To a tamne (17.09.21)
120 hodźin na mobilnym nuzniku wutrać chcedźa štyrjo Britojo, zo bychu pjenjezy za dobroćelsku organizaciju zběrali. „Je napinace“, rjekny jedyn z wobdźělnikow po prěnjej nocy. Wodnjo wšak maja kontakt z ludźimi, w nocy pak je njepřijomne a wuske. Bywši wojacy chcedźa pjenjezy organizaciji Forgotten Veterans přewostajić, kotraž so wo weteranow stara. Wutrać dyrbja hišće hač do njedźele w 17 hodź. Hač do wčerawšeho běchu 1 000 puntow (1 170 eurow) nazběrali.
Zabłudźeny młody wjelk je w Drježdźanach-Langebrücku w płoće tčacy wostał. Zwěrjo chcyše sej před ludźimi na ležownosć wućeknyć a dósta so tak do njepřihódneho połoženja. Sobudźěłaćerjo wjelčeho běrowa wołachu hajnika a policiju. Skótny lěkar móžeše małeho wjelka skónčnje wuswobodźić. Tón so na to chětře do bliskeje Drježdźanskeje hole zminy. Je jara rědko, zo so wjelki woprawdźe do sydlišćow zabłudźa.
To a tamne (16.09.21)
Zynčacy nachribjetnik je so na Nürnbergskim hłownym dwórnišću wo wulkozasadźenje policije postarał. Něhdźe 50 zastojnikow, mjez nimi fachowcy za znješkódnjenje bombow, přijědźe. Potencielne wohroženje pak wukopa so na zbožo jenož jako elektriski truhanski aparat. 85lětny bě nachribjetnik mjez čakacymi pod stólcami wotstajił a so hakle po dobrej hodźinje zaso wróćił. Policija nětko pruwuje, štó ma kóšty zasadźenja zarunać.
Cigarety dla je nan w mecklenburgskim Bad Kleinenje swojej dźěsći samej z ćahom jěć dał. Krótko do wotjězda ćaha bě wón na nastupnišćo šoł, zo by cigaretu kurił. Dźewjeć měsacow stara dźowka we wozyčku a dwulětny synk wostaštaj w ćahu. Naraz so durje začinichu a ćah wotjědźe bjez nana. Zwjazkowa policija so wo dźěsći staraše. Chětro wustróžany je nan z přichodnym ćahom za nimaj přijěł.
To a tamne (15.09.21)
Z blachowej tyzu bědźacy so jěž je w schleswigsko-holsteinskim Neumünsteru zasadźenje policije zawinił. Wobydlerka bě spodźiwne zwuki na ležownosći susoda słyšała a na zadobywarja tukała. Policija přijědźe z třomi awtami. Zastojnicy prózdnje stejacy dom wobstupichu, přepytachu jón, ale njejsu ničo namakali. Naraz pak woni tohorunja podhladne zwuki słyšachu a wuhladachu „z blachowej tyzu wojowaceho“ jěža.
Zwěrjeći wopyt w Lipšćanskej radnicy: Sobudźěłaćerka socialneho zarjada so njemało wustróži, jako z woknom hladajo šupa (Waschbär) wuhlada, kiž do běrowa hladaše. Městu bě to přičina, přez radnicowy intranet sobudźěłaćerjow pokiwy za wobchad z dźiwimi zwěrjatami dawać: „Na kóždy pad wotstawk dźeržeć a na žadyn pad je njepicować.“ Z fotami šupa su tele warnowanje rozšěrjeli.
To a tamne (14.09.21)
Chětro zajěł bě so kolesowar, kotrehož su danscy policisća na awtodróze pola Ellunda njedaloko mjezy k Němskej lepili. Kaž jim 25lětny powědaše, bě wón před dnjemi w Madźarskej startował, zo by přećela w Italskej wopytał. Kartu abo handy pak młody muž žanej při sebi njeměješe. Zastojnicy přepodachu 25lětneho policiji w Němskej, kotraž přewodźeše jeho skónčnje na dwórnišćo.
Tankować a zapłaćić – tak to wodźerjo jězdźidłow činja. Na tankowni w delnjobayerskim Hauzenbergu pak je minjenu sobotu něšto křiwje běžało. Jako chcyše muž swoju zličbowanku 21 eurow zapłaćić, wón pytny, zo je tankownja zamknjena. Wón zawoła tuž policiju, zo móhł pjenjezy někomu dać. Wšako nochcyše nikoho wobšudźić. Kaž zastojnicy zwěsćichu, bě šef tankownje na dowolu a njedocpějomny. Po wšěm zdaću bě wón zabył tankowanske stołpy wupinyć.
To a tamne (13.09.21)
To drje so mnozy dźiwachu, jako wuhladachu małeho hólčka za wodźidłom awta, kotrež bě minjeny štwórtk na zwjazkowej dróze pola Passauwa po puću. Tež policist, kiž bě ducy na dźěło, to wobkedźbowaše a zawoła swojich kolegow. Kaž so wukopa, bě 44lětny swojeho dwulětneho synka na klin wzał a jemu wodźidło jězdźidła přewostajił. Hakle jako hólčk zaso w swojim dźěćacym sydle sedźeše, smědźeštaj dale jěć. Nan ma nětko wězo z chłostanjom ličić.
Němske mišterstwa pomjatkoweho sporta maja noweho mištra, a to samo z rekordom. W Romje bydlacy 21lětny Andrea Muzii je sej ličbu ze 630 cyframi spomjatkował, zdźěli wčera organizator wurisanja Steffen Bütow w Torgelowje, hdźež su je přewjedli. Cyłkownje 1 700 ludźi po cyłym swěće pomjatkowy sport wukonja.
