To a tamne (12.10.22)
Indiska wobžaruje smjerć lětdźesatki stareho krokodila. Zwěrjo z mjenom Babiya bě w haće hinduistiskeho templa w juhoindiskim Kerala žiwe a žerješe jenož rajs a cokor, kiž běchu jemu wěriwi sobu přinjesli. Póndźelu su krokodila pochowali. Wobrazy pokazuja z kwětkami pyšene a z palmowymi łopjenami zawodźěte zwěrjo. Kak dołho je Babiya w templu žiwy był, njeje znate.
W zwadźe nahubnika dla je 39lětny w spěšniku ICE pola Bochuma mječ wućahnył. Muž sedźeše bjez nahubnika w ćahu. Jako druzy jeho na winowatosć wužiwanja nahubnika skedźbnichu, dóńdźe k zwadźe. Na to muž mječ wućahny a před sobu połoži. Policija muža zaja. Mječ bě drje jenož hrajka, najebać to dyrbi wón z chłostanjom wohroženja dla ličić.
To a tamne (11.10.22)
Pře hłuboko do škleńcy pohladnył je muž w mecklenburgsko-předpomorskim Stralsundźe. Wón bě sej w měšćanskim busu tak kruće wusnył, zo njemóžeše šofer jeho wubudźić a dyrbješe policiju wołać. Do toho bě muž dwě hodźinje dołho spicy w busu sobu jěł. Zastojnicy móžachu jeho skónčnje wubudźić. Woni zwěsćichu 2,88 promilow alkohola. Nimo toho njeměješe wón žanu jězdźenku.
Pod wliwom drogow je nan w hornjobayerskim Raublingenje z awtom swojeho syna wozył, za kotrymž policija pytaše. Zastojnikam bě njewěsty jězbny stil muža napadnył. 43lětny muž přizna, zo je do jězby marihuanu brał. Na zadnjej ławce ležeše 22lětny syn, přećiwo kotremuž předležeše wukaz zajeća, dokelž bě 2020 tohorunja pod wliwom drogow z awtom jěł. Wobaj móžeštaj so z hnydomnym płaćenjom pokuty zajeću wuwinyć.
To a tamne (10.10.22)
Najćeši kirbs Europy přińdźe znowa z Italskeje. Při wčerawšim napřemowaženju w Ludwigsburgu je so dobyćer lońšeho wubědźowanja a mějićel swětoweho rekorda Stefano Cutrupi z 1 100,5 kilogramow ćežkim kirbsom jasnje přesadźił. „Najćeši konkurent“ bě Iwan Horde z Nižozemskeje ze swojim 891,5 kilogramow ćežkim kirbsom. Na wubědźowanju wobdźělichu so plahowarjo z wjacorych krajow. Cutrupi bě hižo loni z 1 226 kilogramow ćežkim eksemplarom dobył.
Njeprošeny to suweněr: Wosrjedź nocy je 32lětneho Mnichowčana skorpion kałnył. Prawdźepodobnje bě sej muž eksotiske zwěrjo z USA sobu přiwjezł, hdźež bě ze swojej přećelku stanował. Po nawróće je zwěrjo twochnyło a so w bydlenju schowało. Muž móžeše skorpiona ze škleńcu popadnyć a nuzowe ćisło wołać. Jeho dowjezechu do chorownje.
To a tamne (07.10.22)
Štwórte městno sej zdobył je němski atlet Görge Heimann při legendarnym spěchanju po schodach Empire State Buildinga w New Yorku. 53lětny Kölnjan trjebaše za 1 576 schodow hač do 86. poschoda po słowach zarjadowarja 11 mjeńšin a 40 sekundow. Dobyćer bu Wai Ching Soh z USA. Bě to druhi start Heimanna po 2016, jako bu pjaty. Zo móhł wón dobyć, bě Heimann hladajo na konkurencu zwoprědka wuzamknył.
Pod mostom tčacy wostał je dwuposchodowy bus w Berlinje. Při tym so wjacore wosoby zranichu. Njezbožo sta so w měšćanskim dźělu Steglitz w tunlu pod awtodróhu a spěšnoželeznicu. Při zražce so horni poschod busa chětro wobškodźi. Nětko statikarjo móžne škody na mosće pruwuja. Tohorunja chcedźa zwěsćić, čehodla je bus tutón tunl wužiwał, dokelž wjedźe busowa čara poprawom druhdźe.
To a tamne (06.10.22)
K sudniskemu jednanju jěł – jězdźenja bjez jězbneje dowolnosće dla – je muž w sewjerorynsko-westfalskim Delbrücku a to z awtom bjez jězbneje dowolnosće. 34lětneho běchu w juniju při wobchadnej kontroli bjez papjerow lepili, na čož dóńdźe k sudniskemu jednanju. Po puću na sudnistwo policistej, kiž bě jako swědk skazany, muž w awće napadny. Sudnistwo docpě 34lětny skónčnje w policajskim awće. Tam zasudźichu jeho k wjacorym měsacam jastwa.
Na wšěch 256 rólow hajzloweje papjery su paduši na Lübeckskim hłownym dwórnišću pokradnyli. Do toho běchu so do sudobjow, w kotrymž běchu hygieniske wudźěłki składowane, zadobyli. Spakosćili su tohorunja 15 000 papjerjanych trjenjow. Wotwjezli su rubiznu w plastikowych wotpadkowych měchach, kotrež tohorunja w sudobjach ležachu.
