Z wudaća: wutora, 26 julija 2016

W zwadźe smjerdźateju nohow dla je muž sobujěducemu w ćahu plistu wottyknył. W ćahu z Basela do Berlina dóńdźe wčera k rozestajenju, jako bě sej 54lětny črije zuł a noze na prózdne sedło pódla 32lětneho wupřestrěł. Tón so smjerda dla hóršeše a noze skónčnje z ławki suny. Na to so wobaj wurěčowaštaj, doniž so młódši z njeju z plistu za smjerdźatej noze „njepodźakowa“. Na dwórnišću w Göttingenje policija mužomaj dalejězbu zakaza. 32lětny dósta skóržbu ranjenja ćěła a 54lětny křiwdźenja dla.

Z basketballoweho saka wuswobodźić dyrbješe Bremenska wohnjowa wobora 17lětneho młodostneho. Tón bě na sćežor zalězł a so z nohu w saku zapopadnył. Tež sobuhrajerjo jemu pomhać njemóžachu. Wohnjowi wobornicy tuž přijědźechu a stajichu młodostnemu rěbl, po kotrymž wón dele zalěze.

Krakow (dpa/SN). Bjezposrědnje do zahajenja swětoweho zetkanja młodźiny z bamžom Franciskusom su tysacy putnikow do Krakowa dóšli a dojěli. Wokoło hłowneho dwórnišća druheho najwjetšeho města Pólskeje a w historiskim centrumje su młodźi ludźo na dróhach a naměstach prezentni. Mnozy maja chorhoje swojich krajow sobu a su w drasće, z kotrejž so jako wobdźělnicy swětoweho zetkanja identifikuja. Po cyłym měsće kaž tež na lětanišću dobrowólni pomocnicy na informaciskich stejnišćach hosćom při orientowanju abo při pytanju za kwartěrami pomhaja. Něhdyši pólski bamž Jan Pawoł II. (1920–2005), kiž bě lětdźesatki w Krakowje skutkował, je na plakatach wšudźe prezentny.

Cyłkownje je so na swětowe zetkanje, kotrež dźensa wječor z Božej mšu pod hołym njebjom zahaja, wjace hač poł miliona młodych katolikow ze 187 krajow přizjewiło, mjez nimi 15 500 z Němskeje. Zarjadowarjo pak wočakuja dohromady hač do połdra miliona wopytowarjow.

Nowa debata wo rentach a dźěłowym času w Němskej

Berlin (dpa/SN/MkWj). Debata wo rentach w Němskej so nimale wšědnje z nowymi namjetami wožiwja. Najnowši nastork přińdźe ze stron Kölnskeho Instituta němskeho hospodarstwa. Tón je wčera namjetował, rentowu starobu hač do lěta 2030 na 69 lět a hač do lěta 2041 samo na 73 lět zwyšić. Přiběrace renty njehodźeli so dołhodobnje hinak wurunać, zdźěli jednaćel instituta Hubertus Bardt nowinarjam. Wón w tym zwisku na to skedźbni, zo doba, w kotrejž ludźo rentu dóstawaja, tak dołho traje kaž hišće ni­hdy. Loni bě wona pola žonow wo 22,8 a pola muži na nimale 19 lět přiběrała. Strony kaž tež dźěłarnistwa namjet Bardta jako njesocialny wotpokazuja.

Ministerka za dźěło a socialne Andrea Nahles (SPD) bě hižo minjeny tydźeń nowu diskusiju wo rentach nastorčiła. Wona připowědźi, zo chcyła renty na wuchodźe a zapadźe přichodne lěta přibližić. Kaž so wotbłyšćuje, dyrbja so přichodne generacije z nišimi rentami wotnamakać, zo njeby so rentowy system sypnył. Tež to bě razne diskusije zbudźiło.

