Mortkow (SN/mwe). Mortkowska Jakubecec twjerdźizna je mnohim za swójbne zarjadowanja přewšo dobra adresa. Tak tam ludźo rady kwasuja a narodniny swjeća, dalši sej z přećelemi a znatymi na kofej wuleća a zaso druzy dadźa sej twjerdźiznowe spektakle lubić.
Mějićel areala André Jakubetz našemu wječornikej praji, zo je koncept zarjadowanjow wosebje na hosći z blišeje wokoliny wusměrjeny. Mortkow dźě leži mjez městnomaj lětnjeju spektaklow, Čornym Chołmcom a Budyšinom, a tak so wudani tež tu zajimawe kulturne podawki dožiwić. Tak wuhotuje tam 2. a 3. septembra Serbski ludowy ansambl Hrodowu nóc, a to mjeztym štwórty raz.
Hamorska gmejnska rada je wutwarej zetkawanskeho srjedźišća na třećim poschodźe Hamorskeje swobodneje srjedźneje šule přihłosowała. Nětko su radźićeljo planowanske wukony wudźělili.
Hamor (AK/mwe/SN). Gmejna Hamor chce swoju swobodnu srjedźnu šulu dale wutwarjeć a w njej centrum za wobydlerjow a towarstwa zaměstnić. Nadawk planowanja dósta inženjerski běrow dr. Armin Ussath z Krušwicy, a to we wobjimje něhdźe 180 000 eurow. „Cyła twarska naprawa płaći něhdźe 1,1 milion eurow“, zdźěli hłowny hamtski nawoda Arian Leffs radźićelam na njedawnym zeńdźenju gmejnskeho parlamenta. „Gmejna bě próstwu wo wšelake spěchowanske srědki stajiła. Wuměnjenje za to běchu předležace twarske dowolnosće. Dokelž je swobodna šula wotpowědnje sakskemu twarskemu porjadej wosebity objekt, dyrbja so wšitke přetwarjenske naprawy dowolić. Z předležacym wobzamknjenjom smy za to wuměnjenja tworili“, hamtski nawoda podšmórny.
Kulow (SN). We wobłuku lětušeho Krabatoweho swjedźenja, kotryž wotměje so wot 12. do 14. awgusta w Kulowje, přewjedu młodźi medicinarjo a studenća registrowansku akciju za Němsku dataju darićelow mozowca (DKMS).
Akciju „Kulow w boju přećiwo krejnemu rakej“ chcedźa přewjesć njedźelu, 14. awgusta na Kulowskim torhošću w času wot 10 do 18 hodź. Informaciske zarjadowanje k tomu wotměje so hižo dźensa, w 19.30 hodź. w Forrellowym centrumje ewangelskeje cyrkwje w Kulowje. Tam móža zajimcy a zwólniwi darićeljo zhonić, što DKMS je a kak typizacija kreje wotběži.
Wojerecy (SN). Załožba Łužiska jězorina spěchuje mjez druhim wulki Wojerowski chór. Klětu čini to we wobłuku projekta „The Armed Man – A Mass For Peace“. Gmejna Sprjewiny Doł móže so tohorunja při přewjedźenju stanowanskeho lěhwa na pjenježnu podpěru załožby wjeselić. Pozitiwnu wotmołwu na požadanje za spěchowanje dóstaštej dale gmejna Halštrowska Hola a Wojerowski sportowy klub. Tež přichodnje chce załožba wosebje towarstwa a gmejny podpěrać. Zajimcy móža hač do 23. septembra swoje próstwy za spěchowanje zapodać. Wuměnjenje je, zo su to projekty we wobłuku strowotnistwa, zo skića pomoc staršim ludźom kaž tež młodźinje.
