodnistwo Ruskeje, wón rjekny. W Moskwje su wumjetowanja mjeztym wotpokazali. Separatisća ukrainske­- mu wójsku wumjetuja, zo rozestajenja stajnje zaso prowokuje.

Za strowotnisku kartu

Hamburg (dpa/SN). Prezident zwjazka lěkarjow Němskeje Frank-Ulrich Montgomery žada sej, strowotnisku kartu za ćěkancow zawjesć. Do zahajenja zjězda lěkarjow w Hamburgu wón dźensa rjekny: „Požadarjo azyla a ćěkancy trjebaja tajku kartu, zo móhli so lěpje do strowotniskeho systema integrować.“ Lěpši přistup k strowotniskemu systemej rozšěrjenju chorosćow zadźěwa a zniža lěkowanske kóšty, Montgomery wuzběhny.

Merkel dwěluje