Zhorjelc (SN/MiP). Hakle před měsacom su njeznaći w Šunowje wopytowarjow w tamnišej Fabrikskej hospodźe wohrožowali, nadběhowali a zranili. Direkcija policije w Zhorjelcu wčera w nowinskej zdźělence wo dalšim podawku informuje, kotryž je so tam stał a w kotrymž kriminalna słužba podhlada nuzowanja, wohrožowanja a zranjenja ćěła dla přepytuje.
Paris/Kijew (dpa/SN). Najebać mjezynarodnu kritiku francoski prezident Emmanuel Macron dale zasadźenje zapadnych wojakow w Ukrainje njewuzamkuje. „Hdyž Rusojo frontu přełamaja a hdyž Ukraina wo to prosy – štož njeje so hač do dźensnišeho hišće stało – potom dyrbjeli sej my tute prašenju stajić“, rjekny Macron nowinarjam. Tole zwoprědka wuzamknyć, by runje hladajo na wottrašenje Ruskeje wopačne było a rěkało, zo njejsmy z wójny minjenju lět žane wučby ćahnyli, francoski prezident rjekny.
Hladajo na łoskoćiwe połoženje na fronće z ruskimi wuspěchami je sej ukrainski prezident Wolodymyr Zelenskyj žadał, njedawno přilubjene brónje USA spěšnje do Ukrainy přiwjezć. „Sym kongresej USA za rozsud dźakowny, tola tež spěšnosć dodawanja a přesadźenje rozsudow njesmětej žadyn problem być“, rjekny Zelenskyj w swojim wšědnym widejowym poselstwje. Po měsacy trajacej ćahańcy bě kongres USA minjeny tydźeń wobzamknył, Ukrainje brónje w hódnoće 61 miliardow dolarow přewostajić.
W dobrym pomjatku ma bamž Franciskus časy, jako bě hišće z ćahom a busom po puću. „Tam běch mjez ludźimi a začuwach jich ćopłotu a jich starosće“, rjekny 87lětny wótc katolskeje cyrkwje měsačnikej italskich železnicarjow. Jako šulski hólčec bě Franciskus wšědnje z ćahom do argentinskeje stolicy Buenos Aires jěł. Dźensa wužiwa wón nimo awta hišće papamobil we Vatikanje a pućuje z lětadłom a helikopterom.
We wólbnym lokalu wotpokazali su wčera bywšeho premierministra Wulkeje Britaniskeje Borisa Johnsona, dokelž njeměješe tón wupokaz sobu. Wotpowědny zakoń bě Johnson swój čas sam přesadźił. Při wčerawšich komunalnych wólbach přińdźe Johnson bjez płaćiweho dokumenta. Sobudźěłaćerjo běchu tuž nuzowani, 59lětneho domoj pósłać. Hač je pozdźišo tola hišće wolił, njeje znate.
Drježdźany (dpa/SN). Sakski krajny sejm je dźensa wo chudobje a kubłanju w swobodnym staće debatował. Wobě temje běchu na próstwu Lěwicy kaž tež křesćanskich demokratow na dnjowy porjad wzali. Do aktualneje hodźiny chcyše justicna ministerka Katja Meier (Zeleni) w knježerstwowej deklaraciji wo wužadanjach za prawniski stat a demokratiju přednošować. Lěwica chcyše zakaz rejowanja wulki pjatk zběhnyć dać.
Sankcije USA přećiwo Ruskej
Washington (dpa/SN). Knježerstwo USA měri so z nowymi sankcijemi wosebje na brónjensku industriju Ruskeje. Potrjechenych je 200 předewzaćow a 80 wosobow w dalšich krajach kaž w Chinje, Belgiskej a Słowakskej, kotřiž pječa Ruskej při wobstaranju materiala pomhaja, financne ministerstwo USA zdźěla. Sankcije maja tež twar chemiskich a biologiskich brónjow w Ruskeje haćić.
Göring-Eckardt wobćežowana
Brüssel/Beirut (dpa/SN). Europska unija chce z pjenježnej pomocu miliardy eurow připućowanje w Libanonje bydlacych ćěkancow ze Syriskeje skónčić. Z pjenjezami EU chcedźa strowotniski, kubłanski a socialny system Libanona zesylnić. Nimo toho su srědki za wěstotne mocy a armeju kraja kaž tež za bój přećiwo pašowarjam a za hospodarske a financne reformy předwidźane. Pomocny paket chcychu we běhu dnja na wopyće prezidentki komisije EU Ursule von der Leyen a prezidenta Cypernskeje Nikosa Christodoulidisa w Libanonje wozjewić. Wosebje cypernske knježerstwo bě přiběracu ličbu syriskich ćěkancow jako njeznjesliwu kritizowało, žadajo sej naprawy EU. Wot spočatka lěta je 4 000 Syričanow z čołmami ze 160 kilometrow zdaleneho Libanona do Cypernskeje dojěło.
Kritikarjo pokazuja na chaotiske poměry w Libanonje, hdźež knježi najćeša hospodarska kriza w stawiznach kraja a wulka korupcija. To wjedźe k wulkim napjatosćam mjez domoródnymi a ludźimi, kotřiž před wójnu w Syriskej ćěkaja.