To a tamne (10.09.21)
Lěta 1962 za dwanaće centow kupjeny comicowy zešiwk „Spiderman“ su w USA za 3,6 milionow dolarow (něhdźe tři miliony eurow) přesadźowali. Je to najdróši comicowy zešiwk, kotryž su hdy přesadźowali, zdźěli awkciski dom Heritage Auctions w texaskim Dallasu.
Swojich wobsedźerjow z awta wuzamknył je pos w Bayerskej. Porik bě z bydlenskim mobilom po puću a bě njedaloko sławneho hrodu Neuschwanstein pozastał. Muž a žona wulězeštaj, zo byštaj fotografowałoj. Při tym staj motor dale běžeć dałoj. Pos skakaše nerwozny po sydle sobujěduceho a hladaše za nimaj z woknom. Při tym dótkny so knefla, kotryž awto wotnutřka zamkny. Mužej so na zbožo poradźi, z gratom nabóčne wokno wočinić a do woza zalězć.
To a tamne (09.09.21)
Kreatiwnu formu lěnjopasenja je sej financny zastojnik w Šwedskej wumyslił. Přistajeny dawkoweho zarjada je hodźiny dołho sam na so zwonił. Kaž nowiny rozprawjeja, běše telefon muža cyłkownje 55 hodźin blokowany. Za to bě wón ze słužbnym aparatom swój mobilny telefon zazwonił a bě tak „wobsadźeny“. Wonkowne telefonaty posrědkowachu tamnym sobudźěłaćerjam. Šefej skónčnje wěčne telefonaty napadnychu. Zastojnik smě nětko z pušćenjom ličić.
Klasiski to pad w krótkej přestawce na awtodróhowym wotpočnišću. Nan je na A2 pola Hannovera swoju 16lětnu dźowku zabył. Swójba bě krótko pozastała, zo móhł wón wustupić hić, mać w awće spaše. Štož muž njewědźeše: Tež dźowka bě na nuznik šła. Tak wón dale jědźeše. Holca prošeše druhich wo pomoc, kotřiž nana a mać telefonisce informowachu.
To a tamne (08.09.21)
Njewšědnu namakanku su archeologojo w Lübecku wuslědźili: 79 lět po bombardowanju města přez lětadła antihitlerskich zwjazkarjow nańdźechu woni w pincy tehdy zničeneho domu derje zdźeržanu tortu. Prěnje přepytowanja su wunjesli, zo jedna so wo worješkowu tortu z krokantowej kromu. Z glazuru a ornamentami wudebjene pječwo bě w bywšej kuchni domu pod rozwalinami zasypane a je tak wšitke lěta přetrało.
Přistojny paduch je so w sewjerorynsko-westfalskim Gevelsbergu pola wobsedźerki bydlenja zamołwił – a bjez rubizny ćeknył. Njeje wědźał, zo je něchtó doma, rjekny wón zadźiwanej wobydlerce, kotraž jeho nadobo w koridorje zetka. Na to so spěšnje zminy. Do toho bě so do bydlenja w pjatym poschodźe wjaceswójbneho domu zadobył a je při tym najskerje kusk přewótře był.
To a tamne (07.09.21)
Tobołu ze 40 000 eurami w busu zabyła je žona w juhofrancoskim Nîmesu. Dźakowano přikładnemu zadźerženju sobudźěłaćerjow wozydłownistwa móže sej wona tošu z pjenjezami nětko pola policije wotewzać. Šofer bě zabytu tošu w depoće wotedał, bjez toho zo by wulce do njeje hladał. Sobudźěłaćerjo jón wočinichu, zo bychu wobsedźerja zwěsćili. Při tym namakachu pjenjezy a dokumenty, kotrež wobswědčeja, zo su pjenjezy legalne.
Dwanaće pokradnjenych katalyzatorow je policija při kontroli na awtodróze A 4 pola Wilsdruffa w awće namakała. Zastojnikam bě awto spodźiwneho jězbneho stila dla napadnyło. Pola 40lětneho wodźerja reagowaše drogowy test pozitiwnje. Při kontroli awta namakachu zastojnicy katalyzatory a grat za kradnjenje. Zwotkel nastroje pochadźeja a kak wulka škoda je, chcedźa nětko wuslědźić.
To a tamne (06.09.21)
Kino pod hołym njebjom wosrjedź awtodróhi móžeše 500 filmowych fanow sobotu na A 8 pola Pforzheima dožiwić. Wottorhanskich dźěłow při mosće dla bě čara kónc tydźenja zawrjena. Pforzheimske komunalne kino je składnosć wužiło a tam 15 metrow šěroku płachtu stajiło. Na třoch jězdnjach běchu stólcy nastajane, nimo toho předawachu popcorn a napoje. Wšitke zastupne lisćiki běchu w běhu połdra hodźiny předate.
Hejatej konjej stej wulět zapřaha w braniborskim Rheinsbergu dočasnje skónčiłoj. Brunačej běštej wosrjedź wulěta wosomwosoboweje skupiny z kuču naraz stejo wostałoj. Lědma zo bě pohonč z woza zalězł, pak wonej wóz chětro spěšnje 200 metrow po chódniku dale ćehnještej. Hakle jako so wotežka w štomje zapopadny, bě jězba nimo. Na zbožo so jenož jedna sobujěduca snadnje zrani.
