Z wudaća: póndźela, 05 decembera 2016

Praha (ČŽ/K). Čěskemu a słowakskemu klankodźiwadłu je so wuznamneho připóznaća dóstało – na Addis-Abebskim schadźowanju mjezynarodneho wuběrka k zachowanju njematerielneho kulturneho dźědźinstwa bu wone do zapisa swětoweho herbstwa UNESCO přiwzate. Po nominaciskim dokumenće bywa čěske klandodźiwadźelenje wuznamny kulturny faktor a towaršnostny fenomen, zrodźeny we 18. lětstotku a masowje rozšěrjeny srjedź 19. lětstotka, hdyž běchu klankodźiwadźelnicy wažni spěchowarjo narodneho wozrodźenja. Słowakski nominaciski dokument zwuraznja, zo su spočatki klankodźiwadła byli w 17. lětstotku wokoło Bratislavy, Košic a Banskeje Bystricy. Hižo prjedy běchu z klankami w kraju wustupowali pućowacy komedianća z Němskeje, Italskeje a Jendźel­skeje. „Ze zapřijećom klankodźiwadła wobeju krajow do zapisa swětoweho herbstwa mytuje so nadstandardne wzajomne zhromadne dźěło w přihotach nominowanja zjawa, kiž je wuraz bliskich kulturnych wjazbow Čěskeje a Słowakskeje“, praji rěčnica ministerstwa kultury ČR Simona Cigánková.

Beneficny koncert skupiny PoŠtyrjoch pjenježny kaž towaršliwy wuspěch

Jaseńca (SN/MWj). Štož su dru­hdźe wjele ludźi wabjace adwentne wiki abo jedyn z mnohich koncertow w cyrkwi, je w Jaseńcy kóždolětny beneficny koncert spěwneje skupiny PoŠtyrjoch a jeje přećelow. Sobotu bě to hižo šesty tajki wječor, na kotryž je wjace hač 120 ludźi přichwatało. Woni njedožiwichu jeno přitulnu serbsku atmosferu w bróžni Floriana Rynča, ale tež lóštny program muskeho kwarteta – zdźěla z podpěru dalšich spěwarjow – a skupiny Přezpólni.

Běła Woda (AK/SN). Ze 17 000 eurami chce město Běła Woda dźěćacy wočer­stwjenski centrum Při Brusniku, tak mjenowany KiEZ podpěrać. To je měšćanska rada tele dny jednohłósnje schwaliła. 17 000 eurow pochadźeja z lětušeho dojednanja města z Vattenfallom za wosebite projektowe spěchowanje. Na te wašnje zaručeja za natwar dyrdomdejskeho hrajkanišća swójski podźěl towarstwa, kotrež so wo wočerstwjenišćo stara. Dyrdomdejnišćo płaći dohromady 74 000 eurow. 70 procentow z toho spěchuje Sakska, 30 procentow kóštow zaruna towarstwo jako swójski podźěl.

Pančicy-Kukow (SN/MWj). Nowu a wosebitu swěčku su sobotu prěni raz na dohodownych wikach w klóštrje Marijinej hwězdźe w Pančicach-Kukowje prezen­towali. Nastała bě wona w dźěłarnjach za zbrašenych swj. Michała, kaž jeje nawoda Andreas Ošika tójšto zajimcam w klóšterskim wobchodźe rozłoži. Z krótkim nyšporom je farar Tomasz Dawidowski swěčku sobotu požohnował.

Wuchadźišćo noweho produkta bě prašenje, za čim klóšter wonja. Za Andreasa Ošiku, kiž bě tu sam něšto lět ministrant, su to hłownje woruch, drjewo a knihi. A wóń tychle třoch su spytali do wosebiteje swěčki zapřijeć. Kupc dóstanje ju na keramiskim talerju, nastatym w dźěłarni za zbrašenych. Połkulowaty pčolacy wósk tež bjez zapaleneje swěčki zajimawje wonja. Tale wóń so hišće zesylni, hdyž tak mjenowanu čajowu swěčku zaswěćiš. Tole móhło runje nětko spodobny hodowny darik być, kotryž poskićeja­ w Pančičansko-Kukowskim klóšterskim wobchodźe runje tak kaž w dźěłarnjach za zbrašenych swj. Michała.

