To a tamne (25.11.22)
Wěstotny personal na lětanišću w New Yorku je w kófrje pasažěra žiwu kóčku namakał. We skeneru za wačoki su zwěrjo spóznali a je wuswobodźili. Kóčka bě w dobrym strowotniskim stawje a je so zaso domoj nawróćiła. Pasažěr pak poda, zo słuša kóčka někomu druhemu z jeho domjacnosće. Přiwšěm dyrbi wón nětko z chłostanskim jednanjom ličić.
Wudra z mjenom Taiyo je dobyće Japanskeje přećiwo štyrikróćnemu swětowemu mištrej Němskej na zahajenskej hrě swětowych mišterstwow zawčerawšim wěšćił. Zahorjeni japanscy fanojo kopańcy w syći maja Taiyoa tohodla za jara kompetentneho. Tuž směmy wćipni na jeho dalše prognozy być.
To a tamne (24.11.22)
Dokelž je swoje kruwy na dróhach swobodnje wokoło běhać dał, je sudnistwo w Indiskej muža k šěsć měsacam jastwa zasudźiło. Kaž nowina „Times of India“ zdźěli, je muž po argumentach sudnikow z tym žiwjenje druhich wohrožał. Z wusudom chcedźa eksempl statuěrować, zo bychu trendej přewjele kruhow na dróhach zadźěwali. Jedna přičina je, zo nochcedźa mnozy kruwy hinduistiskeje nabožiny dla morić.
Překwapjace wulka ličba ludźi po cyłym swěće wěri do toho, zo dawa chodojty, kotrež móža ze swojimi nadpřirodnymi kmanosćemi druhim škodu načinić. Kaž w fachowym magacinje „PLOS One“ předstajena studija wupraja, wěri 40 procentow wobydlerstwa z 95 krajow do zjawa. W Němskej wěri něhdźe 13 procentow naprašowanych do wjerow. Hospodarski wědomostnik Boris Gershman z American University we Washingtonje je so w studiji mjez lětami 2008 a 2017 wjace hač 140 000 ludźi naprašował. Globalna wuprajiwosć studije pak je mało zapřijatych krajow dla wobmjezowana.
To a tamne (23.11.22)
Wosebje kipry hodowny štom před sławnej cyrkwju Našeje knjenje w Drježdźanach tuchwilu rozhorjenosć wubudźi. W socialnych medijach so ludźo štoma wusměšuja a maja jón za hańbu. Někotři ludźo su samo měnjenja, zo jedna so wo recyclowany štom. Tola za štomom tči chutny pozadk. Šmrěk wotbłyšćuje situaciju w sakskich lěsach, hdźež je suchota zachadźała a mjez druhim tež lěsne wohenje zawinowała. Organizatorojo wikow su so wědomje za regionalny štom ze sakskeho lěsa rozsudźili. Mjeztym su na šmrěku přidatne hałužki připrawili a jón hodownje wupyšili.
Sportowe črije Michaela Bloomberga, bul za kopańcu Rudyja Giulianija a wobćežowak Davida Dinkinsa: Milionowa metropola New York přesadźuje něhdźe 50 darow, kotrež su měšćanosća města w zašłych lětdźesatkach dóstali. Dary měšćanostow New Yorka słušeja mjenujcy městu a njesmědźa so po kóncu zastojnstwa sobu domoj wzać. Awkcija traje hišće hač do 11. decembra.
To a tamne (22.11.22)
Spěwaca knježna Cristina Scuccia je w Italskej castingowu show dobyła a nětko swój rjad wopušćiła. „Bě to změna we mni“, 34lětna w talkshowje „Verissima“ priwatneho telewizijneho sćelaka Canale 5 rozjasni. Wona bydli nětko w Španiskej a dźěła tam jako pinčnica, wona sobotu powědaše. Město z ćmowym šlewjerjom sedźeše wona moderatorce z nosowym piercingom a pinknym woblekom napřećo. Scuccia bě w lěće 2014 „The Voice of Italy“ dobyła. Šlewjer po 15 lětach nabožneho žiwjenja wotpołožić, běše jej ćežko.
Sydomlětny hólčec w Saarbrückenje bě so minjeny štwórtk po zwadźe ze swojej maćerju w swojej stwě zamknył a telewizor wótře stajał, policija wčera zdźěli. Wołanje a klepanje maćerje njeje wjace słyšał. Mać njewědźeše sej hižo rady a informowaše z wulkej starosću policiju a wohnjowu woboru. Wobornicy zamóžachu durje skónčnje wočinić a nadeńdźechu hólca, kiž bě sej mjeztym wusnył.
To a tamne (21.11.22)
Krótko do zahajenja koparskich mišterstwow w Kataru chce hosćićel kompletny zakaz alkohola kołowokoło stadijow přesadźić. Strategija k wudawanju alkohola ma so znowa změnić, we wobłuku wosom stadijow nima so za čas hrow piwo předawać, rozprawja britiska nowina „The Times“. Rozsud su minjeny pjatk něhdźe 48 hodźin do zahajenskeje hry WM mjez hosćićelom Katarom a Ekuadorom oficialnje wozjewili.
