To a tamne (20.02.23)
Francoski minister za dźěło Olivier Dussopt je wosrjedź parlamentariskeje debaty k diskutowanej rentowej reformje křižowku wuhódał, při čimž jeho lepichu. „Sym hłuposć worał“, wuzna 44lětny politikar minjeny pjatk w sćelaku BFMTV. Dokelž debata hižo dwaj tydźenjej traje a so stajnje přetorhnje, je w přestawce hódančko do ruki wzał a njeje je hižo wotpołožił. Dussopt dyrbi reformu w narodnej zhromadźiznje a tež zwonka njeje přećiwo sylnej kritice zakitować.
Po 25 lětach njewotměwa CDU w Mecklenburgsko-Předpomorskej žanu politisku popjelnu srjedu. Tole su čłonojo strony njedawno rozsudźili. Zwjazkowa CDU je zarjadowanje zapłaćiła a ma nětko hinaše ćežišća. Na zetkanju wobdźěli so 1 000 hosći, tež ze druhich stronow. Jako wurunanje planuja swjedźeń w lěću.
To a tamne (17.02.23)
By-li Bobi čłowjek był, je wón hižo před něšto časom swoje 200. narodniny woswjećił. Pastyrski psyk z Portugalskeje je mjenujcy dobrych 30 lět stary – a kaž wěmy, je sydom psyčich lět telko kaž jedne čłowječe lěto. Tuž zapisa so „najstarši žiwy wšěch časow“ do Guinnessoweje knihi rekordow. Najebać swojeje staroby honi so Bobi po zahrodźe swojeho knjeza Leonela Costa.
Ataka na žurnalistku, při kotrejž je jej choreograf statneje opery Hannovera Marco Goecke psyče howno do mjezwoča zmazał, ma nětko konsekwency. Tak je wón swoje dźěłowe městno jako baletny direktor zhubił. Njepřemysleny nadpad je přejara zasady statneho dźiwadła zranił a domej zeškodźał.
To a tamne (16.02.23)
Ratar je 1 200 kilometrow po Thailandskej nóžkował, zo by so na dnju Walentina ze žonu woženił, kotruž njeje hišće nihdy wosobinsce zetkał. 52lětny Suthep bě 56lětnu předawarku Thanapu před pjeć měsacami w interneće zeznał, jako sej rybowu pastu pola njeje skaza. Thanapa je swojeho Suthepa najprjedy skerje žortnje namołwjała, pěši k njej do daloko zdaleneje južneje prowincy Satun přińć. Suthep je wěc chutnje brał. Na dnju Walentina je wón Satun docpěł a so ze Thanapu zmandźelił.
Nurjerjo francoskeho cłownistwa su pod z Brazilskeje přijědźenej łódźu 180 kilogramow kokaina w hódnoće wjace hač 15 milionow eurow namakali. Nurjerjo běchu něšto spodźiwne při łódźi pod wodu wuhladali a to bliže přepytowali, zarjad wčera zdźěli. Kapitana łódźe su cłownicy najprjedy raz zajeli.
To a tamne (15.02.23)
Dla ataki z psyčim hownom suspendowany baletny šef statneje opery w Hannoveru Marco Goecke je so k swojemu nadběhej na žurnalistku wuprajił. „Myslu sej, zo njebě tutón srědk w porjadku“, 50lětny w interviewje NDR wujasni. „Sym čłowjek, kotryž njeje dotal hišće nihdy tajke něšto skućił, tuž sym so wězo tež kusk přez sebje samoho stróžił.“ Minjenu sobotu bě Goecke kritikarku nowiny Frankfurter Allgemeine Zeitung z psyčim hownom namórał. Do toho bě jej wumjetował, zo přeco złe wosobinske kritiki pisa.
Jutry móža w Jendźelskej tola na zwučene wašnje woswjećić. Tak je policija pozdatneho paducha 200 000 šokolodźanych jejkow lepiła. 32lětny muž je typiske britiske jutrowne słódkosće pokradnył. Zastojnicy běchu do toho wo honjeńcy za podhladnym rozprawjeli, kotryž je „najskerje jako jutrowny zajac“ po puću.