Berlin. Přichodne Serbske blido w Berlinje budźe srjedu, 7. decembra. Wobdźělnicy zetkaja so w 15 hodź. ke koncertej w katedrali swj. Jadwigi. Z Hornjeje Łužicy pochadźacy tachantski organist Tomaš Žur zahraje na Klaisowych pišćelach kompozicije Bacha a Regera. Po koncerće podadźa so wšitcy zhromadnje na bjesadu do hosćenca Einstein Kaffee.

Hala so wotpaliła

Wojerecy. Wšo druhe hač měrny druhi adwent mějachu wohnjowi wobornicy wčera nawječor we Wojerecach. W industrijowej kónčinje bě woheń w prózdnej, 15 króć 30 metrow wulkej hali wudyrił. Jako wobornicy přijědźechu, běchu so płomjenja hižo po wšej hali rozpřestrěli. Dokelž twarjenje hižo wuchować njemóžachu, so woni rozsudźichu ju pod kontrolu wotpalić dać. Strach za wobydlerjow při tym žadyn njewobsteješe. Zasadźenych bě dohromady 15 wohnjowobornych jězdźidłow z wjace hač 50 kameradami z Wojerec, Hórnikec a Ćiska. Kelko škody je woheń načinił, njehodźi so hišće rjec. Kriminalna policija za přičinami slědźi. Dźensa bě fachowc wohnjoweje wobory na městnje, zo by za móžnymi slědami pytał.

Smochćicy (aha/SN). Hódny kubłanski kónc tydźenja je wot minjeneho pjatka do wčerawšeje njedźele Smjerdźečanske swójbne a kubłanske srjedźišćo LIPA za młode swójby w Smochčanskim ­Domje biskopa Bena přewjedło. Wothłós na mjeztym wosme tajke zarjadowanje přiběra, a móžna kapacita bě tónraz ­wučerpana. Wjace hač 50 wobdźělnikow – 13 staršiskich porow ze swojimi 27 dźěćimi­ – ­móžeše tam, kaž je druhi adwentny­ kónc ­tydźenja mjeztym z tradiciju, přijomnu serbsku zhromadnosć z kubłansce zajimawymi přednoškami za staršich dožiwić.

Mjeztym zo starši na přednoški ­słuchachu, starachu so štyri kubłarki wo wotměnjawu­ zaběru z dźěćimi. Wužiwachu z nimi rjane wjedro za wu­cho­dźowanje a paslachu adwentnu a ho­downu­ ­pychu. Samo hru wo swjatym Mikławšu­ nazwučowachu, za čož su so po předstajenju starši tež nazwučowarce Borborje Šeferowej, kotraž bě so tohorunja wo wotpowědne kostimy a rekwizity starała, ze sylnym přikleskom dźakowali.

Pančicy-Kukow. Štóž ma přichodne dny něšto w přizjewjenskim zarjedźe zarjadniskeho zwjazka Při Klóšterskej wodźe wobstarać, njech wobkedźbuje, zo tam jutře, 6. decembra, žane rěčne hodźiny njezměja.

Wopyta pěstowarnje

Pančicy-Kukow (SN). Tradicionelnje zapósłanc Sakskeho krajneho sejma Alojs Mikławšk (CDU) dohodowny čas wužiwa, zo by pěstowarnje swojeho regiona wopytał. Tak so wón zdobom za dźěło a angažement kubłarkow dźakuje. Prěnja bě dźensa dopołdnja pěstowarnja w Pančicach-Kukowje w nošerstwje Křesćansko-socialneho kubłanskeho skutka. Tam přepoda wón wobrazowe ramiki z ćěsta, kotrež móža dźěći hodownje wupyšić. Za najkreatiwniši wobraz smědźa dźěći Zelnakec pjekarnju w Pančicach-Kukowje wopytać.