To a tamne (15.06.17)

štwórtk, 15. junija 2017 spisane wot:

Awtowu honjeńcu kaž w filmje dožiwichu wčera wječor w Magdeburgu policisća, po tym zo chcychu 25lětneho šofera awta kontrolować. Tón smaleše do směra nutřkowneho města. Přesćěhace policajske jězdźidło spyta wón z njejapkim borzdźenjom wobškodźić. Přiwšěm jeho zadźeržachu a skónčnje zajachu. Na to so wukopa, zo njeměješe pod wliwom drogow stejacy muž žanu jězbnu dowolnosć, awto bě wotzjewjene a čisłowe taflički pokradnjene. Nimo toho předležeše přećiwo njemu wukaz zajeća.

Njepowalnaj staj kontrahentaj w zwadźe wo předawanje praženych kołbaskow při awto­dróze A 9 w Durinskej. Wotpowědny zarjad hrozy mějićelce kioska z pjenježnej pokutu. Ta wšak scyła na to njemysli so podać a chce so z peticiju na kanclerku Angelu Merkel wobroćić. 3 200 ludźi je peticiju hižo podpisało.

To a tamne (14.06.17)

srjeda, 14. junija 2017 spisane wot:

Chětro strašne parkowanske městno za swoje awto je sej wopita šoferka w vogtlandskim Treuenje wupytała, a to na kolijach železniskeho přechoda. Z nimale dwěmaj promilomaj alkohola w kreji chcyše wona na to wotjěć. Kedźbliwi pěšcy pak tomu zadźěwachu a alarmowachu policiju. Ta awto zrumowa a wupisa 60lětnej žonje pokutu.

Na Rynje płuwaca čłowječa postawa z gumija je wulkozasadźenje policije a wohnjoweje wobory zawiniła. Kaž wottam rěkaše, běchu wjacori ludźo za­zwonili, dokelž běchu njedaloko Mainza sprostnjenu nahu wosobu na rěce płuwacu wuhladali. Na to dwaj helikopteraj, policija, wohnjowa wobora a hessenska wodoškitna policija na rěce pytachu. Zastoj­nicy pak móžachu změrować: Štož kaž čłowjek wupadaše, bě jenož wulka gu­mijowa klanka.

To a tamne (13.06.17)

wutora, 13. junija 2017 spisane wot:

Zazłobjeny jědnaćelětny hólčec je w durinskim Saalfeldźe zasadźenje policije zawinił. Wón bě doma twochnył, dokelž nochcyše jemu mać hrajku kupić, kotruž sej hólc přeješe. Policija na to po cyłym měsće hodźiny dołho a samo z psom za nim­ pytaše,­ doniž jeho skónčnje na ławce­ njenańdźe. Jim hólc jenož rjekny, zo přeje sej Fidget Spinner, nowu trendowu hrajku, kotruž bě w interneće widźał.

Defekt na zadnjej wósce 56 lět stareho traktora je jězbu jako „trecker-Willi“ znateho rentnarja Winfrieda Langnera do Pětrohroda přetorhnył. Kaž jeho dźowka medijam zdźěli, je narunanski dźěl mjeztym po puću do ruskeje eksklawy Kaliningrada, dokalž bě jeje nan minjeny tydźeń dojěł. 81lětny Langner bě so 20. meje z traktorom a małym bydlenskim wozom na puć nastajił. 5 000 kilometrow dołha jězba ma štyri měsacy trać.

To a tamne (12.06.17)

póndźela, 12. junija 2017 spisane wot:

Protestujo přećiwo awtam přichilenym městam su sta kolesowarjow zdźěla abo samo cyle bjez drasty po Londonje jěli. World Naked Bike Ride wotměwa so kóžde­ lěto w mnohich městach, w Londonje je tale demo tradicionalnje najwjetša. Z nahim protestom pokazuja wobdźělnicy tež na strachi, kotrymž su kolesowarjo w městach wustajeni, hdźež po jich słowach přemało na dobro tohole wobswět škitaceho wobchadneho srědka činja.

Z awtom nana je třilětny w Bremenje do parkowaceju awtow zrazył. Hólčk bě wčera dopołdnja z klučikom awta w ruce swojej maćeri twochnył. Z dalokoposłužowakom wón awto wočini, zalěze do njeho a startowaše motor. Wóz na to zaskoči, prasny pak do pódla so parkowaceju awtow. Tak zražka jězbu třilětneho zdobom skónči. Na zbožo so nichtó nje­zrani, kaž w policajskim reporće steji.

To a tamne (09.06.17)

pjatk, 09. junija 2017 spisane wot:

Ze swojim hroznym kostimom je młody muž njedaloko Hamburga wulkozasadźenje policije z 21 policajskimi awtami zawinował. Muž bě rano z čornej hawbu zakukleny w Seevetalu po puću, na čož ludźo policiju wołachu, myslo na hrožacy amokowy běh. Policistam 17lětny rozłoži, zo je so na temowym dnju šule jako agent FBI předrasćił. Policisća njemějachu za tajki žort žane zrozumjenje a wupisachu skóržbu. Snano dyrbi šuler tež kóšty wulkozasadźenja přewzać.

Žiwe wotpadki? Policistam w Offenburgu je při nócnej słužbje na chódniku jog­hurtowy nopašk napřećo přišoł. Jako nopašk zběhnychu, wuhladachu małeho jěža pod nim. Prawdźepodobnje bě wćipne zwěrjo do nopaška zalězło a w nim tčacy wostało. Zastojnicy jěža wuswobodźichu a w měšćanskim parku wusadźichu, bjez woneho nahłownika.