To a tamne (14.02.23)
To a tamne (13.02.23)
Při nadpadźe rubježnika na hosćenc w Nižozemskej njeje skućićel z rozsudźenosću hosći ličił. Jako muž minjeny pjatk hosćenc w gmejnje Best z brónjemi nadběhowaše a za pjenjezami žadaše, su jeho wjacori hosći přemóžili. Woni jeho tak dołhe zadźeržachu, doniž njebě policija na městnje. Kaž so pozdźišo wukopa, měješe muž samo atrapu pistole a powětrowu pistolu při sebi.
Ze starobu 9 lět a 210 dnjow je mała myš z mjenom Pat nětko w knize Guiness zapisana. Zwěrjatko je najstarša žiwa myška, kotruž ludźo hladaja. Pat bydli w zwěrjencu SanDiego Wildlife, hdźež prócuja so wot wotemrěća wohrožene družiny zwěrjatow wuchować. Myška přisłuša k rědkej družinje, kotraž ma swoju domiznu na juhu kaliforniskeho přibrjoha.
To a tamne (10.02.23)
To a tamne (09.02.23)
W Peru je po informacijach zarjadow znajmjeńša 585 mórskich lawow na ptačej gripje zahinyło. Mortwe zwěrjata namakachu podłu pobrjoha južnoameriskeho kraja. Z přepytowanjow wuchadźa, zo běchu wone z wirusom H5N1 inficěrowane. W škitanych kónčinach kraja su nimo toho něhdźe 55 000 zahinjenych ptačkow namakali, mjez druhim pelikany, tonuški a pinguiny.
Tysacy ludźi su wčera před čěskej Narodnej banku w Praze čakali, zo bychu jednu z 200 000 limitěrowanych wopomnjenskich bankowkow dóstali. Tež w druhich městach kraja su so rynki před bankami wutworili. Najebać zmjerzk su so zajimcy samo hižo w nocy nastupili. Bankowka dopomina na 30lětne wobstaće Narodneje banki.
To a tamne (08.02.23)
Žona je z něhdźe 800 myšemi w jednoswójbnym domje na sewjeru Porynsko-Pfalcowskeje hromadźe bydliła. Hižo minjeny tydźeń bě weterinarny zarjad 400 zwěrjatow z domu wuswobodźił. Při wospjetnym zasadźenju wčera chcychu zastupjerjo zarjada a priwatnych zwěrinoškitnych iniciatiwow něhdźe 400 myšow wuchować. Susodźa žony běchu pokiw sposrědkowali, dokelž su so smjerda dla hóršili. Wobsedźerka myšow je přeswědčena, zo ma situaciju pod kontrolu a njedowidźi, zo je dospołnje přežadana.
Zwjazkowy financny minister Christian Lindner (FDP) je nowy Oldenburgski kral zeleneho kała. Zastojnstwo je do toho Berlinska měšćanostka Franziska Giffey (SPD) wukonjała. W swojej nastupnej narěči wón zwurazni, zo wón zeleny kał jara lubuje.
To a tamne (07.02.23)
Wuknjacy zakładneje šule w hessenskim Griesheimje je so po wšěm zdaću jara na šulu wjeselił. Tak je sydomlětny hólčec wčera rano hižo krótko do pjećich dom wopušćił a so z tobołu a kolesom do šule podał. Staršej staj hišće spałoj, policija zdźěli. Kedźbliwy pasant hólca wuhlada, jako po dróze horje a dele jědźeše, a zdźěli to policiji. Zastojnicy su pachoła potom domoj dowjezli a překwapjenymaj staršimaj přepodałoj.
Jako kat předrasćeny muž z pozdatnym mječom je w Esslingenskim starym měsće minjeny pjatk zasadźenje policije zawinił. Swědkojo so starosćachu, dokelž bě wón jara přeswědčiwje a z namocu wustupował. Tuž zawołachu policiju. Zastojnicy namakachu jeho w pincy domu. Tam přihotowaše so kat na wodźenje po měsće, kotrež chcyše w srjedźowěkowskim stilu wuhotować.