Pruwuja wotewrjenske časy
Budyšin (SN). Budyski wobydlerski serwis ma wotnětka hinaše wotewrjenske časy. Přičina toho je změna organizatoriskeje struktury w zarjadnistwje. Zarjad je póndźelu a wutoru wot 8.30 do 12 hodź. a 13 do 16 hodź., srjedu wot 8.30 do 12 hodź., štwórtk wot 8.30 do 12 hodź. a 13 do 18 hodź. kaž tež pjatk wot 8.30 do 12 hodź. přistupny. Testowa faza skónči so kónc lěta. W času wot 1. do 12. awgusta wostanje wobydlerski serwis zawrjeny.
Chorownju wopytała
Z awtom so wjacekróć přećisnyła
Dobrošecy. Na statnej dróze S 109 mjez Budyšinom a Dobrošecami je młoda šoferka Rovera wčera popołdnju kontrolu nad wodźidłom zhubiła. W dołhej prawej křiwicy zjědźe wona z awtom z dróhi wjacore metry hłuboko a so wjacekróć přećisny. Ćežko zranjenu dyrbjachu žonu do chorownje dowjezć.
Njeskutkaj wujasnjenej
Zhorjelc. Kaž Zhorjelska policajska direkcija wčera zdźěli, je komisariat za cwólbowu kriminalitu po wobšěrnych slědźenjach dwě zadobywani do wuchodosakskeju hrajneju salonow wujasnił. Lětsa 14. februara w Budyšinje a 9. měrca w Lubiju běštaj so rumunskaj staćanaj w starobje 25 a 28 lět do tajkeju salonow zadobyłoj a tam dohromady 20 000 eurow pokradnyłoj.
Moskwa (dpa/SN). Chětro hněwnje su w Ruskej na rozsud Mjezynarodneho sportoweho sudnistwa (CAS) reagowali, kotrež je ruskich lochkoatletow z olympiskich hrow w Rio de Janeiru wuzamknyło. Wonkowne ministerstwo w Moskwje rěčeše wo „złóstnistwje přećiwo sportej“. Rozsud sportoweho sudnistwa mjenowaše rěčnica Marija Sacharowa politisce motiwowany a hrožeše „zamołwitym tuteje kampanje“ z konsekwencami. Minister za sport Ruskeje Witalij Mutko namołwješe sportowcow, před ciwilnymi sudnistwami kraja přećiwo wusudej CAS skoržić.
Wjace chwile za wustup z EU
Paris (dpa/SN). Francoski prezident François Hollande je zwólniwy, Wulkej Britaniskej wjace chwile za přihoty jednanjow wo wustupje kraja z Europskeje unije přizwolić. To zdźěli wón na nowinarskej konferency z nowej britiskej premierministerku Theresu May, po tym zo běštaj wo tym wuradźowałoj. Hollande pak kóždežkuli jednanje wotpokazuje, dołhož njeje Wulka Britaniska próstwu wo wustup kraja z EU oficialnje zapodała.
Pjećo w přepytowanskej jatbje
Tež na najwotležanišich twarnišćach njejsu dźěłaćerjo před kontrolemi čornodźěła dla wěsći. Hłowny cłowny zarjad w Augsburgu je swojich zastojnikow wčera na 2 224 metrow wysoki Nebelhorn pola bayerskeho Oberstdorfa pósłał, hdźež tuchwilu nowy panoramowy hosćenc nastawa. Mjez 37 dźěłaćerjemi su cłownicy woprawdźe wjacore přeńdźenja zakonjow zwěsćili. Dokelž powjaznica twarskich dźěłow dla njejězdźeše, wšak dyrbjachu woni pěši na horu.
Přechutnje brał je Stuttgarćan kriminalku w telewiziji a je policiju wołał. 46lětny bě na schodźe wjaceswójbneho domu słyšał, kak něchtó žonu wudrěwuje, dokelž bě mandźelstwo łamała. Wuchadźejo z toho, zo jedna so wo njeskutk, wołaše muž policiju. Durje bydlenja pak wočiništej sotře w starobje 14 a 16 lět, kotrejž běštej film hladałoj.