To a tamne (08.06.17)

štwórtk, 08. junija 2017 spisane wot:

Wobě noze złamał je sej paduch w Mecklenburgsko-Předpomorskej při ćěkańcy. Zhromadnje z kumpanomaj bě wón w twarskich wikach w Parchimje wěcy w hódnoće 60 eurow kradnył. Při­stajeni skupinu lepichu a dowjezechu ju do běrowa w prěnim poschodźe. Jedyn z muži tam z wokna skoči a so ćežko zrani.­ Tamneju přepodachu policiji. Zranjeneho dowjezechu do chorownje.

Něhdy za dźesać eurow na čaporowych wikach kupjeny, nětko za 750 000 eurow dale předaty: Londonski awkciski dom Sotheby’s je drohotny diamantny pjeršćeń za njewočakowano wulku sumu přesadźował. Muž bě před něšto časom pjeršćeń w awkciskim domje trochować dał. Při tym so wukopa, zo ma stary pjeršćeń­ z 80tych lět drohotny 26,92 karatowy­ diamant za 350 000 eurow. Sumu­ su nětko jasnje přetrjechili.

To a tamne (07.06.17)

srjeda, 07. junija 2017 spisane wot:

Zwrěšćił je pospyt rekorda na kupje Rujany. Tam chcychu 16 metrow wysoki hród z pěska natwarić a do Guinnessoweje knihi rekordow zapisać dać. Při wudeskowanju bě so hród wčera puknył a so skónčnje sypnył. „Smy wšitcy jara zrudni“, zdźěli zamołwita festiwala skulpturow na Rujanach. Kónc meje běchu wjace hač 5 000 tonow prasowaneho pěska přiwjezli, zo móhł hoberski twar nastać. Nowonatwar njeje hižo móžny.

Muzej nimokulenych wunamakanjow je wot dźensnišeho w šwedskim Helsingborgu přistupny. Tam pokazuja eksponaty, wot kotrychž běchu sej producenća swój čas wulki wuspěch lubili: datowe nawoči Google Glass, składowak datow MiniDisc, zamróžene jědźe zhotowjerja zhubneje pasty Colgate abo parfim twarca motorskich Harley-Davidson. Koncerny tajke něšto rady zatajeja.

To a tamne (06.06.17)

wutora, 06. junija 2017 spisane wot:

Na wšě 27 900 eurow dołži šoferka awta mějićelej parkowanskeho domu na kupje Mallorca. Žona bě Volvo w měrcu 2009 w stolicy kupy Palma w zjawnym parkowanskim domje wotstajiła – a njeje awto hižo ženje wotewzała. Nětko, wosom lět pozdźišo, awto tam přeco hišće steji, „zapróšene, wopušćene a z mało powětrom we wobručach“, piše nowina Ultima Hora. Mějićel wot lěta 2012 přećiwo žonje skorži, zo by pjenjezy dóstał, dotal podarmo.

Z nócnym wołanjom w stilu alarmoweje připrawy je sowa w badensko-württembergskim Riedlingenje wospjet zasadźenje policije zawinowała. Naposledk wobydlerka w nocy na póndźelu zastojnikow alarma dla informowaše. Policisća pak njenańdźechu paducha, ale sowu, kotruž mjeztym znaja. Přičinu nócneho harowanja njeznaja, „dokelž je njemóžne, so ptačka woprašeć“.

To a tamne (02.06.17)

pjatk, 02. junija 2017 spisane wot:

Twarožk z wanilku abo lód z kuskami mjasa dadźa sej najlubši přećeljo čłowjeka – psy – nětko pola Giuseppy Cimina­ słodźeć. W jeho Rastattskej lodarni móža sej wobsedźerjo psow nětko za sebje kaž tež za swojeho štyrinohača słódny lód kupić. Tón dóstanje zmjerzlinu we wotpowědnym nopašku, kotryž móže hač do dna porjadnje wulizać.

Žorta dla dyrbješe indiska swójba bjez nana z jězbu do madźarskeho Budapesta pokročować. Na Mnichowskim lětanišću při wěstotnej kontroli wón mjenujcy rjekny, zo ma jeho mandźelska rozbuchlinu při sebi, štož wězo wěrno njebě. Byrnjež­ swoje hłupe přispomnjenje na to wospjet wobžarował, su jeho nablaku zaso­ wróćo do Mumbaja pósłali.

To a tamne (01.06.17)

štwórtk, 01. junija 2017 spisane wot:

Šěsć młodych dypornakow, kotrež běchu prawdźepodobnje staršeju zhubili, su pěšcy­ w Mönchengladbachu z pomocu wohnjoweje wobory wuchowali. Pasanća běchu w lěsu na kromje města strachoćiwe ćikotanje ze spowróćeneho štoma słyšeli a hnězdo z młodźatami našli. Štyri móžachu sami wućahnyć, dwě wuchowachu wobornicy. Njezranjene dowjezechu wšitke šěsć dypornakow do zwěrjatownje.

Pomocliwaj policistaj staj 18lětnemu w Delnjej Frankskej maturu wuchowałoj. Młody muž bě po puću k pruwowanju z awtom stejo wostał, dokelž bě tank prózdny. Připadnje nimo jěducaj policistaj so na njeho dohladaštaj. Dospołnje blědy jim młody muž rozłoži, zo ma za dźesać mjeńšin pruwowanje. Bjez wahanja jeho zastojnikaj do šule dowjezeštaj a dypkownje wotsadźištaj. Kak je pruwowanje wušło, njeje znate.

nawěšk

nowostki LND