Tema renta ludnosć tuchwilu zaso raz znjeměrnja. Zwjazkowa ministerka za dźěło a socialne Andrea Nahles (SPD) je z wotpowědnym naćiskom zakonja wo přiměrjenju hódnoty jednoho rentoweho dypka za wuměnkarjow we wuchodnych zwjazkowych krajach na jednotny niwow ze zapadom diskusiju wuwabiła. Kritikarjo su z faktami rozjasnić spytali, zo njeje plan ministerki wuwaženy dosć. Boju so, zo słušeja ći, kotřiž podadźa so na wuchodźe přichodne lěta na zasłuženy wuměnk, znowa k přěhračkam rentoweje politiki zwjazkoweho knježerstwa. A hdyž Kölnski Institut němskeho hospodarstwa nětko do swěta trubi, zo měła so zastupna rentowa staroba samo hač na 73 lět zwyšić, čuja so ći na wuchodźe zaso wosebje po­trjecheni. Byrnjež to ministerka Nahles jasnje wotpokazała, njemóžu sej předstajić, zo móžeš ludnosć z tajkimi powěsćemi zaso tróšku změrować. Axel Arlt

Mnichow (dpa/K/SN). Po móžnym islamistiskim bombowym atentaće w Ansbachu rozmysluja politikarjo wo raznišich wěstotnych naprawach a wo sćěhach za azylowu politiku. Bayerski premier Horst Seehofer (CSU) chce wjac policistow zasadźić. Nutřkowny minister Badensko-Württembergskeje Thomas Strobl (CDU) sej žada, ćěkancow dokładnišo na wěstotu přepruwować.

Philadelphia (dpa/K/SN). W najwjetšim měsće Pennsylvanije Philadelphiji wotměwa so konwent demokratow. Dźens wuzwoli 4 700 delegatow Hillary Clinton za kandidatku na prezidentstwo. Jeje riwala Bernie Sanders namołwi z horliwym apelom, wšitko činić za dobyće Clinton a zadźěwać nastupej Donalda Trumpa. Tón by kraj pačił a njerunosć mjez bohatymi a chudymi powjetšał.

Berlin (dpa/K/SN). Nastupajo móžne znowazawjedźenje smjertneho chłostanja powołuje so prezident Recep Tayyip Erdoğan na lud. Po zwrěšćenym puču je „lud naležnje za to wustupował“, rjekny wón w interviewje z telewiziju ARD, „a dokelž mamy demokratiski prawniski stat, płaći wola ludu.“ Rěčnik Erdoğana İbrahim Kalın ma wotprawjenje pučistow za „fairne chłostanje“.

Zhorjelc (AK/SN). Zamołwići Zhorjelskeho wokrjesa chcedźa ćěkancow dale decentralnje zaměstnić. „To je so w praksy jako dobre wopokazało“, rjekny Werner Genau, decernent za porjad, twarstwo, wobchad a škit před katastrofami, tele dny nowinarjam w Zhorjelcu.

We wokrjesu Zhorjelc přebywa tuchwilu 2 129 požadarjow azyla. 67 procentow z nich je w bydlenjach zaměstnjenych. Wot januara hač do junija registrowachu 691 nowych ćěkancow a 790, kotřiž su wokrjes zaso wopušćili.

Dosć kritisce rozestaja so Werner Genau z wobličenjemi a prognozami Swobodneho stata Sakskeje. Te wšak zamołwitych wokrjesow zamyleja. Tak běchu Zhorjelskemu wokrjesej hišće w nowembrje 2015 na wšě 2 146 nowych požadarjow azyla připowědźili. „Na zakładźe dołhodobnych prognozow bychmy 5 500 nowych městnow zarjadować dyrbjeli. Komuny su stajnje posledni dźěl rjećaza. Swobodny stat ćěkancow rigoroznje dale posrědkuje.“

Piwowa princesna Melina a piwowa kralowna lěta 2016 Laura VII. (wotlěwa) stej dźensa w Berlinje za mjeztym 20. mjezynarodny festiwal piwa wabiłoj. Po 2,2 kilometromaj chce tam wot 5. do 7. awgusta 340 piwarnjow ze 87 krajow swěta swoju chmjelowu brěčku prezentować a předawać. Zamołwići liča z 800 000 lačnymi hosćimi, mjez kotrymiž je dźeń a wjace žonow. Foto: dpa/Jörg Carstensen