Loni na Berlinskich Gendarmowych wikach pokradnjene a zaso našłe bože dźěćatko so zaso na tamniše hodowne wiki nawróći. Tónraz pak postawu lěpje škitaja. Drjeworězbar Ernst Kraus z Oberammergauwa je ju z rjećazom zawěsćił. Boži narodk z dźěćatkom budźe tónraz we wobłuku zachoda postajeny, hdźež změje wěstotny personal stajnje wóčko na dźěćatko. Něhdźe 50 centimetrow wulka a tři kilogramow ćežka figura je po informacijach wobsedźerjow 3 000 eurow hódna.
To a tamne (18.11.22)
Po sudniskim wusudźe smědźa kruwy na pastwje w hornjobayerskej wsy dale zwónčki nosyć. Skóržbu susodow přećiwo ratarjej w Greilingu hary dla je hamtske sudnistwo we Wolfratshausenje wotpokazało, rěčnica wčera zdźěli. Zo móhli sudnicy zwadu mjez burom a mandźelskimaj hódnoćić, dyrbješe mjez druhim fachowc posudk zdźěłać. Wón dyrbješe wujasnić, hač sylnosć zwuka kruwjacych zwonow hraničnu hódnotu dodźerži abo hač njesmědźa hižo wšitke kruwy zwony nosyć.
Pomału wočinjace so durje wobchoda su we westfalskim Beverungen ćěkaceho paducha chětro njenahladnje zadźerželi. 21lětny bě minjeny wutoru w kupnicy cigarety do swojeje toboły tyknył. Tola sobudźěłaćer bě wšo wobkedźbował, štož paduch pytny a ćekny. Tak spěšnje kaž wón pak awtomatiske durje wobchoda njeběchu. Z wotmachom prasny do pomału so wotewrjacych duri a padny.
To a tamne (17.11.22)
Na ćěkańcy před policiju je so pozdatny zadobywar na ležownosći druheho hamtskeho sydła zwjazkoweho prezidenta Franka-Waltera Steinmeiera w Bonnje schował. Krótko po tym začuwaše 28lětny, zo njeje to runjewon najlěpša ideja. Wila z wulkej zahrodu je jedna z najlěpje wobstražowanych imobilijow w Němskej. Tak traješe tež jenož mało mjeńšin, doniž zwjazkowa policija muža w nocy na minjeny pjatk njenańdźe a njezaja.
Krótko do kónca časa w jastwje měješe 26lětny hižo lóšt na swobodu a chcyše karnewal swjećić. Potajkim je wón přiležnosć wužił, jako smědźeše jastwo 11. nowembra raz wopušćić, a so w Euskirchenje wotsadźi. Po někotrych dnjach přizjewi so dobrowólnje pola policije a poda, zo budźe zbytnych 28 dnjow swojeho chłostanja wotsedźeć. Kotre sćěhi karnewalowa party za njeho změje, njeje hišće jasne.
To a tamne (15.11.22)
To a tamne (14.11.22)
Z pomocu zadka su so wjeseli Japanjenjo při hajenju nałožka „popo-sumo“ w „rićnym sumje“ měrili. Na nócnym swjedźenju w prefekturje Shizuoka spytaštaj při tym stajnje dwaj kontrahentaj na myjnym čworje stejo ze zadkom so mjezsobu dele storčić, kaž japanski dźenik „Tokyo Shimbun“ sobotu wozjewi. Dobyćerka lětušeho „rićneho“ wubědźowanja bě dźesaćlětna šulerka.
Na ćěkańcy před přistajenymi wobchoda je pozdatny paduch swój nachribjetnik zawostajił, w kotrymž běchu pjenjezy, pućowanski pas a jězbna dowolnosć. Jako chcyše muž kupnicu w bayerskim Ambergu wopušćić, je wěstotna připrawa reagowała, policija wčera zdźěli. Přistajena jeho narěča, wón přepoda jej nachribjetnik a ćekny. Dokelž pak njeběchu w nachribjetniku žane pokradnjene wěcy, měješe wón twory najskerje při ćěle. Namakane papjery słušeja 35lětnemu. Policisća wzachu nachribjetnik zawčerawšim sobu na rewěr, hdźež móže sej jón wobsedźer wotewzać.
To a tamne (11.11.22)
Wosebity swětowy rekord docpěštaj wčera mužej w Hamburgu, jako rozbištaj kokosowe worjechi a napojowe tyzki. Tři nowe swětowe rekordy buchu tak w hanseatiskim měsće nastajene, zdźěli Němski institut rekordow, kotryž płaći jako němskorěčny pendant ke „Guinnessowej knize rekordow“.
Město Köln dźěli so wot hoberskeho přestrjenca, na kotrymž staj w 1960tych lětach na swjatočnych přijećach w radnicy Queen Elizabeth II. kaž tež prezident USA John F. Kennedy stałoj. Nětko ma awkciski dom přestrjenc 17. nowembra přesadźić.