To a tamne (05.10.22)
Sławne wubědźowanje wo najwyšu čłowjesku pyramidu su w katalanskim měsće Tarragonje přewjedli – prěni króć po koronapandemiji. Mustwa wobsteja z dźesatkow sportowcow, kotřiž spytaja, w stadionje přistawneho města při Srjedźnym morju hač do dźesać poschodow wysoku pyramidu natwarić. Sportowcy steja při tym na ramjenjach wobdźělnikow pod nimi. Lětuši dobyćerjo běchu sportowcy z města Vilafranca.
Cwólbu bankowych rubježnikow zajała je Berlinska policija. Štyrjo mužojo běchu w nocy na njedźelu spytali, so do trezoroweje rumnosće banki w Parsku (Königs Wusterhausen) zadobyć. Za to točachu z njebozom wulku dźěru do sćěny, zo móhli priwatne trezory ludźi wurubić. Prjedy hač so jim tole poradźi, jich specialny komando policije zaja. Kriminalna policija bě skupinu hižo dlěje wobkedźbowała.
To a tamne (04.10.22)
Dźesać wowcow je w frankowskim Hofje zhromadnje z pastwy ćeknyło a tak zasadźenje policije zawinowało. Zwěrjata běchu so sobotu „zbratřili a wrota přełamali“ rěčnik policije zdźěli. Pěšk, kiž tole wobkedźbowaše, starosćeše so bliskeje dróhi dla a informowaše policiju. Zhromadnje z policistami dowjedźe wón wowcy zaso do wobhrodźenja. Nichtó so njezrani, kaž rěkaše.
Najćeši kirbs Němskeje přińdźe lětsa z Bayerskeje. Plahowarjej David a Jakob Frommelt z Erkheima staj wčerawše waženje kirbsow w Ludwigsburgskim baroknym hrodźe dobyłoj. Kirbs družiny „Atlantic Giant“ wažeše 796 kilogramow. Na němskich mišterstwach we waženju kirbsow wobdźělichu so plahowarjo ze wšeje Němskeje. Při tym chcychu rekord z lěta 2018 přetrjechić. Tehdy wažeše najćeši kirbs Němskeje 916 kilogramow.
To a tamne (30.09.22)
Kruwjace stadło w Delnjosakskej je dźiwje prosatko „přiwzało“. Před třomi tydźenjemi bě ratar njewšědneho hosća mjez kruwami wuhladał. Proso „Frida“, kiž ma mjeno wot wjesnych dźěći, je mjeztym dospołnje integrowane. Jedna z kruwow so kaž mać wo nje stara. Hajnik je informowany, zo njesmě swinjo třěleć. Tuchwilu pase so stadło na łukach při rěce Weser. Frida bě drje zwisk k swojim zhubiła, jako črjóda rěku přeprěči.
Při lutowanju energije chce francoske knježerstwo z přikładom być – z pulowrami a tołstymi jakami. Tak pokazuje so ministerska prezidentka Élisabeth Borne, kotraž hižo tydźenje dołho k lutowanju namołwja, wot najnowšeho w stepowanej jace. Financny minister Bruno Le Maire, hewak stajnje we wobleku, přińdźe w tołstym pulowru na posedźenje. „Hinak mje wjace njewidźiće“, wón rjekny.
To a tamne (29.09.22)
Bjez cholowow su chětro napiteho wopytowarja Mnichowskeho Oktoberskeho swjedźenja na tamnišej policajskej straži „wotedali“. Přistajeny bě mužej z přikrywu wupomhał a jeho na stražu přewodźał. Kaž so wukopa, bě muž wustupić dyrbjał a so cholowy hnydom cyle slekł. Njemóžeše pak so dopominać, hdźe bě cholowy zhubił. Zastojnicy je skónčnje namakachu a mužej přepodachu.
Sama lutka je kóčka z Regensburga z ćahom do Mnichowa a zaso wróćo jěła. Železnicar je zwěrjo wuhladał a tole policiji zdźělił. „Rosie“ bě wutoru w rańšich hodźinach skradźu na Regensburgskim dwórnišću do ćaha k Mnichowskemu lětanišću zalězła a wottam zaso domoj jěła. W Regensburgu přepodachu zwěrjo wobsedźerce. Kóčka je časćišo sama po puću, žona rjekny. Hač do Mnichowa pak hišće ženje twochnyła njebě.
To a tamne (28.09.22)
Za swoju rólu jako kriminalistka w nowym rjedźe kriminalnych filmow „Lauchhammer“ je dźiwadźelnica Odine Johne samo jězbnu dowolnosć wuspěšnje złožiła. Tole je 35lětna nowinarjam přeradźiła. Cyłkownje šěsć pokročowanjow su produkowali, w kotrychž tež ničenje łužiskeje krajiny přez brunicowe jamy nazornje dokumentuja. Prěni dźěl serije „Łuchow – smjerć we Łužicy“ wusyłaja dźensa wječor w 20.15 hodź. w ARD.
Pućowaca policistka Sandra Köhler je wjace hač 10 000 eurow za wopory katastrofalneho zapławjenja w dole rěki Ahr nazběrała. 48lětna kriminalna hłowna komisarka je předwčerawšim, póndźelu, po 24 dnjach, 19 etapach a 415 kilometrach do Kassela doběžała. Policistka bě so 3. septembra na puć podała a je na swojim puću we wšitkich policajskich prezidijach Hessenskeje pozastała.
